“Nikol Paşinyanın anadangəlmə qorxuları və kompleksləri manial şəkildə kəskinləşir, məhkəmə-hüquq sistemi isə onun fobiyalarına xidmət edir. Biz ölkəni itirə bilərik, görünür, xalq da kollektiv özünümüdafiə instinktini itirib”.

Sumqayit.tv xəbər verir ki, bunu Ermənistanın sabiq prezidenti Robert Köçəryanın həbsxanadan göndərdiyi mesajında deyib.

Ermənistanın keçmiş lideri ona qarşı irəli sürülən ittihamları “olduqca absurd” adlandırıb.

“Ölkəni son dərəcə təhlükəli avantüraya cəlb ediblər və onu böyük dövlətlərin geosiyasi maraqlarının toqquşduğu mərkəzə çeviriblər”, - o bildirib.

Köçəryan Paşinyanı Azərbaycanın bütün tələblərini yerinə yetirməkdə də ittiham edib.

“Bütün bunlara son qoymaq lazımdır, yoxsa hamı türk dilini öyrənməyə başlamalı olacaq”, - o əlavə edib.

Xatırladaq ki, Robert Köçəryan avqustun 27-də vəzifə səlahiyyətlərindən sui-istifadə, külli miqdarda rüşvət alma və çirkli pulların yuyulması ittihamları ilə məhkəmənin qərarı əsasında iki aylıq həbs edilib.//Teleqraf.az

ABŞ ordusunun İranın Hörmüz boğazındakı strateji Lark adasına hücum etdiyi barədə xəbərlərdən sonra bölgədə gərginlik yenidən artıb.

Sumqayit.tv xəbər verir ki, İran İnqilab Keşikçiləri Korpusu hücumu təsdiqləyib. İran mediası adada partlayış səslərinin eşidildiyini, ölən və yaralananların olduğunu bildirib.

Lark adasında partlayışlar baş verib

İranın Fars Xəbər Agentliyi Lark adası ətrafında bir neçə partlayış səsinin eşidildiyini xəbər verib. İlk mərhələdə partlayışların dəqiq baş verdiyi ərazi və səbəbi barədə məlumatın aydın olmadığı bildirilib.

Tasnim Xəbər Agentliyi isə adadakı bir nöqtənin pilotsuz uçuş aparatı ilə vurulduğunu və hücum nəticəsində 2 nəfərin öldüyünü, 2 nəfərin yaralandığını iddia edib.

ABŞ mediasında yayılan ilkin məlumatlarda isə ABŞ ordusunun Lark adasındakı raket qurğularını hədəf aldığı bildirilib.

İran hücumu təsdiqlədi

İran İnqilab Keşikçiləri Korpusunun açıqlamasında Lark adasına hücumun ABŞ və İsrail tərəfindən həyata keçirildiyi bildirilib.

Açıqlamaya görə, hücum nəticəsində aralarında mülki şəxslərin də olduğu ölən və yaralananlar var. İran tərəfi hücuma cavab veriləcəyini açıqlayıb.

İran ABŞ bazalarına raket zərbələri endirdi

İran İnqilab Keşikçiləri Korpusu daha sonra ABŞ-nin İrana qarşı hücumuna cavab olaraq qisas əməliyyatlarının başladıldığını açıqlayıb.

Bildirilib ki, İranın Aerokosmik Qüvvələri İordaniyadakı Kral Hüseyn və Muvaffak Salti hava bazalarını ballistik raketlərlə hədəfə alıb.

İran tərəfi hücumlarda bazalardakı texniki və texniki xidmət infrastrukturlarının, həmçinin döyüş təyyarələrinin yerləşdiyi ərazilərin vurulduğunu və ağır zərər dəydiyini iddia edib.

Hörmüz boğazı ilə bağlı xəbərdarlıq

İran açıqlamasında Hörmüz boğazı üzərindəki nəzarəti zəiflətməyə yönələn cəhdlərin nəticə verməyəcəyi bildirilib.

Tehran həmçinin bundan sonra həyata keçiriləcək hər bir hücuma daha güclü cavab veriləcəyini bəyan edib.

Beləliklə, Lark adasına hücum barədə xəbərlərdən sonra ABŞ və İran arasında qarşıdurma yenidən birbaşa hərbi əməliyyatlarla müşayiət olunmağa başlayıb. //Musavat.com

 
Türkiyə Prezidenti Rəcəb Tayyib Ərdoğan 30 Avqust – Zəfər Bayramının 104-cü ildönümü münasibətilə Anıtqəbiri ziyarət edib.

Sumqayit.tv Türkiyə KİV-inə istinadən xəbər verir ki, mrasim dövlət nümayəndə heyətinin Aslanlı Yolda yürüşü ilə başlayıb. Ərdoğan Mustafa Kamal Atatürkün məzarı önünə əklil qoyub, bir dəqiqəlik sükut elan olunub və İstiqlal Marşı səsləndirilib.

Daha sonra prezident Anıtqəbirin Xatirə Kitabını imzalayıb.

Ərdoğan müraciətində Böyük Zəfərin əhəmiyyətindən danışaraq Türkiyənin milli iradəsinə və gələcəyinə qətiyyətlə sahib çıxdığını bildirib.

O, həmçinin ölkəni və regionu hədəf alan “mənfur planlara” imkan verilməyəcəyini vurğulayıb.

“Ruhun şad olsun!” – deyə Ərdoğan Xatirə Kitabındakı müraciətini yekunlaşdırıb.

30 avqust Türkiyədə Zəfər Bayramı kimi qeyd olunur. Bu tarix 1922-ci ildə Mustafa Kamal Atatürkün rəhbərliyi ilə Türk ordusunun Böyük Taarruz və Başkomandanlıq Meydan Müharibəsində qazandığı qələbəni simvolizə edir.

26 avqust 1922-ci ildə başlayan Böyük Taarruz 30 avqustda Dumlupınarda qazanılan həlledici qələbə ilə nəticələndi. Bu zəfər Türkiyənin İstiqlal mübarizəsində mühüm dönüş nöqtəsi oldu.

Qələbədən sonra Türk ordusu irəliləyişini davam etdirərək 9 sentyabr 1922-ci ildə İzmirə daxil oldu. 30 avqust isə sonrakı illərdə Zəfər Bayramı kimi qeyd olunmağa başladı.

Bu gün Türkiyənin müxtəlif şəhərlərində və Şimali Kipr Türk Cümhuriyyətində rəsmi tədbirlərlə qeyd edilir.

Azərbaycanın mədəniyyət paytaxtı Şuşanın və Qarabağ şəhidlərinin əziz xatirəsinin simvollarından olan Xarıbülbül Türkiyənin İğdır şəhərində keçirilən sərgidə el sənətləri vasitəsilə təqdim olunub.

Sumqayit.tv xəbər verir ki, “Vətən sevgisinin çiçəyi İğdırın qəlbində” mövzusunda təşkil olunan sərgidə Xarıbülbül motivi ilə hazırlanmış müxtəlif əl işləri nümayiş etdirilib.

Çanta, broş, boyunbağı, milli geyim, folklor kuklaları və tabloların yer aldığı sərgi ziyarətçilərin böyük marağına səbəb olub.

Layihənin əsas məqsədi Azərbaycan-Türkiyə qardaşlığını mədəni bağlarla daha da gücləndirmək və Qarabağ Zəfərinin simvollarından olan Xarıbülbülün mənasını gələcək nəsillərə çatdırmaqdır.

Argentina futbolunun əfsanəsi Lionel Messi, həyat yoldaşı Antonela Roccuzzo və yaxınları onun atası Xorxe Messiyə son vidalarını ediblər.

Sumqayit.tv xarici KİV-ə istinadən xəbər verir ki, vida mərasimi Rosario şəhərində yerləşən El Prado qəbiristanlığında keçirilib. Mərasimdə Messi və ailə üzvləri iştirak ediblər.

Mərasim başa çatdıqdan sonra Lionel Messi və ailəsi gücləndirilmiş təhlükəsizlik tədbirləri altında qəbiristanlığı tərk edib.

Qeyd: Xorxe Messi 68 yaşında vəfat edib.

Tacikistanda dini ekstremizmlə əlaqələndirilən saqqalın saxlanılması, qara hicab və ərəb üslubunda geyimlərin istifadəsinə qarşı tətbiq edilən qadağaya nəzarət gücləndirilib.

Sumqayit.tv Oxu.az-a istinadən xəbər ki,hökumət bu addımı dini radikalizm və ekstremizmə qarşı mübarizə, eləcə də milli kimliyin qorunması məqsədilə atıb. Hüquq-mühafizə orqanları qadağalara əməl olunmasına nəzarəti artırıb, əhali arasında isə maarifləndirmə tədbirləri davam etdirilir.

Rəsmi qurumların açıqlamasına görə, "Tacik mədəniyyətinə yad" hesab edilən geyimlərin ölkəyə gətirilməsi və istifadəsi qadağandır. Yerli hakimiyyət nümayəndələri qadınları ənənəvi tacik geyimlərinə üstünlük verməyə çağırır, saqqal saxlayan kişilərə isə onu qırxmaları tövsiyə olunur.

Mənbə: Oxu.Az 

ABŞ Prezidenti Donald Trampın sosial şəbəkədə etdiyi son paylaşım 2028-ci il prezident seçkiləri ilə bağlı müzakirələrə səbəb olub.

Sumqayit.tv  xəbər verir ki, Tramp özünün "Truth Social" platformasında üzərində "Trump 2028" yazılmış kepkanın əks olunduğu görüntü paylaşıb.

Fotoda ABŞ bayrağı, raket və sabiq prezident Co Baydenin çıxışının göstərildiyi televiziya ekranı da yer alıb.

Qeyd edək ki, Donald Tramp bundan əvvəl Ağ Ev Müxbirləri Assosiasiyasının şam yeməyində prezident seçkilərində "dördüncü qələbəsi" ilə bağlı zarafat etmişdi.

ABŞ mediası daha əvvəl Trampın 2028-ci il prezident seçkilərində öz varisi kimi vitse-prezident Cey Di Vensi dəstəklədiyini yazmışdı.

ABŞ Prezidenti Donald Tramp siyasi fəaliyyətini başa vurduqdan sonra ölkə mediasının ciddi problemlərlə üzləşəcəyini iddia edib.

Sumqayit.tv Oxu.Az-a istinadən xəbər verir ki, Tramp bu fikirləri Ağ Evdə akkreditasiyadan keçmiş Müxbirlər Assosiasiyasının təşkil etdiyi qəbul zamanı səsləndirib.

ABŞ liderinin sözlərinə görə, o siyasətdən getdikdən sonra bir çox media orqanı maraqlı mövzu və ya şəxs tapa bilməyəcək.

"Mən vəzifədən getdikdə hamınız iflas edəcəksiniz. Sizin biznes modeliniz tamamilə çökəcək. Mən mətbuatın gündəmindən düşəndə haqqında yazmağa adam tapmayacaqsınız", – deyə Tramp bildirib.

O, həmçinin ABŞ mediasının onun haqqında daha çox mənfi məzmunlu xəbərlər yayımladığını iddia edib.

Donald Tramp çıxışı zamanı şəxsi telefon nömrəsini media nümayəndələri ilə paylaşdığı üçün peşman olduğunu da bildirib. Onun sözlərinə görə, jurnalistlər indi ona təxminən hər 3,7 dəqiqədən bir zəng edirlər.

Tramp qeyd edib ki, bu addımı daşınmaz əmlak sahəsində işlədiyi dövrdə jurnalistlərlə sıx əlaqəyə alışdığı üçün atıb, lakin prezident olduqdan sonra bunun düzgün qərar olmadığını anladığını vurğulayıb.