Hərbi - Sumqayit.TV

Hesabat: Azərbaycan Ordusu 5 beynəlxalq sülhməramlı missiyada iştirak edib

Admin — Thu, 02 Jul 2026 18:20:20 +0400

Azərbaycan Ordusunun indiyədək iştirak etdiyi beş beynəlxalq sülhməramlı əməliyyatın detalları açıqlanıb.

Sumqayit.tv xəbər verir ki, bu barədə Beynəlxalq Münasibətlərin Təhlili Mərkəzi və Müdafiə Nazirliyinin birgə hazırladığı "Azərbaycan Ordusunun sülhməramlı əməliyyatlarına dair hesabat"da bildirilib.

Hesabata əsasən, Azərbaycan sülhməramlıları beş missiyanın üçündə Türkiyə, birində ABŞ, digərində isə BMT sülhməramlı qüvvələri ilə birgə xidmət aparıblar. Qeyd olunub ki, bu əməkdaşlıq hərbçilərin peşəkarlığının artırılmasına, ikitərəfli hərbi əlaqələrin möhkəmlənməsinə və Azərbaycanın beynəlxalq nüfuzunun yüksəlməsinə mühüm töhfə verib.

Sənəddə vurğulanır ki, Azərbaycanın sülhməramlı fəaliyyəti BMT, NATO və digər beynəlxalq tərəfdaşlarla əməkdaşlığı yeni mərhələyə daşıyıb, ölkənin etibarlı tərəfdaş kimi tanınmasını gücləndirib.

Hesabatda həmçinin qeyd edilir ki, Azərbaycan hərbçiləri Kosovo, İraq, Əfqanıstan və Cənubi Sudandakı sülhməramlı missiyalarda uğurla xidmət göstərib. Bildirilib ki, bu təcrübə 44 günlük Vətən müharibəsində də Ordunun döyüş qabiliyyətinin və peşəkarlığının artırılmasında mühüm rol oynayıb.

NATO-da ABŞ-ın Almaniyadakı hərbi mövcudluğunun azaldılması müzakirə olunmur

Admin — Fri, 01 May 2026 10:21:14 +0400

NATO üzv ölkələri Almaniyadakı Amerika hərbi mövcudluğunun azaldılması imkanlarını müzakirə etmir. Musavat.com xəbər verir ki, Britaniyanın "The Daily Telegraph" qəzeti bu barədə alyans daxilindəki mənbələrə istinadən məlumat yayıb.

Aprelin 29-da ABŞ Prezidenti Donald Tramp Vaşinqtonun Almaniyada yerləşən hərbi kontingentin azaldılmasını nəzərdən keçirdiyini açıqlayıb. "The Daily Telegraph" qəzetinin məlumatına görə, Amerika prezidenti bu açıqlamanı Almaniya kansleri Fridrix Merzin İranın danışıqlar taktikası ilə ABŞ-ı alçaltdığına dair şərhlərinə cavab olaraq verib.

Qəzetin məlumatına görə, NATO-nun əsas siyasi qərar qəbuletmə orqanı olan Şimali Atlantika Şurası Almaniyadakı Amerika kontingentinin azaldılması ilə bağlı heç bir müzakirə aparmayıb. Nə Berlin, nə də Vaşinqton belə bir inkişaf siqnalı verməyib.

Eyni zamanda qəzetin mənbələri bildirib ki, qoşunların qismən geri çəkilməsi halında ABŞ onları Qrenlandiya, Rumıniya, Polşa və ya Yaxın Şərq ölkələrinə yönləndirə bilər.

İran raket taktikasını DƏYİŞDİ: Yeraltı bazalarda təhlükəli əməliyyat - FOTOLAR

Admin — Fri, 24 Apr 2026 15:36:35 +0400

Müharibə zamanı İranın raket bölmələri maye yanacaqlı raketləri birbaşa yeraltı bazaların daxilində doldurmağa başlayıblar.

Sumqayit.tv İran telegram kanallarına istinadən xəbər verir ki, bu addım çöldə saatlarla davam edən yanacaqdoldurma prosesindən yayınmaq məqsədilə atılıb.

Raketlərin şaquli deyil, üfüqi vəziyyətdə yanacaqla təmin edilməsi yüksək hazırlıq səviyyəsi tələb edən son dərəcə təhlükəli və dəqiq əməliyyat hesab olunur. Peşəkar hazırlığa rəğmən, bu üsul zamanı partlayış riski kifayət qədər yüksək olaraq qalır.

Bu yeni yanaşma raket heyətlərinə qısa müddətdə buraxılış həyata keçirməyə və dərhal sığınacaqlara qayıtmağa imkan yaradıb. Nəticədə, start qurğularını mümkün məhv edilmə təhlükəsindən qorumaq mümkün olub. /Musavat.com

Müdafiə Nazirliyində növbəti rüşvət QALMAQALI

Admin — Thu, 23 Apr 2026 16:17:11 +0400

Bakı Hərbi Məhkəməsində hakim Anar Rzayevin sədrliyi Müdafiə Nazirliyinin Mərkəzi hərbi həkim komissiyasının sabiq rəisi Rasim Əlövsət oğlu Həsənovun cinayət işi üzrə məhkəmə prosesi başlayıb. Musavat.com xəbər verir ki, ötən prosesdə təqsirləndirilən şəxsin anket məlumatları dəqiqləşdirilib. Daha sonra təqsirləndirilən şəxsin vəkili Sabir Abdinov vəsatət verib.

O, bildirib ki, müvəkkilinin 4500 manat rüşvət almaqdan ittiham olunduğu hissə ümumi ittihamdan xaric olunmalıdır. Rasim Həsənov həmin vaxt Müdafiə Nazirliyinin Mərkəzi hərbi həkim komissiyasının nə rəisi, nə də komissiyanın üzvü olub. Həmçinin müvəkkilinin himayəsində azyaşlı övladı olduğunu, bu səbəbdən onun ev dustaqlığına buraxılmasını xahiş edib. Dövlət ittihamçısı ev dustaqlığı vəsatətinin təmin edilməməsini, digər vəsatətin isə məhkəmə baxış iclasında baxılmalı olduğunu deyib. Məhkəmə ev dustaqlığı vəsatəti təmin etməyib.

Qeyd edək ki, Rasim Həsənovun Müdafiə Nazirliyinin Mərkəzi hərbi həkim komissiyasının rəisi vəzifələrində işlədiyi dövrdə vətəndaşlardan müxtəlif məbləğlərdə rüşvət alması və digər qanunsuz əməllərə yol verməsi barədə Baş prokuror yanında Korrupsiyaya qarşı Mübarizə Baş İdarəsində başlanmış cinayət işinin istintaqı yekunlaşdırılıb. İbtidai istintaqla Rasim Həsənovun 2021-2025-ci illərdə sözügedən vəzifələrdə işləyərkən vəzifə səlahiyyətlərindən sui-istifadə etməklə ona müraciət etmiş hərbi qulluqçuların şəhadətləndirilərək tərxis olunmaları üçün ayrı-ayrı şəxslərdən müxtəlif məbləğlərdə pul vəsaitini rüşvət qismində təkrarən almasına və vəzifə saxtakarlığı törətməsinə əsaslı şübhələr müəyyən edilib. Toplanmış sübutlar əsasında Rasim Həsənova Cinayət Məcəlləsinin 311.3.2, 311.3.3 (təkrarən külli miqdarda rüşvət alma), 313 (vəzifə saxtakarlığı) və 341.2.3-cü (ağır nəticələrə səbəb olan vəzifə səlahiyyətlərindən sui-istifadə etmə) maddələri ilə ittiham elan edilməklə barəsində istintaq orqanının vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmənin qərarı ilə həbs qətimkan tədbiri seçilib. /Musavat.com

Polad Həşimovun Aprel döyüşlərindəki FOTOSU

Admin — Thu, 02 Apr 2026 13:16:22 +0400

Polad Həşimovun Aprel döyüşləri zamanı cəbhədə çəkilən şəklini həyat yoldaşı Ofelya Salmanova paylaşıb.
2016-cı il aprelin 1-dən 2-nə keçən gecədən etibarən Azərbaycan və Ermənistan Silahlı Qüvvələrinin bölmələri arasında cəbhənin Tərtər və Cəbrayıl-Füzuli istiqamətlərində şiddətli döyüşlər başladı. Tarixə Aprel döyüşləri kimi düşən bu hərbi əməliyyatlar zamanı Polad Həşimov 1-ci Ordu Korpusu komandirinin müavini, qərargah rəisi vəzifəsində xidmət edirdi.

Cəbhənin Tərtər istiqamətində gedən döyüşlərin idarə olunması məhz ona həvalə olunmuşdu. Gecə döyüşləri zamanı Tərtər rayonunun Talış istiqamətində yerləşən əlverişli mövqelər, strateji nöqtələr, o cümlədən Talış yüksəkliyi Azərbaycan Ordusu tərəfindən işğaldan azad edildi.

Polkovnik Polad Həşimov Azərbaycanın ərazi bütövlüyünün qorunmasında göstərdiyi xüsusi xidmətlərə və Silahlı Qüvvələr qarşısında qoyulmuş tapşırıqları yerinə yetirərkən fərqləndiyinə görə Prezident İlham Əliyev tərəfindən 2-ci dərəcəli "Vətənə xidmətə görə" ordeni ilə təltif olunur.

Aprel döyüşləri zamanı Tərtər istiqamətində gedən döyüşlərin uğurlu idarə edilməsinə görə Polad Həşimova mənzil hədiyyə edilib. Lakin kirayədə yaşamasına baxmayaraq, o, həmin mənzili Aprel döyüşlərində şəhid olan hərbçinin ailəsinə bağışlayır.

Qeyd edək ki, Polad Həşimov 2020-ci ildə Tovuz döyüşləri zamanı şəhid olub. O, ölümündən sonra Azərbaycanın Milli Qəhrəmanı adına layiq görülüb./Milli.Az

Bir nömrəli səfərbərlik nədir? - Müdafiə Nazirliyi AÇIQLADI

Admin — Fri, 06 Mar 2026 10:47:05 +0400

Müdafiə Nazirliyi "Bir nömrəli hərbi səfərbərlik" termininin nə mənaya gəldiyini açıqlayıb.

Sumqayit.tv bu barədə nazirliyə istinadla xəbər verir.

Qeyd edilib ki, "Bir nömrəli hərbi səfərbərlik" zamanı Silahlı Qüvvələr tam döyüş hazırlığına gətirilir və ehtiyatda olan hərbi qulluqçuların çağırılması həyata keçirilir. Həmçinin hərbi hissələr döyüş mövqelərinə yaxud təyin olunmuş ərazilərə çıxarılır.

Sumqayıtda hərbi qulluqçuya verilən ev niyə geri alınır?

Admin — Wed, 07 Jan 2026 17:43:51 +0400

Sumqayıtda ehtiyatda olan mayorun yaşadığı mənzillə bağlı hüquqi mübahisə yaranıb. Belə ki, o, uzun illər yaşadığı mənzildən çıxarılır. Hazırda məsələ məhkəmədədir.

Sumqayit.tv xəbəe verir ki, Demokrat.az-a daxil olan şikayətə əsasən, ehtiyatda olan mayor Nazim Mustafayevə 1991-ci ildə Müdafiə Nazirliyinin mənzil fondundan Sumqayıt şəhərində ikiotaqlı mənzil verilib. 2009-cu ildə ailə üzvlərinin sayının çox olması ilə əlaqədar Nazim Mustafayev rəsmi qaydada müraciət edərək mövcud mənzilin ailəsi üçün kifayət etmədiyini bildirib. Müraciət nəzərə alınaraq ona ikiotaqlı mənzil əvəzinə üçotaqlı mənzil təqdim edilib. Hazırda o, Sumqayıt şəhəri, H.Z.Tağıyev qəsəbəsi, F. Qayıbov küçəsi, ev 29 ünvanında yaşayır. Qeyd olunan mənzil ona kirayə müqaviləsi əsasında verilib.

Nazim Mustafayev 2002-ci il iyulun 30-da hərbi xidmətdən azad olunaraq, mayor rütbəsində ehtiyyata buraxılıb. Hazırda ehtiyatda olan mayor kimi dövlət tərəfindən təqaüd alır.

Onun sözlərinə görə, ötən ilin oktyabrın 15-də müvafiq qurumun nümayəndəsi mənzilə gələrək, burada qeyri-qanuni yaşadığını bildirib və evi tərk etməsi tələb olunub.

Məsələ ilə bağlı Sumqayıt Məhkəməsinin qərarı ilə Nazim Mustafayev mülki şəxs kimi tanınıb.

Onun sözlərinə görə, Apellyasiya Məhkəməsinin qərarı absurddur. Belə ki, qərara əsasən, yalnız Nazim Mustafayev mənzildən çıxarılır, ailə üzvlərinin isə mənzildə qalmasına icazə verilir. Hazırda həmin qərar rəsmi şəkildə dərc olunmayıb və tərəf qərarın surətini gözləyir.

Müdafiə Nazirliyinin Mətbuat və İctimaiyyətlə Əlaqələr İdarəsinin rəisi, polkovnik Anar Eyvazov sorğumuza cavab olaraq bildirdi ki, məsələyə dair dəqiq mövqenin açıqlanması üçün ikinci instansiya məhkəməsinin qərarının surəti təqdim olunmalıdır.

Hüquqşünas Rəşad Əliyevin sözlərinə görə, bu halın qanunvericiliyə uyğunluğu Azərbaycan Respublikasının Mənzil Məcəlləsi və “Hərbi qulluqçuların statusu haqqında” Qanun prizmasından qiymətləndirilməlidir:

“Azərbaycan Respublikası Konstitusiyasına əsasən mülkiyyət hüququ toxunulmazdır və heç kəs məhkəmə qərarı olmadan əmlakından məhrum edilə bilməz. Dövlət tərəfindən verilmiş mənzil də, əgər qanuni əsasla şəxsin mülkiyyətinə keçmişdirsə, bu hüquqi qoruma altındadır. Dövlət orqanı həmin əmlakı özbaşına geri ala bilməz. Azərbaycan Respublikasının Mənzil Məcəlləsinə görə, yaşayış sahəsinin alınması yalnız qanunla müəyyən edilmiş hallarda mümkündür. Bu hallar əsasən, mənzilin qanunsuz əldə edilməsi, sənədlərin saxtalaşdırılması, mülkiyyət hüququnun qanun pozuntusu ilə rəsmiləşdirilməsi və ya ictimai ehtiyaclar üçün məhkəmə qərarı əsasında özgəninkiləşdirməkdir. Qanuni əsaslar olmadan dövlətin verdiyi evi geri alması yolverilməzdir. Məsələyə xüsusi yanaşma “Hərbi qulluqçuların statusu haqqında” Qanun çərçivəsində tələb olunur. Əgər 1991-ci ildə verilmiş ev xidmət mənzili statusunda olubsa, bu halda hərbi qulluqçu ehtiyata və ya istefaya buraxıldıqdan, yaxud dövlət tərəfindən başqa yaşayış sahəsi ilə təmin edildikdən sonra həmin mənzili boşaltmaq öhdəliyi yarana bilər”.

O deyib ki, bu halda evin geri alınması hüquqi baxımdan əsaslı sayılır:

“Lakin əgər həmin ev müvafiq qərar əsasında şəxsin mülkiyyətinə verilmiş, çıxarış və ya digər hüquqtəsdiqedici sənədlərlə rəsmiləşdirilmişdirsə, bu zaman dövlətin evi geri tələb etməsi yalnız məhkəmə qaydasında və ciddi hüquqi əsaslar olduqda mümkündür. Sadəcə inzibati qərar və ya idarəetmə aktı ilə mülkiyyət hüququ ləğv edilə bilməz.

Xüsusilə nəzərə alınmalıdır ki, 1991-ci il sovet dövründən keçid mərhələsinə təsadüf etdiyindən, həmin dövrdə verilmiş mənzillərin hüquqi statusu verilmə qərarının məzmunundan, təyinatından və sonradan özəlləşdirilib-özəlləşdirilməməsindən asılı olaraq qiymətləndirilməlidir. Əgər ev sonradan özəlləşdirilibsə və ya mülkiyyət hüququ tanınıbsa, geri alınma faktiki olaraq qanunsuz hesab edilə bilər”.

Rusiya-Ukrayna müharibəsində Sumqayıtlı itkin düşüb - FOTO

Admin — Sat, 20 Dec 2025 15:20:25 +0400

Rusiya-Ukrayna münaqişəsində bir azərbaycanlı həlak olub, ikisi isə itkin düşüb.

Sumqayit.tv xəbər verir ki, bu barədə sosial şəbəkədə məlumat yayılıb.

Məlumata görə, Cəlilabad rayon sakini Elnur Aydın oğlu Mirismayılzadə Rusiya-Ukrayna münaqişəsində həlak olub, Sumqayıt şəhər sakini Bəhlul Zülfüqar oğlu Abbasov və Lənkəran rayonu Xanbulan kənd sakini Anar Nurməmməd oğlu Cabbarov isə itkin düşüblər. Oxu.az

Fotoda Bəhlul Zülfüqar oğlu Abbasov:

Sumqayıtda hündürlükdən yıxılan qız ölüb

Admin — Fri, 19 Dec 2025 19:13:40 +0400

Sumqayıt şəhərində hündürlükdən yıxılan qız ölüb.

Sumqayit.tv "Report"a istinadən xəbər verir ki, hadisə şəhərin 16-cı məhəlləsində qeydə alınıb.

Binadan yıxılan 2008-ci il təvəllüdlü Fatimə Əmir qızı Qurbanzadə hadisə yerində həyatını itirib.

Faktla bağlı araşdırma aparılır.

Azərbaycan və Türkiyə arasında TARİXİ ANLAŞMA parlamentdə

Admin — Tue, 16 Dec 2025 12:45:25 +0400

Milli Məclisin iclasında “Azərbaycan Respublikasının Müdafiə Nazirliyi ilə Türkiyə Respublikasının Milli Müdafiə Nazirliyi arasında qarşılıqlı hərbi təhlükəsizliyin möhkəmləndirilməsinə dair Anlaşma Memorandumu”nun təsdiq edilməsi haqqında Azərbaycan Respublikasının qanun layihəsi müzakirəyə çıxarılıb.

Musavat.com xəbər verir ki, Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev layihə barədə məlumat verib.

Bildirib ki, layihə Milli Məclisə cənab Prezidentin imzası ilə daxil olub:

“”Anlaşma emorandumu” 22 iyul 2025-ci il tarixində İstanbul şəhərində, Azərbaycan Respublikasının müdafiə naziri və Türkiyə Respublikasının milli müdafiə naziri tərəfindən imzalanıb, məqsədi qarşılıqlı olaraq tərəflərin dövlətlərinin təhlükəsizliyinin və ərazi bütövlüyünün təmin olunması, habelə suverenliyinin və müstəqilliyinin qorunması üçün tərəflər arasında müdafiə sahəsində əməkdaşlığın gücləndirilməsidir. Sənəd Azərbaycan–Türkiyə strateji müttəfiqliyinin, o cümlədən Şuşa Bəyannaməsində təsbit olunmuş müdafiə və təhlükəsizlik sahəsində əməkdaşlığın dərinləşdirilməsinə xidmət edir Memorandumun məqsədi hərbi təhlükəsizlik sahəsində qarşılıqlı koordinasiyanın gücləndirilməsi, birgə təlimlərin, hərbi təhsilin və müdafiə sənayesi üzrə əməkdaşlığın inkişaf etdirilməsidir”.

A.Nağıyev deyib ki, sənəd 8 maddədən ibarətdir:

“Razılığa əsasən, tərəf dövlətlər birinin silahlı təcavüzə məruz qaldığı halda BMT Nizamnaməsinin 51-ci maddəsi ilə tanınan fərdi və birgə özünümüdafiə hüquqlarının həyata keçirilməsi üçün bir-birlərinə qarşılıqlı yardımın göstərilməsi öhdəliyini götürürlər. Tərəflərin bir-birlərinə hərbi yardım göstərməsi onlardan birinin sorğusu əsasında və buna dair milli qanunvericiliklərində müəyyən edilmiş qaydaya uyğun olaraq həyata keçirilir. Tərəflər dinc dövrdə yuxarıda qeyd edildiyi kimi mütəmadi olaraq birgə hərbi təlimlər və manevrlər keçirirlər. Memorandum yalnız hərbi əməkdaşlıq və hərbi təhlükəsizlik sahəsindəki məsələləri əhatə edir və bu çərçivədə yalnız müdafiə sahəsində qarşılıqlı yardım, təlim, təchizat və tərəflərin birlikdə fəaliyyət qabiliyyətinin artırılmasını ehtiva edir.

Tərəflər, öz milli qanunvericiliklərinə uyğun olaraq, hərbi sahədə məlumat mübadiləsini və hərbi kəşfiyyat əməkdaşlığını gücləndirirlər, buna müvafiq olaraq, hərbi təhlükəsizlik sahəsində əldə olunan məlumatları (məxfi, tam məxfi, xüsusi əhəmiyyətli) bir-birləri ilə paylaşa və bu məlumatlardan birgə əməliyyatlar zamanı istifadə edə bilərlər.

Tərəflər arasında bu Memorandumun təfsiri və ya həyata keçirilməsi ilə bağlı yaranan fikir ayrılıqları yalnız tərəflər arasında keçiriləcək danışıqlar və məsləhətləşmələr yolu ilə həll edilir”.

Komitə sədri əlavə edib ki, Anlaşma Memorandumuna tərəflərin qarşılıqlı yazılı razılığına əsasən, istənilən zaman düzəliş və ya əlavələr edilə bilər:

“Tərəflərdən hər biri digər tərəfə ləğvetmə niyyətini diplomatik kanallar vasitəsilə yazılı şəkildə bildirərək Memorandumu ləğv edə bilər. Bu halda Memorandum həmin bildirişin alındığı tarixdən 60 gün sonra ləğv edilir. Anlaşma Memorandumu beynəlxalq hüququn norma və prinsiplərinə uyğun olaraq həyata keçirilir, üçüncü dövlətlərə qarşı yönəlmir və regionda sülh və təhlükəsizliyin möhkəmləndirilməsinə töhfə verir. Layihə Müdafiə, təhlükəsizlik və korrupsiya ilə mübarizə komitəsində müzakirə olunmuş və plenar iclasa tövsiyə edilib”.

Deputatlar Hikmət Babaoğlu, Sahib Alıyev, Bəhruz Məhərrəmov və digər deputatlar çıxış etdikdən sonra sənəd təsdiqlənib. /Musavat.com