Sumqayıtın tanınmış qrossmeysteri Şəhriyar Məmmədyarov yeni FIDE reytinqində mövqeyini dəyişməyib.

Sumqayit.tv İdman.biz-ə istinadən xəbər verir ki, Beynəlxalq Şahmat Federasiyasının (FIDE) sentyabrın 1-nə olan reytinqi açıqlanıb.

Məmmədyarov əvvəlki göstəricisi ilə müqayisədə 3 ELO xalı itirib. Buna baxmayaraq, 2720 xalla dünya reytinqində 22-ci pillədə qalıb.

Azərbaycan isə kişi şahmatçılarının ölkə reytinqində bir pillə geriləyərək 2627 xalla 7-ci yerdə qərarlaşıb.

Qadın şahmatçıların ölkə reytinqində isə Azərbaycan 2296 xalla 11-ci pillədəki mövqeyini qoruyub.

 
“Sumqayıt” Premyer Liqanın III turunda doğma meydanda “Qarabağ”a 0:1 hesabı ilə məğlub olub.

Sumqayit.tv xəbər verir ki, oyundan sonra “Sumqayıt”ın baş məşqçisi Filipe Kandido nəticədən narazı qaldığını, lakin komandanın oyun planında irəliləyiş gördüyünü bildirib. O, mövsüm ərzində daha yaxşı komanda quracaqlarına inandığını deyib.

“Qarabağ”ın baş məşqçisi Qurban Qurbanov isə azlıqda qalmasına baxmayaraq komandasının vacib 3 xal qazandığını vurğulayıb. O, Kadi Borqesin qırmızı vərəqə aldığı epizodda futbolçunun emosiyalarına nəzarət edə bilmədiyini qeyd edib.

Azərbaycan Premyer Liqasında III turun son oyunu bu gün Sumqayıtda keçiriləcək.

Sumqayit.tv xəbər verir ki, “Sumqayıt” FK doğma meydanda “Qarabağ” FK-nı qəbul edəcək.

SOCAR Polymer Arenada baş tutacaq qarşılaşma saat 20:15-də başlayacaq.

Futbolsevərlər üçün maraqlı görüşlərdən biri olacaq matçda komandalar turun son oyununda qələbə uğrunda mübarizə aparacaqlar.

36 yaşlı Emin Mustafayev milli komandada baş məşqçi vəzifəsinə təyin edilib.

Sumqayit.tv xəbər verir ki, sumqayıtlı mütəxəssis futbolçu karyerası ərzində Azərbaycanın U-17, U-19 və U-21 milli komandalarında çıxış edib və həmin komandalarda kapitan sarğısını daşıyıb.

Emin Mustafayev klub karyerasında “Qarabağ”, “Sumqayıt”, “Rəvan” və Türkiyənin “Karsspor” komandalarının formasını geyinib.

O, məşqçilik fəaliyyətinə 2018-ci ildə “Neftçi”də başlayıb. E.Mustafayev burada U-14-dən U-19-a qədər müxtəlif yaş qruplarında məşqçi kimi çalışıb.
Bundan əlavə, Emin Mustafayev Azərbaycanın U-15, U-16 və U-17 milli komandalarında köməkçi məşqçi vəzifəsində fəaliyyət göstərib.

Yeni baş məşqçinin zəngin futbolçu və məşqçilik təcrübəsi ilə milli komandaya töhfə verməsi gözlənilir. Eminə uğurlar arzulayırıq

“Sumqayıt” FK-nın futbolçusu Səbuhi Abdullazadəyə AFFA İntizam Komitəsi tərəfindən 5 oyunluq cəza verilib.

Sumqayıt.tv xəbər verir ki, qərar Misli Premyer Liqasının I turunda keçirilən “Sumqayıt” – “Neftçi” qarşılaşmasında baş verən hadisə ilə bağlı qəbul olunub.

Birbaşa qırmızı vərəqə alan Səbuhi Abdullazadə meydanı tərk edərkən aqressiv davranış nümayiş etdirib. Futbolçunun stadionun qapısına zərər vurduğu, qırılan şüşə nəticəsində isə xəsarət aldığı bildirilir.

AFFA İntizam Komitəsi futbolçunu təcavüzkar davranışa görə 5 oyunluq cəzalandırıb. Hadisəyə görə “Sumqayıt” FK da 3 min manat məbləğində cərimələnib.

Qeyd edək ki, həmin qarşılaşmada 4 futbolçusu sarı vərəqə alan “Neftçi” də 700 manat cərimələnib.

“Sumqayıt” futbol klubunun ev oyunlarını keçirdiyi Mehdi Hüseynzadə adına stadionun ot örtüyündə yaranan problem komandanın ilk turdakı matçının başqa arenaya keçirilməsinə səbəb olub.

Belə ki, Misli Premyer Liqasının I turunda “Sumqayıt” – “Neftçi” qarşılaşması ot örtüyündə aparılan yenilənmə işləri ilə əlaqədar “SOCAR Polymer Arena”da keçirilib.

İndi isə əsas sual “Mehdi Hüseynzadə” stadionundakı meydançanın növbəti turlara qədər hazır olub-olmayacağıdır. Problem qısa müddətdə həll edilməsə, “Sumqayıt”ın III turda “Qarabağ”la qarşılaşmasını da “SOCAR Polymer Arena”da keçirməsi gündəmə gələ bilər.

Məsələ burasındadır ki, “SOCAR Polymer Arena”nın da qarşıdakı dövrdə oyun yükünün artması gözlənilir. “Şəfa”nın III turda “İmişli”ni məhz bu arenada qəbul edəcəyi bildirilir. Bundan başqa, “Şəfa”nın mövsümün sonuna qədər ev oyunlarını “SOCAR Polymer Arena”da keçirmək üçün müqavilə bağladığı qeyd olunur.

Bu isə meydançanın üzərinə düşən yükün artması ehtimalını yaradır. Əgər “Mehdi Hüseynzadə” stadionunun qazonundakı problem yaxın günlərdə aradan qaldırılmasa, “SOCAR Polymer Arena”nın ot örtüyünün də intensiv istifadə nəticəsində sıradan çıxması ilə bağlı suallar yarana bilər.

Qeyd edək ki, “Sumqayıt” klubunun rəsmi məlumatında da “Neftçi” ilə qarşılaşmanın Mehdi Hüseynzadə adına stadionun ot örtüyündə aparılan yenilənmə işlərinə görə “SOCAR Polymer Arena”da keçirildiyi təsdiqlənib.

Mənbə: Rekord.az

 “Sumqayıt” – “Neftçi” matçını 1 350 azarkeş izləyib

Misli Premyer Liqasının 2026/27 mövsümünün ilk turunda stadionlara ümumilikdə 9 597 futbolsevər gəlib.

“Sumqayıt” – “Neftçi” qarşılaşmasını isə 1 350 azarkeş tribunadan izləyib. Turun ən çox azarkeş toplayan oyunu “Turan Tovuz” – “Qəbələ” matçı olub — 4 800 tamaşaçı.

Premyer Liqanın II turuna avqustun 22-də start veriləcək.

2026/27 mövsümü üçün heyətini gücləndirən “Sumqayıt” daha bir futbolçu ilə müqavilə imzalayıb.

Sumqayit.tv xəbər verir ki, klub Portuqaliyanın “Şaves” komandasının sabiq cinah müdafiəçisi Tiaqo Almeyda ilə 1 illik müqavilə bağlayıb.

24 yaşlı portuqaliyalı futbolçu yeni komandasında 21 nömrəli forma ilə çıxış edəcək.

Qeyd edək ki, “Sumqayıt” bu yay Emil Mustafayev, Jeyms Almeyda, Jan Oliveyra, Lukas Blaki və Renan Santana ilə də müqavilə imzalayıb.

Azərbaycan millisinin qapıçısı Şahruddin Məhəmmədəliyev yenidən “Sumqayıt”ın formasını geyinə bilər.

Sumqayit.tv  Sport24.az-a istinadən məlumatına görə, “Sumqayıt” 32 yaşlı qolkiperin xidmətində maraqlıdır və futbolçuya rəsmi təklif göndərib.

Şahruddin Məhəmmədəliyev yekun qərarını hələ verməyib. O, təklifi nəzərdən keçirmək üçün vaxt istəyib.

Qeyd edək ki, milli komandanın qapıçısı 2014-2016-cı illərdə “Sumqayıt”da çıxış edib. “Kimyaçılar”ın mövsümlərarası fasilədə transfer etdiyi braziliyalı qolkiper Ceyms Almeyda aldığı ağır zədə səbəbindən komandadan ayrılıb.

Şahruddinin xidmətində “Zirə”nin də maraqlı olduğu bildirilir.