Azərbaycanda süd və süd məhsulları, eləcə də yumurtanın qiymətində artım qeydə alınıb.

Sumqayıt.tv xəbər verir ki, Dövlət Statistika Komitəsinin məlumatına görə, 2026-cı ilin iyulunda süd və süd məhsulları, yumurtanın qiyməti ötən ilin eyni ayı ilə müqayisədə 10,3 faiz bahalaşıb.

Hesabat dövründə ət və ət məhsullarının qiyməti 7,7 faiz, balıq və balıq məhsullarının qiyməti isə 7,5 faiz artıb.

İyun ayı ilə müqayisədə də süd və süd məhsulları, yumurta 0,8 faiz, ət və ət məhsulları 0,5 faiz bahalaşıb. Balıq və balıq məhsullarında isə 0,1 faiz ucuzlaşma qeydə alınıb.

2026-cı ilin yanvar-iyul aylarında əvvəlki ilin eyni dövrü ilə müqayisədə süd və süd məhsulları, yumurta 10,3 faiz, balıq və balıq məhsulları 8,3 faiz, ət və ət məhsulları isə 8,2 faiz bahalaşıb.

Azərbaycanda iş axtaranlar üçün dövlət qurumlarında yeni vakansiyalar elan edilib.

Sumqayit.tv xəbər verir ki, vakansiyalar arasında 7 nazirlikdə müxtəlif vəzifələr üzrə iş yerləri də var.

Məlumata görə, elan edilən bəzi vəzifələr üzrə əməkhaqqı 3 700 manatdan çoxdur.

Vakansiya elan edən nazirliklər və vakant yerlərin sayı:

• Mədəniyyət Nazirliyi – 1 vəzifə üzrə 1 yer

• Rəqəmsal İnkişaf və Nəqliyyat Nazirliyi – 2 vəzifə üzrə 2 yer

• Əmək və Əhalinin Sosial Müdafiəsi Nazirliyi – 7 vəzifə üzrə 7 yer

• Energetika Nazirliyi – 2 vəzifə üzrə 2 yer

• Ekologiya və Təbii Sərvətlər Nazirliyi – 3 vəzifə üzrə 3 yer

• Gənclər və İdman Nazirliyi – 11 vəzifə üzrə 11 yer

• Müdafiə Sənayesi Nazirliyi – 3 vəzifə üzrə 3 yer

Beləliklə, 7 nazirlik üzrə ümumilikdə 29 vakant yer elan edilib.

Vakansiyalar üzrə tələb və şərtlər vəzifədən asılı olaraq dəyişir.

Mənbə: Valyuta.az

Sumqayıt Sənaye Parkında qida sənayesi üzrə yeni müəssisə fəaliyyətə başlayacaq.

Sumqayit.tv xəbər verir ki, İqtisadi Zonaların İnkişafı Agentliyinin məlumatına görə, “Bimbo QSR Azərbaycan” MMC Sumqayıt Sənaye Parkının rezidenti statusunu alıb.

İnvestisiya dəyəri 27,5 milyon manat olan layihə çərçivəsində burger və hot-doq üçün bulka istehsal ediləcək.

Müəssisənin illik istehsal gücünün 150 milyon ədəd olacağı bildirilir. Layihə çərçivəsində 100-dən çox yeni iş yerinin yaradılması nəzərdə tutulur.

İstehsal zamanı yerli xammaldan istifadə ediləcək. Müəssisədə istehsal olunacaq məhsulların yalnız daxili bazara deyil, region ölkələrinə də ixracı planlaşdırılır.

Qeyd edək ki, Sumqayıt Sənaye Parkında indiyədək ümumi investisiya həcmi 6,8 milyard manatdan çox olan 43 sahibkarlıq subyektinə rezident statusu verilib. Rezidentlər tərəfindən isə 5,6 milyard manatdan artıq investisiya yatırılıb və 6 400-dən çox iş yeri yaradılıb. 

Azərbaycanda fəaliyyət göstərən sənaye parkları arasında Sumqayıt Sənaye Parkı da ölkənin sənaye potensialının əsas mərkəzlərindən biri kimi diqqət çəkir.

Sumqayit.tv xəbər verir ki, avqustun 11-də Prezident İlham Əliyev və birinci xanım Mehriban Əliyeva Naxçıvan Sənaye Parkının təməlqoyma mərasimində iştirak ediblər.

Bununla ölkədə fəaliyyət göstərən sənaye parklarının sayı 8-ə çatıb. Hazırda Sumqayıt, Mingəçevir, Qaradağ, Pirallahı, Ağdam, Haçıqabul, "Araz Vadisi İqtisadi Zonası" və Balaxanı Sənaye Parkları fəaliyyət göstərir.

Məlumata görə, bu sənaye parklarında ümumilikdə 184 rezident qeydiyyata alınıb. Onlardan 101-i artıq fəaliyyət göstərir.

Rezidentlər tərəfindən indiyədək 7,1 milyard manatdan çox investisiya cəlb edilib və 11 500-dən çox iş yeri yaradılıb.

Sənaye parklarında 2026-cı il iyulun 1-dək ümumilikdə 21,4 milyard manatlıq məhsul istehsal olunub. İstehsalın 6,7 milyard manatlıq hissəsi ixrac edilib.

Naxçıvan Sənaye Parkının isə Naxçıvan şəhərinin cənub-qərb hissəsində, Naxçıvan-Sədərək avtomobil yolunun cənubunda 310 hektar ərazidə yaradılması nəzərdə tutulur.

Qeyd edək ki, Sumqayıt Sənaye Parkı ölkənin sənaye parkları sistemində ən mühüm istehsal mərkəzlərindən biri olaraq fəaliyyət göstərir. Parkda müxtəlif sənaye sahələri üzrə çoxsaylı rezident müəssisələr fəaliyyət göstərir və burada yaradılan istehsal imkanları həm daxili bazarın təminatına, həm də ixrac potensialının artırılmasına xidmət edir.

Qlobal ərzaq bazarında qiymət artımı müşahidə olunur. Bu vəziyyət yaxın aylarda Azərbaycanda da bəzi ərzaq məhsullarının bahalaşmasına səbəb ola bilər.

Sumqayit.tv xəbər verir ki, BMT-nin Ərzaq və Kənd Təsərrüfatı Təşkilatının (FAO) açıqladığı hesabata əsasən, qlobal ərzaq qiymətləri indeksi iyul ayında əvvəlki ayla müqayisədə 0,6 faiz artıb.

Qiymət artımına əsasən taxıl, şəkər və bitki yağlarının bahalaşması təsir edib.

Mütəxəssislərin diqqət çəkdiyi əsas məsələlərdən biri isə taxıl ixracı ilə bağlı yaranan narahatlıqlardır. Rusiya-Ukrayna müharibəsi fonunda Qara dəniz regionundan taxıl ixracının təhlükəsizliyi ilə bağlı risklərin artması dünya bazarında qiymətlərə təsir göstərir.

Bundan başqa, Avropada müşahidə olunan güclü istilərin taxıl sahələrinə zərər vurduğu, ABŞ-ın əsas kənd təsərrüfatı bölgələrində davam edən quraqlığın isə qarğıdalı və soya istehsalı üçün risk yaratdığı bildirilir.

Digər tərəfdən, gübrə tədarükündə mümkün fasilələr, enerji qiymətlərinin artması və Yaxın Şərqdəki geosiyasi gərginlik də ərzaq bazarında əlavə təzyiq yaradan amillər sırasında göstərilir.

İqtisadçı Natiq Cəfərli bildirib ki, Azərbaycanın idxaldan asılılığı qlobal qiymət dəyişikliklərinin ölkə daxilində də hiss olunmasına səbəb olur.

Onun sözlərinə görə, gündəlik ərzaq məhsullarının əhəmiyyətli hissəsi xaricdən gətirilir. Qeyri-ərzaq məhsulları üzrə idxaldan asılılıq isə daha yüksəkdir.

Ekspert hesab edir ki, dünya bazarında qiymət artımı davam edərsə, Azərbaycanda da ərzaq və qeyri-ərzaq məhsullarının qiymətlərində yüksəliş müşahidə oluna bilər.

Beləliklə, qarşıdakı aylarda xüsusilə taxıl və taxıl məhsulları, bitki yağları və şəkər kimi məhsulların qiymətlərində dəyişiklik ehtimalı diqqət mərkəzində olacaq.

Mənbə: Bizim.Media

Bu ilin yanvar–iyul aylarında Azərbaycanda vətəndaşlara 122 milyon 83,6 min manat ƏDV geri qaytarılıb.

Sumqayit.tv xəbər verir ki, bu barədə Dövlət Vergi Xidməti məlumat yayıb.

ƏDV geri qaytarılması pərakəndə ticarət, ictimai iaşə, bəzi mədəniyyət və tibbi xidmətlər, eləcə də işğaldan azad edilmiş ərazilərdə hotellərin xidmətləri üzrə həyata keçirilib.

Bundan əlavə, hesabat dövründə xarici vətəndaşlara “Tax Free” sistemi çərçivəsində 5 milyon 248,1 min manat ƏDV geri qaytarılıb.

Sumqayıt Sənaye Parkında xüsusi növ faneraların istehsalı üzrə yeni layihə həyata keçiriləcək.

Sumqayit.tv xəbər verir ki, "Samvud Group" MMC-yə İqtisadiyyat Nazirliyinin tabeliyində fəaliyyət göstərən İqtisadi Zonaların İnkişafı Agentliyinin (İZİA) idarəçiliyin verilib.

İZİA-nın yaydığı məlumata görə, 8,2 milyon manat investisiya dəyərinə malik layihə çərçivəsində xüsusi növ faneraların istehsalı təşkil olunacaq.

Layihənin icrası nəticəsində 100-dən çox yeni iş yerinin yaradılması nəzərdə tutulur.

Qeyd edək ki, Sumqayıt Sənaye Parkı ölkənin qeyri-neft sənayesinin inkişafında mühüm rol oynayan sənaye zonalarından biridir və burada müxtəlif sahələr üzrə istehsal layihələri həyata keçirilir.

Sumqayıt Sənaye Parkının rezidentləri sırasına yeni şirkət qoşulub.

Sumqayit.tv xəbər verir ki, “RAM Industries” MMC-yə İqtisadi Zonaların İnkişafı Agentliyinin idarəçiliyində olan Sumqayıt Sənaye Parkının rezident statusu verilib.

Şirkət tərəfindən həyata keçiriləcək layihə çərçivəsində xüsusi texnika və nəqliyyat vasitələrinin istehsalı və yığımı nəzərdə tutulur.

Məlumata görə, layihənin ümumi investisiya dəyəri 44,9 milyon manat təşkil edir. Yeni istehsal sahəsinin yaradılması nəticəsində 200-dən çox daimi iş yerinin açılması planlaşdırılır.

Qeyd edək ki, Sumqayıt Sənaye Parkında yeni istehsal müəssisələrinin yaradılması şəhərin sənaye potensialının artırılmasına və məşğulluğun genişlənməsinə töhfə verir.

Bu ilin 1 iyul tarixinə Azərbaycanın daxili dövlət borcu 15 milyard 982 milyon manat təşkil edib.

Sumqayit.tv xəbər verir ki, bu barədə Maliyyə Nazirliyinin "2026-cı ilin I yarımili üzrə dövlət borcu və dövlət zəmanətli borca dair Statistik Bülleten"ində bildirilib.

Məlumata görə, daxili dövlət borcu ilin əvvəli ilə müqayisədə 1 milyard 822,5 milyon manat və ya 10,2 faiz azalıb. Hazırda bu göstərici ölkənin proqnozlaşdırılan ümumi daxili məhsulunun (ÜDM) 12,2 faizinə bərabərdir.

Nazirliyin məlumatına əsasən, daxili dövlət borcunun 7 milyard 234,6 milyon manatı dövriyyədə olan dövlət qiymətli kağızlarının, 8 milyard 747,4 milyon manatı isə hökumətin üzərinə götürdüyü dövlət zəmanətli öhdəliklərin payına düşür.