Sumqayıt.tv xəbər verir ki, Babək Ələkbərov 24 dekabr 1987-ci ildə Ceyranbatan qəsəbəsində anadan olub. Əslən Qərbi Azərbaycanlıdır. O, Dövlət Sərhəd Xidmətinin Çevik Hərəkət Qüvvələrinin komandanıdır və Vətən Müharibəsi Qəhrəmanıdır.

Babək Ələkbərov 2003–2006-cı illərdə Cəmşid Naxçıvanski adına hərbi liseydə, 2006–2010-cu illərdə isə Heydər Əliyev adına Akademiyanın Sərhəd qoşunları fakültəsində təhsil alıb.

O, 2020-ci ildə Vətən müharibəsində iştirak edib, Arazboyu əməliyyatlarda xüsusi şücaət göstərib, Zəngilan rayonunun və Xudafərin körpüsünün azad edilməsi ilə bağlı döyüş tapşırıqlarında iştirak edib.

Göstərdiyi qəhrəmanlığa görə 9 dekabr 2020-ci il tarixli Prezident Sərəncamı ilə Babək Ələkbərova “Vətən Müharibəsi Qəhrəmanı” adı verilib.

Babək Ələkbərov müxtəlif dövlət təltiflərinə layiq görülüb. O, ailəlidir və 3 övladı var.

Qərbi Zəngəzur bölgəsində yaralı vəziyyətdə aşkar edilən ağbaş kərkəs xilasedicilər tərəfindən xilas edilərək mütəxəssislərə təhvil verilib.

Sumqayit.tv xəbər verir ki, bu barədə Ermənistan Fövqəladə Hallar Xidməti məlumat yayıb.

Bildirilib ki, nadir quş növü Sisian rayonunun yaşayış məntəqələrindən birində aşkarlanıb. Ağbaş kərkəs Ermənistanın Qırmızı Kitabına daxil edilmiş nadir quş növlərindən biridir.

Xilasedilən quş daha sonra İrəvana aparılıb, baytar müayinəsindən keçirilib və müalicəyə cəlb olunub.

Məlumata görə, aparılan müalicə nəticəsində quşun səhhətində müsbət dinamika müşahidə olunur. 

 
Qərbi Azərbaycan İcmasının Sumqayıt şəhər nümayəndəliyinin idarə heyətinin üzvləri və gənclər təşkilatının nümayəndələri görkəmli dövlət xadimi, yazıçı-dramaturq, publisist və ictimai xadim Hidayət Orucovun məzarını ziyarət ediblər.

Suqmayit.tv xəbər verir ki, anım mərasimi zamanı Hidayət Orucovun əziz xatirəsi dərin ehtiramla yad olunub, məzarı önünə əklil və gül dəstələri düzülüb, ruhuna dualar oxunub. Tədbir iştirakçıları onun Azərbaycan dövlətçiliyinin möhkəmləndirilməsi, milli-mənəvi dəyərlərin qorunması, zəngin ədəbi irsi və ictimai-siyasi fəaliyyəti ilə ölkənin ictimai fikir həyatına verdiyi töhfələri minnətdarlıqla xatırlayıblar.

Tədbirdə çıxış edən Qərbi Azərbaycan İcmasının Sumqayıt şəhər nümayəndəliyinin sədri Ramiz İsmayılov bildirib ki, Hidayət Orucov ömrünü xalqına və dövlətinə xidmətə həsr etmiş görkəmli ziyalılardan biri olub. O qeyd edib ki, Hidayət Orucov müxtəlif məsul dövlət vəzifələrində çalışdığı dövrdə milli maraqların müdafiəsini daim ön planda saxlayıb, Azərbaycançılıq ideologiyasının təbliği və milli birlik dəyərlərinin möhkəmləndirilməsi istiqamətində mühüm fəaliyyət göstərib.

Ramiz İsmayılov vurğulayıb ki, Hidayət Orucov Qərbi Azərbaycandan deportasiya olunmuş soydaşlarımızın hüquqlarının müdafiəsi, onların tarixi yaddaşının yaşadılması və doğma yurdlarına qayıdış hüququnun beynəlxalq müstəvidə tanıdılması istiqamətində ardıcıl mövqe nümayiş etdirib. Onun bu sahədəki fəaliyyəti Qərbi Azərbaycan həqiqətlərinin geniş ictimaiyyətə çatdırılmasına və milli yaddaşın qorunmasına mühüm töhfə verib.

Bildirilib ki, Hidayət Orucovun zəngin ədəbi yaradıcılığı, publisistik irsi və ictimai-siyasi fəaliyyəti Azərbaycan cəmiyyətində hər zaman yüksək qiymətləndirilib. Doğma yurd yerlərinə bağlılığı, milli kimliyin qorunmasına verdiyi töhfələr və vətənpərvərlik mövqeyi onu təkcə dövlət xadimi kimi deyil, həm də milli düşüncənin daşıyıcısı olan görkəmli ziyalı kimi yaddaşlarda yaşadır.

Sonda tədbir iştirakçıları Hidayət Orucovun xatirəsinin daim əziz tutulacağını, onun dövlətçilik ənənələrinə sadiqliyinin, milli-mənəvi dəyərlərin qorunması və Qərbi Azərbaycan irsinin yaşadılması istiqamətində gördüyü işlərin gələcək nəsillər üçün örnək olduğunu bildiriblər.

 
Ermənistanın Baş naziri Nikol Paşinyan Sumqayıt və digər Azərbaycan şəhərlərinə qayıdış məsələsi ilə bağlı diqqətçəkən açıqlama verib.

Sumqayit.tv xəbər verir ki, Paşinyan bu barədə mayın 26-da Kotayk bölgəsinin Tsaqkadzor şəhərində keçirilən seçki kampaniyası zamanı danışıb.

O bildirib ki, bəzi qüvvələr Ermənistanda 300 min azərbaycanlının geri dönüş məsələsini gündəmə gətirməyə çalışır, lakin rəsmi İrəvan bunun qarşısını almaq niyyətindədir.

“Bu gün Ermənistanda 300 min azərbaycanlının Ermənistana gələcəyini iddia etmək istəyən qüvvələr var, amma biz bu qapını əbədi olaraq bağlamışıq”, – deyə Paşinyan bildirib.

Baş nazir əlavə edib ki, Ermənistan Bakı, Sumqayıt, Gəncə və Qarabağı tərk etmiş ermənilərin geri qayıtması məsələsini də gündəmə gətirməməlidir. Onun fikrincə, bu cür yanaşma “güzgü gündəmləri” yarada bilər.

Paşinyan Qarabağdan Ermənistana köçən ermənilərin yerləşdirilməsi üçün böyük maliyyə vəsaiti ayrıldığını da qeyd edib.

“Bu gün Qarabağdan gələnlərin Ermənistanda məskunlaşmasına kömək etmək üçün milyardlarla dollar xərcləyirik”, – deyə o vurğulayıb.

Ermənistan baş naziri çıxışında dövlətçilik və vətən anlayışına da toxunaraq bildirib ki, “Vətən dövlətdir və dövlətdən kənarda Vətən yoxdur”.

Qərbi Azərbaycan əsilli gənclərimizin uğurları davam edir. Bu dəfə sizə dünya miqyasında böyük nailiyyət əldə etmiş istedadlı gəncimizi təqdim edirik.

Qərbi Azərbaycanın Çəmbərək rayonunun Qaraqaya kəndindən olan Musazadə Fəxri İlqar oğlu, Türkiyə Respublikasında keçirilən xarici tələbələr üçün ali təhsil qəbul imtahanı – TR-YÖS üzrə maksimal 500 bal toplayaraq dünya birincisi olub.

Fəxri Musazadə yalnız bu nəticə ilə kifayətlənməyib. O, riyaziyyat sahəsində keçirilən çoxsaylı beynəlxalq olimpiadalarda qızıl medallara layiq görülüb, həmçinin TYS imtahanı üzrə dünya birinciliyi, SAT və TOEFL imtahanlarında isə yüksək nəticələr əldə edib.

Gənc istedad gələcək təhsilini Türkiyədə davam etdirməyi və tibb ixtisası üzrə mütəxəssis olmağı qarşısına məqsəd qoyub.

Bu cür uğurlar həm ölkəmizin, həm də Qərbi Azərbaycan icmasının gələcəyi üçün böyük ümid və qürur mənbəyidir.

✍️ Məlumatı təqdim etdi: Rəsul Qaraqaya, Sumqayıt.tv üçün

Sumqayıt şəhərində Novruz bayramı münasibətilə “Dəyirmi Doğul – Birliyin Novruzu, Xədicənin Rəngləri” Xüsusi Rəsm Sərgisi adlı tədbir təşkil olunub.
Sumqayit.tv-in məlumatına görə, tədbirin təşəbbüskarı Qərbi Azərbaycan İcmasının Sumqayıt nümayəndəliyi olub. Mərasim Sumqayıt Muğam Mərkəzində keçirilib və tədbirdə şəhid ailələri, qazilər, millət vəkilləri, xüsusi qayğıya ehtiyacı olan uşaqlar, ziyalılar və ictimaiyyət nümayəndələri iştirak ediblər.

Tədbir iştirakçıları əvvəlcə gənc rəssam Xədicə Səlimlinin əl işlərindən ibarət sərgi ilə tanış olublar. Sərgidə nümayiş etdirilən rəsm əsərlərində milli-mənəvi dəyərlər, Novruz ənənələri, vətənpərvərlik motivləri və gələcəyə ümid dolu baxışlar öz əksini tapıb. Qonaqlar tərəfindən maraqla qarşılanan əsərlərin hər birinin ideya baxımından dərin məna daşıdığı, gənc rəssamın yaradıcılıq dünyasını dolğun şəkildə əks etdirdiyi bildirilib.

Tədbirin rəsmi hissəsi Azərbaycan Respublikasının Dövlət Himninin səsləndirilməsi ilə başlayıb. Daha sonra Vətən uğrunda canından keçmiş şəhidlərin və xalqımızın ümummilli lideri Heydər Əliyevin əziz xatirəsi bir dəqiqəlik sükutla yad olunub.

Tədbiri açıq elan edən Qərbi Azərbaycan İcmasının Sumqayıt nümayəndəliyinin sədri Ramiz İsmayılov çıxışında qeyd edib ki, belə tədbirlər milli dəyərlərin qorunması, gənc nəslə ötürülməsi və cəmiyyətin mənəvi birliyinin möhkəmləndirilməsi baxımından mühüm əhəmiyyət daşıyır. O vurğulayıb ki, Xədicə Səlimli kimi istedadlı gənclərin yaradıcılığına dəstək göstərilməsi onların gələcək inkişafına stimul verir və milli ruhun yaşadılmasına xidmət edir.

Daha sonra çıxış edən Sumqayıt şəhər icra hakimiyyəti başçısının birinci müavini Teymur Səmədov belə tədbirlərin şəhərin mədəni həyatında xüsusi yer tutduğunu bildirib. O qeyd edib ki, gənclərin yaradıcılıq potensialının üzə çıxarılması, onların incəsənətə və milli dəyərlərə bağlı ruhda formalaşması cəmiyyət üçün vacib amillərdəndir. Onun sözlərinə görə, Xədicə Səlimlinin təqdim etdiyi əsərlər gənc istedadların düzgün istiqamətdə inkişaf etdiyini göstərən bariz nümunədir.

Tədbirdə çıxış edən millət vəkili Ceyhun Məmmədov da bildirib ki, bu kimi sərgi və görüşlər həm milli-mənəvi dəyərlərin təbliğinə, həm də yaradıcı gənclərin tanıdılmasına xidmət edir. Deputat vurğulayıb ki, Novruz bayramı birlik, həmrəylik və yenilənmə rəmzidir və belə tədbirlər həmin dəyərlərin cəmiyyətdə daha da güclənməsinə töhfə verir.

Sonda çıxış edən gənc rəssam Xədicə Səlimli sərginin təşkilinə görə təşəkkürünü bildirib və qeyd edib ki, onun yaradıcılığının əsas məqsədi milli kimliyi, adət-ənənələri və insanlarda ümid hissini rənglərin dili ilə ifadə etməkdir. O, belə bir sərginin keçirilməsini öz yaradıcılığı üçün böyük motivasiya hesab etdiyini və gələcəkdə daha geniş layihələr təqdim etmək istədiyini söyləyib.

Çıxışlarda ümumilikdə vurğulanıb ki, “Dəyirmi Doğul – Birliyin Novruzu, Xədicənin Rəngləri” adlı xüsusi sərgi gənclərin yaradıcılıq imkanlarının dəstəklənməsi, milli irsin təbliği və cəmiyyətdə birlik ruhunun gücləndirilməsi baxımından əhəmiyyətli mədəni tədbirlərdən biridir.

Tədbir daha sonra ədəbi-bədii proqramla davam edib. Proqram çərçivəsində Novruz bayramına həsr olunan şeirlər səsləndirilib, musiqi nömrələri təqdim olunub, uşaqların iştirakı ilə bayram səhnəcikləri göstərilib və iştirakçılar üçün xüsusi bayram ovqatı yaradılıb.

Sonda tədbirdə fəal iştirak edən uşaqlara və qonaqlara Qərbi Azərbaycan İcmasının Sumqayıt nümayəndəliyi tərəfindən xatirə hədiyyələri təqdim olunub, onların yaradıcılıq fəaliyyəti yüksək qiymətləndirilib və gələcəkdə bu cür layihələrin davam etdiriləcəyi bildirilib.

“Prezident İlham Əliyevin də iştirak etdiyi Münxen konfransı göstərdi ki, Azərbaycan sülh, təhlükəsizlik və tərəfdaşlıq siyasətinə sadiqdir”.

Bunu saytımıza açıqlamasında Müharibə, Əmək və Silahlı Qüvvələr Veteranları Təşkilatının sədri, hərbi-siyasi ekspert polkovnik Cəlil Xəlilov bildirib. Polkovnik qeyd edib ki, Prezident İlham Əliyevin Münxendə verdiyi açıqlama və müsahibələr Azərbaycanın ənənəvi siyasi krusuna sadiq qaldığını göstərir:

“Azərbaycan hər zaman regionda və dünyada sülhün, təhlükəsizliyin və əməkdaşlığın tərəfdarı olub. Dövlətimizin Cənubi Qafqazda formalaşdırdığı de-fakto sülh şəraiti bu siyasətin ən bariz göstəricisidir.

Münxen sülh konfransında da Azərbaycan bütün dünyaya məhz bu msajları verdi. Dövlət başçısı İlham Əliyev media nümayəndələrinə verdiyi müsahibələrdə açıq şəkildə vurğuladı ki, uğur və tərəqqiyə gedən yol məhz sülh və əməkdaşlıqdan keçir.

Müzəffər Ali Baş Komandan Cənubi Qafqazda uzunmüddətli sülhə nail olmaq üçün atılması gərəkən addımlara da diqqət çəkdi. Prezident İlham Əliyev vurğuladı ki, rəsmi İrəvanla sülh müqaviləsinin imzalanması üçün Ermənistanın öz konstitusiyasında dəyişikliklər etməsi, Azərbaycana qarşı ərazi iddialarından imtina etməsi vacibdir. Dövlət başçısı vurğuladı ki, əgər günü bu gün Ermənistan konstitusiyasında bu dəyişikliklər edilərsə, o zaman ertəsi gün sülh müqaviləsini imzalamaq mümkündür”.

Polkovnik Münxen zülh konfransında Azərbaycanın təhlükəsizlik məsələlərində qlobal miqyasda artan roluna da diqqət çəkdi:

“Məlum olduğu kimi, Azərbaycan uzun illərdir ki, Qərbin enerji təhlükəsizliyində mühüm rol oynayır. Bu gün Avropanın bir neçə ölkəsi Azərbaycandan neft-qaz məhsulları idxal edir ki, bu da həmin ölkələrin enerji təhlükəsizliyi baxımından böyük əhəmiyyətə malikdir. Son illərin təcrübəsi göstərir ki, Azərbaycan beynəlxalq dəhliz və  nəqliyyat marşurutarının təhlükəsizliyinin təmini baxımından da böyük uğurlar əldə edib, bu müstəvidə qlobal miqyasdakı mövqeyini ciddi şəkildə möhkəmləndirib.

Bütün bunlar onu deməyə əsas verir ki, Azərbaycan dövləti yaxın gələcəkdə Prezident İlham Əliyevin rəhbərliyi altında sülh, təhlükəsizlik və tərəfdaşlıq siyasətini uğurla inkişaf etdirməkdə davam edəcək, yeni dostlar və tərəfdaşlar hesabına beynəlxalq miqyasda nüfuzunu daha da gücləndirəcək”.

 
“Bir Elin Manifesti” müsabiqəsinin qalibləri mükafatlandırıldı Fevralın 12-də Qərbi Azərbaycan İcmasının inzibati binasında Qərbi Azərbaycan mövzusunda hekayə janrı üzrə “Bir Elin Manifesti” adlı Birinci Ümumrespublika Müsabiqəsinin yekun tədbiri və qaliblərin mükafatlandırılması mərasimi keçirilib.
Sumqayit.tv xəbər verir ki, müsabiqə Qərbi Azərbaycan İcmasının Qadınlar Şurasının təşkilatçılığı ilə baş tutub. Layihənin ideya müəllifi Qadınlar Şurasının sədri, Milli Məclisin deputatı Məlahət İbrahimqızıdır. Tərəfdaş qurumlar sırasında AMEA Nizami Gəncəvi adına Ədəbiyyat İnstitutu, Azərbaycan Yazıçılar Birliyi, “Ədəbiyyat qəzeti” və “Modern.az” informasiya agentliyi yer alıb. Tədbirdə çıxış edən Məlahət İbrahimqızı, Qərbi Azərbaycan İcmasının İdarə Heyətinin sədri Əziz Ələkbərli, Müşahidə Şurasının sədri Misir Mərdanov, akademik Nizami Cəfərov, Qərbi Azərbaycan İcmasının İdarə Heyətinin üzvü, professor Mahirə Hüseynova (Nağıqızı) və Milli Məclisin deputatı Hikmət Babaoğlu layihənin ədəbi və ictimai əhəmiyyətindən danışaraq bədii ədəbiyyatın milli yaddaşın qorunmasında rolunu vurğulayıblar. Müsabiqənin şərtlərinə əsasən, 40 yaşadək müəlliflərin daha əvvəl çap olunmamış hekayələri təqdim edilib. Münsiflər heyətinin qərarı ilə qaliblər müəyyənləşdirilib: I yer – İlhamə Nasir qızı Kərimova (“Sonuncu pərdə”) II yer – Könül Nəriman qızı Həsənova (“Əsa”) III yer – Samir Arif oğlu Abdullayev (“Onun adı Lena idi”) Seçilmiş hekayələr bir neçə xarici dilə tərcümə edilərək kitab halında nəşr olunub. Qaliblərə diplomlar və pul mükafatları təqdim edilib.
Qeyd edək ki, tədbirdə Milli Məclisin Sumqayıt şəhərindən seçilmiş deputatları Mehriban Vəliyeva, Səbinə Salmanova və Elnarə Akimova da iştirak ediblər.