Sumqayıt şəhərini Bakı ilə əlaqələndirən 500 və 503 nömrəli avtobus marşrutları “brutto müqavilə” sisteminə qoşulub.

Sumqayit.tv xəbər verir ki, bu barədə Azərbaycan Yerüstü Nəqliyyat Agentliyi (AYNA) məlumat yayıb.

Bildirilib ki, Nazirlər Kabinetinin 31 iyul 2026-cı il tarixli qərarı ilə təsdiqlənən yeni qaydaların tətbiqinə başlanılıb. İlk mərhələdə 130, 205, 211, 500 və 503 nömrəli marşrutlar “brutto müqavilə” modelinə daxil edilib.

Yeni sistemə əsasən, daşıyıcılara sərnişin sayına görə deyil, qət edilən məsafə və göstərilən xidmətin keyfiyyətinə əsasən ödəniş ediləcək.

Marşrutlarda avtobusların sayı, hərəkət intervalı və qət ediləcək məsafə əvvəlcədən müəyyənləşdiriləcək. Bu isə sərnişin sayının az olduğu saatlarda, o cümlədən axşam vaxtlarında avtobusların qrafik üzrə fəaliyyət göstərməsinə imkan verəcək.

Yeni modelin tətbiqi ilə şəhərətrafı və azrentabelli marşrutlarda da xidmət səviyyəsinin yüksəldilməsi, daşıyıcıların yalnız gəlirli marşrutlara üstünlük verməsinin qarşısının alınması nəzərdə tutulur.

AYNA-nın məlumatına görə, digər marşrutların da mərhələli şəkildə “brutto müqavilə” sisteminə qoşulması planlaşdırılır.

Yeni sistem həmçinin daşıyıcıların fəaliyyətinə nəzarətin gücləndirilməsinə, avtobus parkının yenilənməsinə və xidmət keyfiyyətinin artırılmasına şərait yaradacaq.

Abşeron-Xızı Regional Təhsil İdarəsinin tabeliyində fəaliyyət göstərən umumtəhsil müəssisələrinin XI sinifləri üzrə qızıl və gümüş nişana namizəd məzunların statistikası açıqlanıb.

Sumqayit.tv xəbər verir ki, cari tədris ilində region üzrə ümumilikdə 42 məzun qızıl və gümüş nişana namizəd olub. Onlardan 30 nəfəri qızıl, 12 nəfəri isə gümüş nişana namizəddir.

Məzunların məktəblər üzrə bölgüsü aşağıdakı kimidir:

• Təbiət Elmləri Təmayüllü Gimnaziya: 15 qızıl, 3 gümüş (ümumi 18 məzun);

• Sumqayıt şəhəri 23 nömrəli tam orta məktəb: 6 qızıl, 5 gümüş (ümumi 11 məzun);

• Təbiət Elmləri Təmayüllü Lisey: 2 qızıl nişan namizədi;

• Sumqayıt şəhəri 1 nömrəli tam orta məktəb: 1 qızıl, 1 gümüş nişan namizədi;

• Sumqayıt şəhəri 35 nömrəli tam orta məktəb: 2 qızıl nişan namizədi;

• Xırdalan şəhəri 5 nömrəli tam orta məktəb: 1 qızıl, 1 gümüş nişan namizədi;

• Ceyranbatan qəsəbə 1 nömrəli tam orta məktəb: 1 qızıl nişan namizədi;

• Sumqayıt şəhəri 11 nömrəli tam orta məktəb: 1 qızıl nişan namizədi;

• Sumqayıt şəhəri 12 nömrəli tam orta məktəb: 1 qızıl nişan namizədi;

• Masazır qəsəbə 4 nömrəli tam orta məktəb: 1 gümüş nişan namizədi;

• Masazır qəsəbə 2 nömrəli tam orta məktəb: 1 gümüş nişan namizədi.

Statistikaya əsasən, qızıl və gümüş nişan namizədlərinin böyük hissəsi Sumqayıt şəhərindəki təhsil müəssisələrinin payına düşür.

Azərbaycan Prezidenti İlham Əliyev sentyabrın 2-də Birləşmiş Millətlər Təşkilatının (BMT) Azərbaycanda yeni təyin olunmuş rezident əlaqələndiricisi Dmitri Şlapaçenkonu qəbul edib.

Sumqayit.tv xəbər verir ki, Dmitri Şlapaçenko etimadnaməsini dövlət başçısına təqdim edib.

Görüşdə Azərbaycan-BMT əlaqələri, ölkədə keçirilən beynəlxalq tədbirlər, Qarabağ və Şərqi Zəngəzurda aparılan bərpa-quruculuq işləri və mina problemi müzakirə olunub.

Prezident İlham Əliyev işğaldan azad edilmiş ərazilərdə genişmiqyaslı bərpa və quruculuq işlərinin həyata keçirildiyini bildirib. O, mina probleminin bu prosesə maneə yaratmasına baxmayaraq, Azərbaycanın minatəmizləmə fəaliyyətini davam etdirdiyini vurğulayıb.

Dmitri Şlapaçenko isə BMT-nin Azərbaycana, o cümlədən mina probleminin həlli istiqamətində dəstək göstərməyə və təcrübəsini bölüşməyə hazır olduğunu bildirib. O, yaxın zamanda Qarabağa səfər edəcəyini də qeyd edib.

Görüş zamanı həmçinin Cənubi Qafqazda transsərhəd çayların ekoloji vəziyyəti, monitorinqlərin aparılması və Xəzər dənizində su səviyyəsinin azalması kimi məsələlər ətrafında fikir mübadiləsi aparılıb.

Sumqayıt şəhərində ölüm hadisəsi baş verib.

Sumqayit.tv xəbər verir ki, hadisə Yaşma bağları ərazisində yerləşən dayanacaqda qeydə alınıb.

Məlumata görə, Şabran rayon sakini, 1988-ci il təvəllüdlü Talıbov Elnur Sadiq oğlu dayanacaqda olarkən qəfil vəfat edib.

38 yaşlı kişinin ölüm səbəbi hələlik məlum deyil.

Faktla bağlı araşdırma aparılır.

Mənbə: Teleqraf

Sumqayıt şəhərində ölüm hadisəsi baş verib.

Sumqayit.tv xəbər verir ki, hadisə Yaşma bağları ərazisində yerləşən dayanacaqda qeydə alınıb.

Məlumata görə, Şabran rayon sakini, 1988-ci il təvəllüdlü Talıbov Elnur Sadiq oğlu dayanacaqda olarkən qəfil vəfat edib.

38 yaşlı kişinin ölüm səbəbi hələlik məlum deyil.

Faktla bağlı araşdırma aparılır.

Mənbə: Teleqraf

Azərbaycanın gənc və perspektivli basketbolçularından olan Səlminaz Ramazanlı ABŞ-də ali təhsil almaq üçün böyük uğura imza atıb.

Sumqayit.tv xəbər verir ki, 2007-ci il aprelin 30-da Sumqayıtda anadan olan basketbolçu ABŞ-nin Louisiana Universitetində “Exercise Science and Wellness” ixtisası üzrə bakalavr təhsili almaq üçün 100 faiz təqaüd qazanıb.

Bununla yanaşı, Səlminaz Ramazanlı universitetin “Louisiana Wildcats” qadın basketbol komandasında çıxış etmək təklifi də alıb.

Hazırda “Neftçi” klubunun formasını geyinən gənc basketbolçu həm klassik basketbol, həm də 3x3 basketbol üzrə Azərbaycan milli komandalarının heyətində çıxış edir.

Qeyd edək ki, Səlminaz Ramazanlı Sumqayıt şəhərində tanınmış müəllimlərdən biri olan Aliyə Əhmədovanın qızıdır.

Mənbə: Aztehsil.az

Azərbaycanda həkimlərin əməkhaqlarında əhəmiyyətli artımlar nəzərdə tutulub.

Sumqayit.tv xəbər verir ki, bunu TƏBİB-in icraçı direktoru Anar Bayramov sentyabrın 2-də keçirilən mətbuat konfransında açıqlayıb.

İlkin səhiyyə xidmətində çalışan ailə və sahə həkimlərinin aylıq əməkhaqqı 1 150 manatdan 2 000 manata yüksəldiləcək. Bu, 74 faiz artım deməkdir.

Təcili tibbi yardım xidmətində çalışan həkimlərin də maaşları artırılacaq:

• Respublika Təcili Təxirəsalınmaz Tibbi Yardım Mərkəzinin həkimi – 1 550 → 2 200 manat
• Tibb mərkəzlərinin təcili yardım şöbələrinin həkimləri – 1 550 → 2 500 manat
• 3A və 3B kateqoriyalı tibb müəssisələrinin təcili yardım şöbələrinin həkimləri – 2 100 → 3 000 manat

Regionlarda kadr çatışmazlığının aradan qaldırılması məqsədilə bəzi ixtisaslar üzrə əlavə artımlar da tətbiq olunacaq.

Belə ki, Bakı, Abşeron, Sumqayıt və Gəncə istisna olmaqla digər şəhər və rayonlarda:

• Uşaq anestezioloq-reanimatoloqlar – 1 450 → 3 000 manat
• Neonatoloqlar – 1 450 → 2 400 manat
• Hemodializ həkimləri – 1 450 → 2 250 manat
• Mama-ginekoloq, neyrocərrah, uşaq cərrahı, ürək-damar cərrahı, üz-çənə cərrahı və travmatoloqlar – 1 450 → 2 150 manat

TƏBİB bildirir ki, əməkhaqqı artımları vəzifə, ixtisas, iş yükü, fəaliyyət göstəriciləri və regionlarda kadr təminatı nəzərə alınmaqla diferensiallaşdırılacaq.

Mənbə: AzərTAC

Həkim çatışmazlığı olan regionlarda çalışan tibb işçiləri üçün əlavə maliyyə mexanizmləri tətbiq olunacaq.

Sumqayit.tv xəbər verir ki, bunu TƏBİB-in icraçı direktoru Anar Bayramov mətbuat konfransında deyib.

Onun sözlərinə görə, Bakı, Abşeron, Sumqayıt və Gəncə istisna olmaqla, həkim çatışmazlığı olan regionlarda bir sıra tibbi xidmətlər üzrə fəaliyyət nəticələrinə əsasən hesablanan dəyişən bonus ödənişlərinə 1,3 əmsalı tətbiq ediləcək.

Bildirilib ki, ambulator xidmət göstərən həkimlər üçün də yeni ödəniş mexanizmi tətbiq olunacaq. Həvəsləndirici ödənişlər tibbi xidmətin keyfiyyəti və pasiyent məmnunluğu ilə əlaqələndiriləcək.

Anar Bayramov həmçinin baş tibb bacıları üçün diferensial əməkhaqqı artımlarının nəzərdə tutulduğunu açıqlayıb. Məsələn, 3B kateqoriyalı tibb müəssisəsində çalışan baş tibb bacısının aylıq əməkhaqqının 1 454 manatdan 2 125 manata yüksələcəyi bildirilib.

Mənbə: APA

Sumqayıtda ölümlə nəticələnən yol-nəqliyyat hadisəsi baş verib.

Sumqayit.tv xəbər verir ki, hadisə şəhərin Əliyar Əliyev küçəsində qeydə alınıb.

İlkin məlumata görə, 1963-cü il təvəllüdlü Əsgərov Yaşar Təvəkkül oğlu idarə etdiyi “Kia Sorento” markalı avtomobillə yolu keçən piyadanı vurub.

Piyada aldığı xəsarətlər nəticəsində hadisə yerində ölüb. Onun şəxsiyyəti hələlik müəyyən edilməyib.

Faktla bağlı araşdırma aparılır.

Mənbə: Report.az

Sumqayıt şəhərinin Corat bağları ərazisində fərdi yaşayış evində yanğın baş verib.

Sumqayit.tv Report-a istinadən xəbər verir ki, hadisə yerinə Fövqəladə Hallar Nazirliyinin Dövlət Yanğından Mühafizə Xidmətinin canlı qüvvəsi və texnikaları cəlb olunub.

Yanğın qısa müddətdə söndürülüb və alovun ətrafdakı evlərə keçməsinin qarşısı alınıb.

İlkin məlumata görə, yanğının ev sahibinin oğlu tərəfindən törədildiyi bildirilir. Şəxsin polis əməkdaşları tərəfindən hadisə yerində saxlanıldığı qeyd olunur.

Hazırda hadisənin təfərrüatları və yanğının dəqiq səbəbləri araşdırılır.