Abşeron-Xızı Regional Təhsil İdarəsinin tabeliyində fəaliyyət göstərən umumtəhsil müəssisələrinin XI sinifləri üzrə qızıl və gümüş nişana namizəd məzunların statistikası açıqlanıb.

Sumqayit.tv xəbər verir ki, cari tədris ilində region üzrə ümumilikdə 42 məzun qızıl və gümüş nişana namizəd olub. Onlardan 30 nəfəri qızıl, 12 nəfəri isə gümüş nişana namizəddir.

Məzunların məktəblər üzrə bölgüsü aşağıdakı kimidir:

• Təbiət Elmləri Təmayüllü Gimnaziya: 15 qızıl, 3 gümüş (ümumi 18 məzun);

• Sumqayıt şəhəri 23 nömrəli tam orta məktəb: 6 qızıl, 5 gümüş (ümumi 11 məzun);

• Təbiət Elmləri Təmayüllü Lisey: 2 qızıl nişan namizədi;

• Sumqayıt şəhəri 1 nömrəli tam orta məktəb: 1 qızıl, 1 gümüş nişan namizədi;

• Sumqayıt şəhəri 35 nömrəli tam orta məktəb: 2 qızıl nişan namizədi;

• Xırdalan şəhəri 5 nömrəli tam orta məktəb: 1 qızıl, 1 gümüş nişan namizədi;

• Ceyranbatan qəsəbə 1 nömrəli tam orta məktəb: 1 qızıl nişan namizədi;

• Sumqayıt şəhəri 11 nömrəli tam orta məktəb: 1 qızıl nişan namizədi;

• Sumqayıt şəhəri 12 nömrəli tam orta məktəb: 1 qızıl nişan namizədi;

• Masazır qəsəbə 4 nömrəli tam orta məktəb: 1 gümüş nişan namizədi;

• Masazır qəsəbə 2 nömrəli tam orta məktəb: 1 gümüş nişan namizədi.

Statistikaya əsasən, qızıl və gümüş nişan namizədlərinin böyük hissəsi Sumqayıt şəhərindəki təhsil müəssisələrinin payına düşür.

Azərbaycanın gənc və perspektivli basketbolçularından olan Səlminaz Ramazanlı ABŞ-də ali təhsil almaq üçün böyük uğura imza atıb.

Sumqayit.tv xəbər verir ki, 2007-ci il aprelin 30-da Sumqayıtda anadan olan basketbolçu ABŞ-nin Louisiana Universitetində “Exercise Science and Wellness” ixtisası üzrə bakalavr təhsili almaq üçün 100 faiz təqaüd qazanıb.

Bununla yanaşı, Səlminaz Ramazanlı universitetin “Louisiana Wildcats” qadın basketbol komandasında çıxış etmək təklifi də alıb.

Hazırda “Neftçi” klubunun formasını geyinən gənc basketbolçu həm klassik basketbol, həm də 3x3 basketbol üzrə Azərbaycan milli komandalarının heyətində çıxış edir.

Qeyd edək ki, Səlminaz Ramazanlı Sumqayıt şəhərində tanınmış müəllimlərdən biri olan Aliyə Əhmədovanın qızıdır.

Mənbə: Aztehsil.az

2 sentyabrdan etibarən təhsilverənlərin təkrar sertifikatlaşdırılması prosesinin müsahibə mərhələsinə başlanılır.

Sumqayit.tv xəbər verir ki, müsahibənin keçiriləcəyi tarix və məkanla bağlı məlumatlar müəllimlərin şəxsi kabinetlərinə göndərilib.

Test imtahanında keçid balını toplayan müəllimlərin əməkhaqqına 10 faiz, 51 və daha yüksək bal toplayanların maaşına isə 35 faiz əlavə tətbiq olunacaq.

Əlavələr müsahibə mərhələsində uğur qazanan müəllimlərin əməkhaqqına hesablanacaq. Namizədlər şəxsi kabinetlərinə daxil olaraq müsahibənin tarix və məkanı ilə tanış ola bilərlər.

Namizədlərin Sumqayıt.tv-yə göndərdiyi müraciətdə qeyd olunur ki, 24 avqust 2026-cı il tarixində keçirilən imtahan obyektiv və ədalətli təşkil edilməyib.

İddialara görə, imtahanda təqdim olunan sualların bir hissəsi təsdiq edilmiş proqramla uyğunluq təşkil etməyib, xüsusilə tarix fənni üzrə bəzi sualların mənbəyi məlum olmayıb. Namizədlər sualların həddindən artıq mürəkkəb olduğunu və biliklərin obyektiv qiymətləndirilməsinə imkan vermədiyini bildirirlər.

Müraciətdə ən ciddi narazılıqlardan birinin də imtahana ayrılan 2 saatlıq müddətlə bağlı olduğu qeyd edilir. Namizədlərin sözlərinə görə, 100 sualın cavablandırılması, xüsusilə mürəkkəb və həcmi böyük suallar nəzərə alındıqda, iki saat ərzində mümkün olmayıb. Onlar bildirirlər ki, imtahanın müddəti barədə əvvəlcədən kifayət qədər məlumat verilməyib və bu barədə yalnız imtahan günü məlumat əldə ediblər.

Namizədlər həmçinin imtahan keçirilən auditoriyalarda havalandırma probleminin olduğunu, yüksək temperaturun hökm sürdüyünü və yaxınlıqdakı binada aparılan təmir-tikinti işlərindən gələn səslərin imtahan prosesinə mane olduğunu iddia edirlər.

Müraciətdə nəzarətçilərin davranışından da narazılıq ifadə olunub. Bildirilir ki, yaranmış vəziyyət imtahan zamanı nəzarətçilərə şifahi şəkildə çatdırılsa da, bununla bağlı operativ tədbir görülməyib.

“Proqram yalnız iki ay əvvəl təqdim olunub”

Namizədlərin sözlərinə görə, imtahan proqramı onlara yalnız iyun ayının əvvəlində, yəni imtahana təxminən iki ay qalmış təqdim edilib.

Onlar proqramda çoxsaylı kitab və mövzuların yer aldığını, belə qısa müddətdə bütün materialların tam mənimsənilməsinin çətin olduğunu bildirirlər. Həmçinin imtahanda düşən suallarla təqdim edilmiş proqram arasında ciddi uyğunsuzluqların olduğunu iddia edirlər.

Namizədlər qeyd edirlər ki, sual kitabçaları imtahandan sonra onların əlində saxlanılmadığından konkret suallar üzrə yazılı nümunələr təqdim etmək imkanları məhduddur.

“Rəsmi qaydada müraciət etmişik”

Müraciətdə qeyd olunur ki, yaranmış problemlərlə bağlı həm Bakı Dövlət Universitetinin rəhbərliyinə, həm də Elm və Təhsil Nazirliyinə rəsmi şikayətlər göndərilib.

Namizədlər universitet rəhbərliyi tərəfindən məsələyə obyektiv yanaşılmadığını, müraciətlərinə cavab verilmədiyini bildirirlər. Onların sözlərinə görə, şikayətlə bağlı quruma dəvət olunsalar da, görüş zamanı məsələnin mahiyyəti üzrə araşdırma aparılmayıb.

Narazılıq neçə namizədi əhatə edir?

Namizədlərin iddiasına görə, yaranmış vəziyyətdən imtahanda iştirak edənlərin təxminən 70-80 faizi narazıdır.

Bildirilib ki, birgə hazırlıq keçən qrup üzrə təxminən 60 namizəd imtahanın nəticələri və təşkilati məsələlərlə bağlı narazılığını ifadə edib. Hazırda kollektiv müraciət təqdim edilməsə də, namizədlərin fərdi qaydada aidiyyəti qurumlara müraciətlər ünvanladığı qeyd olunur.

Namizədlərin tələbi

Namizədlər aidiyyəti qurumlardan imtahan suallarının və nəticələrin qanunvericiliyə uyğun şəkildə araşdırılmasını istəyirlər.

Onlar həmçinin sualların çətinliyi, imtahan müddətinin məhdudluğu və yaradılan şərait nəzərə alınaraq keçid balının aşağı salınmasını xahiş edirlər.

Namizədlər bildirirlər ki, məqsədləri ölkə daxilində təhsil almaqdır və belə halların yerli təhsil sisteminə olan inama mənfi təsir göstərməməsi üçün məsələyə obyektiv yanaşılmasını gözləyirlər.

Sumqayıt.tv məsələ ilə bağlı Bakı Dövlət Universitetinin və Elm və Təhsil Nazirliyinin mövqeyini dərc etməyə hazırdır.

Sumqayıt şəhər Təbiət Elmləri Təmayüllü Gimnaziyanın 11A sinfində təhsil alan bacı-qardaş – İnci Mursaquliyeva və Həmid Mursaquliyev ali məktəbə qəbul olaraq diqqətçəkən uğura imza atıblar.

Bacı-qardaş yüksək nəticə göstərərək Azərbaycan Tibb Universitetinin Tibb fakültəsinə qəbul olunublar.

İnci Mursaquliyeva qəbul imtahanında 690,2 bal, Həmid Mursaquliyev isə 667 bal toplayıb.

Eyni sinifdə təhsil alan bacı-qardaşın eyni ildə eyni universitetin eyni fakültəsinə qəbul olması ailələri və gimnaziya kollektivi üçün qürurverici hadisədir.

Qeyd edək ki, İnci və Həmid Mursaquliyevlər bundan sonra təhsillərini Azərbaycan Tibb Universitetində davam etdirəcəklər.

Sumqayıt.tv olaraq İnci və Həmidi təbrik edir, tələbəlik həyatlarında uğurlar arzulayırıq.

2026/2027-ci tədris ili üzrə ali məktəblərə qəbulun nəticələri açıqlanıb. Bu il 58 947 abituriyent tələbə adını qazanıb.

Sumqayit.tv  Azpolitika.info-a istinadən xəbər verir ki, ödənişli əsaslarla təhsil alacaq tələbələr üçün builki əsas məsələlərdən biri illik təhsil haqlarıdır.

Dövlət İmtahan Mərkəzinin “Abituriyent” jurnalında dərc olunan qəbul planlarına əsasən, bir sıra universitetlərdə təhsil haqları artırılıb.

Artım olan ali təhsil müəssisələri arasında Sumqayıt Dövlət Universiteti (SDU) də yer alıb. SDU-da təhsil haqqı 100 manat artırılıb.

Digər universitetlərdə artım belə olub:

• Azərbaycan Texniki Universiteti – 100–300 manat;
• Bakı Mühəndislik Universiteti – 100–500 manat;
• Azərbaycan Dövlət Mədəniyyət və İncəsənət Universiteti – 200–300 manat;
• Azərbaycan Turizm və Menecment Universiteti – 100 manat;
• Azərbaycan İdman Akademiyası – 500 manat;
• Lənkəran Dövlət Universiteti – 200–300 manat;
• Azərbaycan Kooperasiya Universiteti – 100–300 manat;
• “Azərbaycan” Universiteti – 300–500 manat;
• Bakı Avrasiya Universiteti – 200–300 manat;
• Odlar Yurdu Universiteti – 200–500 manat;
• Bakı Biznes Universiteti – 300 manat;
• Azərbaycan Əmək və Sosial Münasibətlər Akademiyası – 100 manat.

Qeyd edək ki, ali məktəblərdə illik təhsil haqları ixtisas və universitetdən asılı olaraq dəyişir. Bəzi proqramlarda bu məbləğ 2 min manatdan başlayır, 5500 manata qədər yüksəlir.

Ali təhsil müəssisələrinə qəbul olunan abituriyentlərin qeydiyyatına başlanılıb.

Sumqayit.tv xəbər verir ki, qeydiyyat prosesi 28 avqust saat 11:00-dan 8 sentyabr saat 18:00-dək davam edəcək.

Qəbul olunan şəxslər qeydiyyat üçün my.gov.az portalından istifadə etməlidirlər.

Qeydiyyatdan keçməyən və təhsil müəssisəsi tərəfindən təsdiqlənməyən şəxslər qəbul olunanların siyahısından xaric ediləcəklər.

Abituriyentlərə qeydiyyat üçün ayrılmış müddəti nəzərə almaları tövsiyə olunur.

2026–2027-ci tədris ili üzrə tələbə qəbulu çərçivəsində II mərhələyə start verilib.

İqtisadi Zonaların İnkişafı Agentliyinin (İZİA) nəzdində fəaliyyət göstərən Peşə Təhsil Mərkəzi tələbə qəbulunun II mərhələsini elan edib.

II mərhələ üzrə aşağıdakı ixtisaslara qəbul aparılır:

• Alternativ enerji qurğu və avadanlıqlarının istismarı;
• Elektronika və kommunikasiya sistemlərinin istismarı;
• Avtomatika sistemlərinin istismarı;
• Sənaye və mülki binalarda elektrik avadanlıqlarının quraşdırılması və istismarı;
• Elektrik qaz qaynaqçısı;
• İsitmə və soyutma sistemlərinə xidmət üzrə mütəxəssis.

Niyə İZİA Peşə Təhsil Mərkəzi?

Mərkəzdə təhsil almağın əsas üstünlükləri sırasında müasir tədris infrastrukturu, peşəkar pedaqoji heyət və real istehsalat təcrübəsi imkanları göstərilir.

Müasir və keyfiyyətli təhsil: Tədris müasir infrastruktura malik mərkəzdə, peşəkar pedaqoji heyətin iştirakı ilə təşkil olunur.

Ali təhsil almaq imkanı: Yüksək Texniki Peşə (YTP) təhsil pilləsini başa vuran subbakalavrlar müəyyən edilmiş qaydalara uyğun olaraq ali təhsil müəssisələrinə qəbul olmaq hüququ əldə edə bilərlər.

Real istehsalat təcrübəsi: Mərkəz Sumqayıt Sənaye Parkında fəaliyyət göstərən müəssisələrlə əməkdaşlıq edir. Bu əməkdaşlıq tələbələr üçün istehsalat təcrübəsi və gələcək karyera imkanlarının formalaşmasına şərait yaradır.

Kimlər müraciət edə bilər?

Müsabiqədə tam orta təhsili (11 illik) olan şəxslər iştirak edə bilərlər.

II mərhələ üzrə müraciət tarixləri

27 avqust – 3 sentyabr, saat 18:00-dək

Namizədlər qeydiyyatdan yalnız portal.edu.az platforması vasitəsilə keçə bilərlər.

Ünvan

Sumqayıt şəhəri, Kimyaçılar küçəsi 1, Sumqayıt Sənaye Parkı, İZİA Peşə Təhsil Mərkəzi

Əlaqə

(012) 525-39-57

(050) 623-27-86

Texniki və mühəndislik ixtisasları üzrə peşə təhsili almaq, real istehsalat mühiti ilə tanış olmaq və gələcək karyera üçün yeni imkanlar qazanmaq istəyən şəxslər qəbulun II mərhələsində iştirak edə bilərlər.

2026-2027-ci tədris ilindən etibarən bir sıra dərsliklər məktəblərdə yenilənmiş məzmunda tədris olunacaq.

Sumqayit.tv xəbər verir ki, yenilənəcək dərsliklər arasında IV sinif üçün “Həyat bilgisi”, VII sinif üçün “Azərbaycan dili”, “Riyaziyyat”, “İngilis dili”, “Azərbaycan tarixi”, VIII sinif üçün “Coğrafiya”, IX sinif üçün isə “Biologiya” və “Fizika” fənləri var.

Yeni dərsliklərdə şagirdlərin nəzəri biliklərlə yanaşı, real həyatda tətbiq, problem həlli, tədqiqat, tənqidi və yaradıcı düşünmə bacarıqlarının inkişafına daha çox diqqət yetiriləcək.

Bundan əlavə, maliyyə savadlılığı, ekoloji məsuliyyət, rəqəmsal və media savadlılığı, kibertəhlükəsizlik kimi müasir mövzular da dərsliklərdə daha geniş yer alacaq.

Mənbə: Report.az