Bəzi insanlar yaşa dolur, bəziləri isə yaşadıqları illərə dəyər qatır.

Bu gün 69 yaşını qeyd edən Tahir Əhməd oğlu Möhbalıyev mənim üçün məhz belə insanlardan biridir.

27 avqust 1957-ci ildə Qərbi Azərbaycanın Çəmbərək rayonunun Gölkənd kəndində dünyaya göz açan Tahir müəllimin həyat yolu zəhmətin, əzmin, ləyaqətin və insanlıq dəyərlərinin üzərində qurulub.

O, ömrünün böyük hissəsini biznesə həsr edib. Çalışıb, qurub, yaradıb, məsuliyyət daşıyıb. Lakin Tahir müəllimin həyatını yalnız qazandığı uğurlarla ölçmək, məncə, bu ömrə qarşı haqsızlıq olardı.

Çünki insanın əsl sərvəti sahib olduqları deyil, sahib olduqlarının qarşısında necə insan olaraq qalmasıdır.

Tahir müəllim bunu bacaran insanlardandır.

Gərgin və məsuliyyətli iş həyatına baxmayaraq, ailəsinə, övladlarına zaman ayırmağı bacarıb. Üç övlad böyüdüb, onları dövlətimizə və xalqımıza layiqli vətəndaş kimi yetişdirib. Bu gün övladlarının cəmiyyətə və dövlətə xidmət etməsi onun bir ata kimi qazandığı ən böyük uğurlardan biridir.

Bu gün Tahir müəllim həm də 8 nəvənin sevimli babasıdır.

Məncə, insanın həyatında bundan böyük mənəvi sərvət yoxdur.

Bir vaxtlar əlindən tutub böyütdüyün övladların bu gün öz övladlarının əlindən tutaraq sənin qarşında dayanırsa, deməli, sən yalnız bir ömür yaşamamısan.

Sən bir ömrü başqa ömürlərə ötürmüsən.

Övladların, nəvələrin, onların yaddaşında qalan xatirələrin – bunlar insanın bu dünyada qoyduğu ən qiymətli izlərdir.

Tahir müəllimi tanıdıqca onun xarakterində bir məqam xüsusilə diqqətimi çəkir: ədalət hissi.

O, ədaləti sadəcə dilə gətirilən bir söz kimi deyil, həyat prinsipi kimi qəbul edir. İnsanlara münasibətdə humanistliyi, sadəliyi, səmimiyyəti və haqqı üstün tutması onun şəxsiyyətinə xüsusi dəyər verir.

Bu gün Tahir müəllimin sahib olduğu hörmətin arxasında da məhz bunların dayandığına inanıram.

Çünki insanı varlı edən pul deyil.

Pul insanın cibini doldura bilər.

İnsanı məşhur edən mövqe deyil.

Mövqe insanın adını tanıda bilər.

Amma insanı hörmətli edən xarakteridir.

Tahir müəllimin ən böyük sərvəti də elə budur – zəngin daxili aləmi, dik duruşu, qüruru, sadəliyi və insanlara olan münasibəti.

69 il...

Təqvim üçün bir rəqəm.

Amma bir insan ömrü üçün minlərlə xatirə, saysız zəhmət, ailə, dostluq, sınaq, uğur, sevinc və geridə qalan izlər deməkdir.

Amma Tahir müəllimin həyatında illərlə qəlbinin bir küncündə daşıdığı başqa bir tarix də var.

Yurd həsrəti.

Onun doğulduğu Gölkənd kəndindən ayrılmasından düz 38 il keçir.

38 il...

Bu, sadəcə zaman deyil.

Bu, bir insanın doğulduğu torpağın qoxusunu, uşaqlıq xatirələrini, ata-baba yurdunun yollarını, kəndinin səsini ürəyində yaşatdığı 38 ildir.

İnsan dünyada çox şeyə sahib ola bilər.

Amma doğulduğu torpağın yerini heç nə vermir.

Tahir müəllim də 38 ildir bu həsrəti içində daşıyır.

Bu gün onun 69 yaşını təbrik edərkən mənim ən böyük arzularımdan biri də budur:

Allah ona 70 yaşını doğulduğu Gölkənddə qeyd etməyi nəsib etsin.

Elə bir gün gəlsin ki, Tahir müəllim 70 yaşının şamlarını doğulduğu torpaqda üfürsün.

Uşaqlığının keçdiyi yerlərə yenidən baxsın.

Torpağına ayaq bassın.

Bir ovuc yurd torpağını əlinə alıb 38 illik həsrətinə son qoysun.

Və bəlkə də həmin gün onun üçün ad günü deyil, ömür boyu gözlədiyi bir qovuşma günü olsun.

Çünki bəzi arzular var ki, onları sözlə ifadə etmək çətindir.

Bəzi həsrətlər var ki, illər keçdikcə azalmaq əvəzinə daha da dərinləşir.

Və bəzi torpaqlar var ki, insan onlardan uzaqda yaşasa da, o torpaqlar insanın içində yaşayır.

Tahir müəllim, arzu edirəm ki, növbəti ad gününüzü doğulduğunuz Gölkənddə qeyd etmək sizə nəsib olsun.

Qoy 70 yaşınız sizin üçün sadəcə yeni bir yaşın başlanğıcı deyil, 38 illik yurd həsrətinin sonu olsun.

Bu gün mən sizi sadəcə ad gününüz münasibətilə təbrik etmirəm.

Mən sizin yaşadığınız ömrə, qazandığınız hörmətə, yetişdirdiyiniz övladlara, sevindirdiyiniz nəvələrə və illərdir ürəyinizdə yaşatdığınız yurd sevginizə ehtiramımı bildirirəm.

Hörmətli Tahir müəllim,

Sizi 69 yaşınız münasibətilə ürəkdən təbrik edirəm.

Sizə möhkəm cansağlığı, uzun və mənalı ömür, ailənizlə birlikdə xoşbəxt günlər arzulayıram.

Arzu edirəm ki, övladlarınızın uğurlarını, səkkiz nəvənizin sevincini və gələcəkdə onların quracağı gözəl həyatları görmək sizə nəsib olsun.

Və ən böyük arzum budur:

Qoy 70 yaşınızda doğulduğunuz Gölkəndin torpağı ayaqlarınızın altında, uşaqlıq xatirələriniz gözlərinizin qarşısında, 38 illik həsrət isə artıq arxada qalsın.

Bəzən insanın ən böyük arzusu var-dövlət deyil.

Bəzən insanın ən böyük arzusu sadəcə öz torpağına qayıtmaqdır.

69 yaşınız mübarək, Tahir müəllim!

Qoy 70 yaşınızın ən böyük hədiyyəsi — YURDA QOVUŞMAQ olsun.

Hörmətlə,
Elçin Abdullayev

16 avqust 1976-cı ildə Füzuli rayonunun Dədəli kəndində anadan olan Elnur Əliyev həyatını hərbi xidmətə həsr edib. O, Azərbaycan Ordusunda mayor rütbəsində xidmət edib və 2016-cı ilin Aprel döyüşləri zamanı Vətənin müdafiəsi uğrunda şəhid olub.

Şəhid mayor ölümündən sonra dövlət təltiflərinə layiq görülüb. Onun həyat yolu və Vətənə xidmətləri bu gün də ailəsi və onu tanıyanlar üçün qürur mənbəyidir.

Elnur Əliyevin oğlu Elxan Əlizadə isə Sumqayıt şəhər Texniki və Təbiət Elmləri Liseyinin məzunudur. Elxan 2026/2027-ci tədris ili üzrə Milli Aviasiya Akademiyasının İnformasiya texnologiyaları ixtisasına əyani qəbul olub.

Elxanın bu uğuru həm ailəsi, həm müəllimləri, həm də məzunu olduğu lisey kollektivi üçün sevindirici hadisədir. Şəhid atasının adını yaşadan Elxan ali təhsil yolunda yeni mərhələyə qədəm qoyur.

Elxan Əlizadəyə tələbəlik həyatında uğurlar, təhsilində yüksək nəticələr və gələcək fəaliyyətində böyük nailiyyətlər arzulayırıq. Onun qazandığı uğurların şəhid atasının əziz xatirəsinə layiqli davam olmasını diləyirik.

Sumqayıtın yaranması və inkişaf tarixini əks etdirən videoçarx hazırlanıb. Videoda şəhərdə yaradılan ilk müəssisələr, muzey, parklar və digər mühüm obyektlərin hansı illərdə inşa edildiyi və istifadəyə verildiyi barədə məlumatlar təqdim olunur.

Video Sumqayıtın keçdiyi inkişaf yolunu, şəhərin formalaşmasında mühüm rol oynayan obyektləri və tarixi məqamları bir araya gətirir.

Videoçarx jurnalist, Azərbaycan Jurnalistlər Birliyinin üzvü Sənurə Lazımova tərəfindən hazırlanıb.

Hörmətli Cahan Əliyeva!

Sizi 65 illik yubileyiniz münasibətilə Qərbi Azərbaycan İcması Sumqayıt nümayəndəliyi adından səmimi qəlbdən təbrik edir, Sizə möhkəm cansağlığı, uzun ömür, ailə səadəti və yeni uğurlar arzulayırıq.

Siz uzun illər musiqi müəllimi kimi fəaliyyət göstərərək bilik və təcrübənizi gənc nəslin tərbiyəsinə həsr etmiş, eyni zamanda yüksək vətənpərvərlik mövqeyiniz, milli dəyərlərə bağlılığınız və fəal ictimai fəaliyyətinizlə hər zaman ətrafınızdakı insanların hörmətini qazanmısınız.

Vətənə və dövlətə sonsuz sevginiz, Azərbaycanın bütövlüyü və milli birliyi naminə nümayiş etdirdiyiniz qətiyyət Sizi tanıyan hər kəs üçün örnəkdir. Qədim Azərbaycan torpağı olan Qərbi Azərbaycanlı soydaşlarımızın ləyaqətli qayıdışı ideyasına göstərdiyiniz dəstək, Qərbi Azərbaycan İcmasının Sumqayıt nümayəndəliyinin fəaliyyətində qardaşınız Rövşən Əliyevlə birlikdə fəal iştirakınız təqdirəlayiqdir.

Sizin üçün Təbriz, Borçalı, Dərbənd, Qərbi Azərbaycan və Şimali Azərbaycan eyni amalın, eyni Vətən sevgisinin ayrılmaz hissələridir. Bu dəyərlərə sadiqliyiniz, milli ruhunuz və mübariz xarakteriniz ətrafınızdakı insanlarda Sizə qarşı böyük hörmət və rəğbət formalaşdırıb.

İnanırıq ki, bundan sonra da milli-mənəvi dəyərlərimizin qorunması, Vətən sevgisinin təbliği və cəmiyyətimizə xidmət istiqamətində fəaliyyətinizi eyni əzmlə davam etdirəcəksiniz.

65 yaşınız mübarək olsun!

Sizə möhkəm cansağlığı, firavan ömür, ailənizlə birlikdə xoş və mənalı günlər arzulayırıq.

Doğum gününüz mübarək!

Hörmətlə, Qərbi Azərbaycan İcması Sumqayıt nümayəndəliyi.

Bu gün Azərbaycan Ordusunun igid generalı, Vətən müharibəsinə aparan yolda qəhrəmanlığı ilə tarix yazan şəhid general-mayor Polad Həşimovun anım günüdür.

Sumqayit.tv xəbər verir ki, Polad Həşimov 2020-ci il iyulun 14-də Tovuz rayonu istiqamətində Ermənistan silahlı qüvvələrinin təxribatlarının qarşısını alarkən qəhrəmancasına şəhid olub.

1975-ci il yanvarın 2-də Qəbələ rayonunun Vəndam kəndində anadan olan Polad Həşimov uşaqlıq və gənclik illərini Sumqayıt şəhərində keçirib. O, 1992-ci ildən könüllü olaraq cəbhəyə yollanıb, Ağdam, Füzuli və digər istiqamətlərdə gedən döyüşlərdə iştirak edib.

Hərbi xidmət dövründə peşəkarlığı və cəsarəti ilə seçilən Polad Həşimov Aprel döyüşlərində göstərdiyi xidmətlərə görə yüksək qiymətləndirilib. 2019-cu ildə ona general-mayor ali hərbi rütbəsi verilib və daha sonra 3-cü Ordu Korpusunun Qərargah rəisi vəzifəsinə təyin olunub.

2020-ci ilin iyulunda Tovuz istiqamətində baş verən döyüşlər zamanı general-mayor Polad Həşimov, polkovnik İlqar Mirzəyev və bir qrup hərbi qulluqçumuz şəhidlik zirvəsinə ucaldı. Bu hadisə xalqımızın böyük həmrəyliyinə səbəb oldu və Vətən müharibəsində qazanılan tarixi Zəfərə aparan yolun başlanğıcı kimi yadda qaldı.

Şəhid general Bakıda II Fəxri Xiyabanda dəfn olunub. O, ölümündən sonra "Azərbaycanın Milli Qəhrəmanı" adına layiq görülüb.

Bu gün Polad Həşimovun adı Azərbaycanın müxtəlif şəhərlərində küçələrə, park və təhsil müəssisələrinə verilib. Qəhrəman generalın xatirəsi xalqımız tərəfindən böyük hörmət və ehtiramla yaşadılır.

Sumqayit.tv kollektivi olaraq Milli Qəhrəmanımız Polad Həşimovun əziz xatirəsini dərin ehtiramla yad edir, bütün şəhidlərimizə Allahdan rəhmət diləyirik. Ruhu şad olsun!

Bu gün Aprel döyüşlərinin qəhrəmanlarından biri, "Murov Qartalı" kimi tanınan şəhid polkovnik-leytenant Raquf Orucovun doğum günüdür. Yaşasaydı, qəhrəman zabit bu gün 54 yaşını qeyd edəcəkdi.

Sumqayit.tv xəbər verir ki, Azərbaycan Silahlı Qüvvələrinin polkovnik-leytenantı, Qarabağ müharibəsi qazisi Raquf Orucov 1972-ci il iyulun 12-də Ağdam rayonunun Cinli kəndində Raya və İbrahim Orucovun ailəsində anadan olub.

Ailənin ilk övladı olan Raquf Orucovun üç qardaşı və bir bacısı var idi. 1990-cı ildə sovet ordusunda hərbi xidmətə başlayan Raquf Orucov daha sonra Azərbaycan Ordusunun sıralarına qoşulub. Fərrux dağı və Aranzəmin istiqamətində gedən döyüşlər zamanı ayağından ağır qəlpə yarası alsa da, Vətənə xidmət yolundan dönməyib.

1993-cü ildə Ağdam rayonunun Cinli kəndinin işğalı zamanı anası Raya Orucova şəhid olub. Elə həmin il Bakı Ali Hərbi Ümumqoşun Komandirləri Məktəbinə sənəd versə də, bir il sonra həmin təhsil ocağına qəbul olunub. 1996-cı ildə məktəbi bitirdikdən sonra Bakıdakı hərbi hissələrdən birinə təyinat alsa da, ön cəbhədə xidmət etməyi seçərək Murovdağa yollanıb və kəşfiyyat bölüyünün komandiri kimi fəaliyyət göstərib.

2016-cı ilin Aprel döyüşləri zamanı polkovnik-leytenant Raquf Orucov son döyüşünə qatılıb. Vətənin müdafiəsi uğrunda qəhrəmancasına vuruşan zabit ömrünün 26 ilini hərbi xidmətə həsr etdikdən sonra şəhidlik zirvəsinə ucalıb.

Aprelin 5-də şəhid polkovnik-leytenant Raquf Orucov Sumqayıt şəhərində minlərlə insanın iştirakı ilə son mənzilə yola salınıb. Dəfn mərasimində Müdafiə Nazirliyinin rəhbər heyəti, döyüş yoldaşları, şəhid ailələri və şəhər sakinləri iştirak ediblər.

Bu gün doğum günündə "Murov Qartalı" Raquf Orucovun əziz xatirəsini dərin hörmət və ehtiramla yad edir, Azərbaycanın ərazi bütövlüyü və suverenliyi uğrunda canlarından keçmiş bütün şəhidlərimizə Allahdan rəhmət diləyirik. Onların göstərdiyi qəhrəmanlıq xalqımızın yaddaşında əbədi yaşayacaq.

2020-ci il iyulun 12-də Ermənistan silahlı qüvvələrinin Tovuz rayonu istiqamətində törətdiyi təxribat nəticəsində başlayan Tovuz döyüşlərindən altı il ötür.

Döyüşlər Azərbaycan-Ermənistan dövlət sərhədinin Tovuz rayonu istiqamətində baş verib və bir neçə gün davam edib. Azərbaycan Ordusu düşmənin hücumlarının qarşısını qətiyyətlə alaraq strateji mövqeləri qoruyub və hər hansı ərazi itkisinə yol verməyib.

Tovuz döyüşləri zamanı Azərbaycan Ordusunun 12 hərbi qulluqçusu, o cümlədən general-mayor Polad Həşimov və polkovnik İlqar Mirzəyev qəhrəmancasına şəhid olub. Ermənistanın atəşə tutması nəticəsində Tovuz rayonunun Ağdam kənd sakini Əziz Əzizov da həyatını itirib.

Həmin günlərdə Azərbaycan cəmiyyətində güclü birlik və həmrəylik nümayiş etdirildi. Minlərlə insan Ordumuza dəstəyini ifadə edərək şəhidlərimizin xatirəsini ehtiramla yad etdi. Tovuz döyüşləri xalq-ordu birliyinin möhkəmlənməsində mühüm rol oynadı və sonradan başlayan 44 günlük Vətən müharibəsinə gedən yolun ən vacib mərhələlərindən biri kimi tarixə düşdü.

Bu gün Azərbaycan xalqı Tovuz döyüşlərində canından keçən qəhrəman şəhidlərimizi dərin hörmət və ehtiramla yad edir, onların əziz xatirəsini daim uca tutur.

Bu gün Sumqayıt şəhər 20 nömrəli tam orta məktəbin 1983-cü il məzunlarının bir qismi illərin həsrətinə son qoyaraq yenidən görüşüb.

43 ilin xatirələrini ürəklərində yaşadan sinif yoldaşları bu görüşdə gənclik illərini, məktəb həyatının unudulmaz anlarını sevinc və kövrək duyğularla xatırlayıblar. Tədbirdə onların sevimli müəllimləri – sinif rəhbəri Rəfiqə müəllimə və riyaziyyat müəllimi Şükufə xanım da iştirak edərək məzunların sevincinə şərik olublar.

Görüş yalnız xatirələrin canlandığı bir tədbir olmayıb. İştirakçılar artıq aralarında olmayan sinif yoldaşlarını və müəllimlərini dərin ehtiramla yad edib, onların əziz xatirəsini bir dəqiqəlik sükut və xoş xatirələrlə anıblar.

İllər ötür, zaman dəyişir, amma məktəb illərində qurulan dostluqlar və müəllimlərin öyrətdiyi həyat dərsləri yaddaşlardan silinmir. Bu görüş də bir daha göstərdi ki, əsl dostluq və doğma məktəb sevgisi zamanın sınağından üzüağ çıxır, illər keçsə də ürəklərdə ilk günkü kimi yaşayır.

1985-ci ildə azərbaycanlı pilot Şamil Əlimuradov sovet sərnişin təyyarəsini qaçıraraq Çinə endirib.

Musavat.com xəbər verir ki, Dr. Professor Zaur Əliyev araşdırmasında bildirir ki, 1985-ci il dekabrın 19-da Yakutsk Mülki Aviasiya Administrasiyasına məxsus, Yakutsk–Çita–İrkutsk marşrutu üzrə 101/435 saylı reysi yerinə yetirən AN-24 təyyarəsi Çitaya yaxınlaşarkən gözlənilməz hadisə baş verdi. Təyyarənin ikinci pilotu, 1952-ci il təvəllüdlü Şamil Hacı oğlu Əlimuradov ekipajı hədələyərək marşrutu dəyişməyə və Çinə uçmağa məcbur etdi.

Məlumata görə, Əlimuradov kabinəyə daxil olaraq qapını içəridən bağlayıb və evdə hazırlanmış bıçağı təyyarə kapitanının boğazına dirəyərək Çinə istiqamət götürməyi tələb edib. Kapitan xüsusi siqnal vasitəsilə dispetçerə təyyarənin qaçırıldığını çatdıra bilib. Təyyarəni hərbi aerodroma yönəltmək cəhdi isə uğursuz alınıb və Əlimuradov kursun dəyişdirilməsinə imkan verməyib.

Təyyarə həmin gün Çində yerli kolxoz torpağına eniş edib. Hadisə barədə yerli hakimiyyət orqanlarına məlumat verilib və axşam saatlarınadək Çin hüquq-mühafizə orqanları hadisə yerinə gəlib. Rus dilini bilən əməkdaş komandirlə və Əlimuradovla danışdıqdan sonra pilot təslim olub və Çindən siyasi sığınacaq istəyib. Sərnişinlər isə şəhərə aparılaraq geyim, yemək və qalacaq yerlə təmin ediliblər.

Harbin şəhərində verdiyi izahatda Şamil Əlimuradov bildirib ki, 1969-cu ildə orta məktəbi bitirdikdən sonra Bakı Politexnik İnstitutuna daxil olsa da, maddi çətinliklər səbəbindən təhsilini yarımçıq qoyub. Daha sonra Bakı Fayans Zavodunda işləyib, 1970-ci ildə Sasovo Uçuş Məktəbinə daxil olub, 1972-ci ildə oranı bitirib. Sonrakı illərdə Kirovoqrad Ali Uçuş Məktəbində AN-24 üzrə yenidən hazırlıq keçib, 1980-ci ildə Leninqrad Mülki Aviasiya Akademiyasını başa vuraraq Yakutskda işləməyə başlayıb.

İzahatında o, SSRİ-də təzyiqlərlə üzləşdiyini, psixiatriya xəstəxanasına yerləşdirildiyini və buna görə də ölkəni tərk etmək qərarına gəldiyini yazıb. Əlimuradov "Düşmənin dostu, dostumdur" düşüncəsi ilə Çinə qaçmağa qərar verdiyini qeyd edib.

1986-cı il martın 4-də Harbində keçirilən məhkəmədə o, Çin qanunvericiliyinə əsasən səkkiz il azadlıqdan məhrum edilib. Məhkəmə prosesində SSRİ diplomatları da iştirak ediblər. Sonradan Çində müxtəlif qəsəbələrdə yaşayıb, universitetdə rus dili müəllimi işləyib və çinli qadınla ailə qurub.

Üç il sonra Əlimuradov SSRİ-yə təhvil verilib. 1990-cı il iyunun 21-də Yakutskda sovet qanunvericiliyinə əsasən daha beş il müddətinə azadlıqdan məhrum edilib.

Qaçırılan AN-24 təyyarəsi 1986-cı ilin yanvarında Sovet İttifaqına qaytarılıb. Təmirdən sonra yenidən istismara verilib və 2000-ci ildə Yakutsk hava limanında istismardan çıxarılıb.

Məlumata görə, hazırda Şamil Əlimuradov sahibkarlıqla məşğuldur, "Vahid Rusiya" partiyasının üzvüdür. O, ailəlidir. Həbsdən çıxdıqdan sonra, ilk həyat yoldaşı Çində avtomobil qəzasında vəfat etdiyi üçün qızını da yanına gətirib.