Çeçenistanın rəhbəri Ramzan Kadırov işğal olunmuş Krım Müsəlmanları Ruhani İdarəsinin rəhbəri Ayder Rustemovu təqiblərlə hədələyib.
Sumqayit.tv xarici agentliklərə istinadən xəbər verir ki, o, müftinin əsir düşmüş çeçen döyüşçülərlə söhbətinə sərt  reaksiya verib. Siyasətçi bildirib ki, məhbuslar Rusiyaya qayıtsalar, Rüstəmovdan qisas almaq üçün dərhal yenidən müharibəyə getməlidirlər.
Qeyd edək ki, bu ilin yanvarın sonunda ukraynalı bloqer Vladimir Zolkinin kanalında Kiyev tərəfindən tanınan müfti ilə aralarında 5 çeçen hərbçinin də olduğu məhbuslarla söhbətin videoyazısı dərc edilib.
Ayder Rüstəmov onlara Ukraynaya qarşı aparılan  müharibənin cinayət olduğunu söyləyib. Müftinin fikrincə, bu savaş Çeçenistan hakimiyyəti tərəfindən mütəmadi olaraq təkrarlanan cihad (müqəddəs müharibə) adlandırıla bilməz. Bu, müftinin əsir düşmüş müsəlmanlarla ikinci görüşüdür, birincisi ötən ilin avqustunda baş tutub.
Bundan sonra Ramzan Kadırov Ayder Rüstəmovun ünvanına təhqiramiz ifadələr səsləndirib.
“Harada olursansa ol, mən şəxsən səndən hesab soracam... əsirlər geri qayıtsalar cəbhədə olub, səni axtaracaqlar”,-deyə Kadırov bildirib. Onun iddiasına görə, əsir götürülmüş çeçenlər "silah gücü ilə" ukraynalı din xadiminin dediyi hər şeyi deməyə məcbur ediliblər.
Halbuki, ötən ilin oktyabr ayında Çeçenistan rəhbərinin özü iqamətgahında əsir götürülmüş ukraynalı hərbçilərlə danışıb. Ukraynalı əsirlər heç bir əsas olmadan onun yanına, Qroznıdakı iqamətgahına gətirilib. Burda onlara “səfərbər edilmiş ukraynalılardan “top yemi” kimi istifadə edildiyini deyib. Əsirlər həmin vaxt “müharibədə iştiraklarının mənasız olduğunu” deyib, eyni zamanda Rusiya təbliğatının irəli sürdüyü tezisləri səsləndiriblər.
Musavat.com