Ötən ilin fevralından Ukraynada gedən döyüşlərdə 20-dən çox rus generalı həlak olub.
Musavat.com xarici agentliklərə istinadən xəbər verir ki, bu barədə “Nikkei” qəzeti Yaponiya kəşfiyyatının əldə etdiyi məlumatlara istinadən məlumat yayıb.
Qəzetin yazdığına görə, bu qədər yüksək rütbəli zabitin ölümü Qərbdə qeyri-adi hal sayılır və Rusiya ordusunun zəifliyindən xəbər verə bilər. Materialda itkilərin siyahısı verilmir, ölənlərin adları çəkilmir.
Qeyd edək ki, son vaxtlarda dörd rus generalının ölümü ilə bağlı məlumat açıq qaynaqlarda yer alıb, “Mediazona” portalının xəbərinə görə, onlardan biri, 63 yaşlı general-mayor Konamat Botaşev hətta təqaüddə imiş. Onun Vaqner ÖHŞ-nin aviasiyasında xidmət etdiyi qeyd olunur.
Hərbi ekspertlərin fikrincə, Rusiya ordusunda generalların ölüm nisbətinin yüksək olması onların döyüş əməliyyatlarında şəxsən iştirak etmələri ilə bağlıdır. Bu, bir tərəfdən aşağı komandanlığın idarəetmə qabliyyətinin zəifliyi, digər tərəfdən isə Rusiya ordusunun çoxlu sayda yüksək rütbəli zabitlərdən ibarət strukturu ilə izah oluna bilər.
“Nikkei” qəzetinin yazdığına görə, generalların ölümü həm də Ukraynanın elektron kəşfiyyatda üstünlüyü və Rusiya ordusunun nəzarətində olan ərazilərdə yaradılmış partizan şəbəkəsinin effektiv işi ilə bağlıdır.
Yaponiyanın kəşfiyyat rəsmilərinin fikrincə, Rusiya ordusunun generalların ölümləri fonunda uğursuzluğu Çini narahat edə bilər və Pekin Moskvaya gizli şəkildə hərbi yardım göstərə bilər. Həmin yardımın konkret nədən ibarət olduğu materialda göstərilmir.