Sumqayıt Dövlət Dram Teatrı bütün kontingentdən olan tamaşaçıların estetik tələbatına uyğun repertuar siyasəti qurur. O cümlədən balacaların teatr istəkləri hər zaman yaradıcı heyətin diqqət mərkəzindədir.
Tamaşaları ilə   maraq doğurmuş teatrın quruluşçu rejissoru Fuad Kazımov bu dəfə uşaqların bədii-estetik zövqünü təmin etməkdən ötrü dünya dramaturgiyasına müraciət edib. Görkəmli macar yazıçısı və dramaturqu Dyula Urbanın siçanlarla bağlı ibrətamiz hekayəsi Fuad Kazımovun rejissor  yanaşmasında tamaşaçılara çatdırılacaq.
"Bütün siçanlar pendiri  sevir" nağılı dünyanın bir çox ölkələrində balaca tamaşaçılar üçün hazırlanıb. Sumqayıt teatrında ilk dəfə quruluş verilən bu əsər Nizami Mirzəyevin  tərcüməsi ilə teatrımızın səhnəsində artıq öz uğurlu  həllini tapıb.
Məşhur pendir zavodunun zirzəmisində yaşayan boz siçan ailəsi rahatdır. İsti yuva, çoxlvu pendir və tərbiyəli oğul ailənin xoşbəxtliyini təmin edir. Amma ağ siçan ailəsinin zirzəmiyə köçü ilə hər şey mənfiyə doğru dəyişir.  Rəng fərqi ailələri üz-üzə qoyur. Böyüklərin fikir ayrılığı bir-birinə bağlanmış Şoma və Fruji arasında məhəbbətə təsir edə bilmir.
Sehrbazın köməyi ilə əsərin qəhrəmanları- Şoma və Fruji səadətə qovuşurlar. Bütün maneələri aşa bilən, xırda hissləri üstələyən gözəl, təsirli dostluq və sevgi hekayəsi mühüm ideyanı çatdırır: rəng yox, münasibətilərin qurulması və bölüşmək düşüncəsinin formalaşması önəmlidir.
Tamaşanın quruluşçu rəssamı Elşən Sərxanoğlu, icraçı rəssamı Nizami Dadaşov, baletmeyster Kamil Ağayevdir.
Musiqi tərtibatı sənətşünaslıq üzrə fəlsəfə doktoru Telman Qəniyevə aiddir.
Premyerası ilə balaca tamaşaçıları  çox sevindirən maraqlı əsərin növbəti  nümayişi may ayının  25-i, 26-ı və həmçinin iyun ayında gerçəkləşəcək.