Sumqayit.tv xəbər verir ki, 24-30 oktyabr 2021-ci il tarixlərində Misirin Mədəniyyət Nazirliyi, Misir Mədəniyyət Sarayları Baş İdarəsi, İsmailiyyə Quberniyası ilə birgə "21-ci İsmailiyyə Beynəlxalq Folklor Festivalı" keçirilir. Ənənəvi olaraq keçirilən festivalın məqsədi dünyanın müxtəlif ölkələrində yaşayan millətlərin folklorunu, adət-ənənəsini, mədəniyyətini nümayiş etdirməklə yanaşı mədəni əlaqələrin daha da möhkəmləndirilməsidir.
"Cəngi” estrada və folklor rəqs ansamblı Azərbaycan folklorunun tanıdılması və təbliğ edilməsi məqsədilə festivalda ölkəmizi təmsil edir.
Festivalda Azərbaycan ilə yanaşı İordaniya, Konqo, Fələstin, Sudan, Meksika, İndoneziya, Nepal və digər ölkələrin kollektivləri də iştirak edir.
Festivalın açılış mərasimi İsmailiyyə Mədəniyyət Sarayında açıq teatrda keçirilib. Festival çərçivəsində kollektivlər İsmailiyyə şəhəri daxilində və xaricində müxtəlif teatrların səhnələrində çıxış edirlər.
Xatırladaq ki, festival oktyabrın 30-dək davam edəcək.