Azərbaycan Respublikasının Prezidenti, Ali Baş Komandan cənab İlham Əliyevin rəhbərliyi ilə müzəffər Ordumuz düşmən üzərində Şanlı Qələbə qazandı və 30 ilə yaxın işğal altında olan torpaqlarımız azad edildi.

Sumqayit.tv xəbər verir ki,  Əldə etdiyimiz Qələbə ölkəmizin tarixinə qızıl hərflərlə yazıldı. Dövlət başçısının "Azərbaycan Respublikasında Zəfər Gününün təsis edilməsi haqqında" 3 dekabr 2020-ci il tarixli 2314 nömrəli Sərəncamına əsasən Vətən Müharibəsində əldə etdiyimiz misilsiz qələbənin şərəfinə ölkəmizdə 8 Noyabr tarixi təntənəli şəkildə qeyd edilir.
Bununla əlaqədar Mədəniyyət Nazirliyi, Rəssamlar İttifaqı və Muzey Mərkəzinin dəstəyi və təşkilatçılığı ilə möhtəşəm qələbəmizə həsr olunan “Zəfər” adlı sərgi keçirildi. Tədbirdə çıxış edən mədəniyyət nazirinin müavini Sevda Məmmədəliyeva Azərbaycanın hazırda ən möhtəşəm və qürurverici tarixini yaşadığını qeyd etdi. Tarixi həqiqətləri, xalqımızın Qarabağ uğrunda apardığı mübarizəni, Vətən həsrətini və qazandığımız şanlı qələbəni əks etdirən bu sənət nümunələrinin gənc nəslin  maariflənməsində, vətənpərvərlik  ruhunda tərbiyə olunmasında mühüm əhəmiyyətini vurğuladı.  
Daha sonra Azərbaycan Rəssamlar İttifaqının sədri Fərhad Xəlilov çıxış edərək Qələbənin yaradıcı insanlara çox böyük müsbət təsirindən bəhs etdi. Zəfərimizə həsr etdikləri əsərləri böyük ruh yüksəkliyi və iftixar hissi ilə yaratdıqlarını bildirdi.
Sərgidə Azərbaycanın məşhur rəssamlarının, sənət ustalarının Zəfərimizə ithaf etdikləri 100-dən çox rəngkarlıq, qrafika, heykəltəraşlıq və dekorativ-tətbiqi sənət əsərləri təqdim olundu. Sərgidə Azərbaycanın Xalq rəssamları-Səlhab Məmmədov, Fərhad Xəlilov, Arif Hüseynov, Siruz Mirzəzadə ilə yanaşı, gənc nəslin də dəyərli fırça ustalarının Qarabağa və Zəfər gününə həsr etdikləri bir-birindən maraqlı əsərləri nümayiş olunur. Sonra qonaqlar bir-birindən maraqlı əsərlərin yer aldığı sərgi ilə tanış oldular.
Qeyd edək ki, Muzey Mərkəzində təşkil edilən “Zəfər” sərgisi noyabr ayının 10-dək davam edəcəkdir.