Yevlaxda itlə gəzən şəxslər polis tərəfindən saxlanılıb, bu zaman onlar “pitbull” cinsli iti polislərin üzərinə qısqırdıblar.

Sumqayit.tv “Qafqazinfo”ya istinadən xəbər verir ki, hadisə bir neçə gün əvvəl rayonun Bakıxanov küçəsində baş verib.
İttihama görə, gecə saat 03 radələrində it ilə küçədə piyada hərəkət edən şəxsləri görən polis əməkdaşları onlara yaxınlaşıb. Bu saatlarda onların küçədə və itlə gəzməsinin şübhəli olduğunu bildirən polislər həmin şəxsləri sorğu-sual edib, şəxsiyyətlərini müəyyən etməyə, küçədə hansı məqsədlə olmalarına aydınlıq gətirməyə çalışıb. Bu zaman həmin şəxslər mübahisə yaradaraq xidmət başında olan əməkdaşların tələblərinə qarşı çıxıblar. Onlar yanlarında olan “pitbull” cinsli iti polislərin üzərinə qısqırdıblar.
Bundan sonra ərazidəki polislərin köməkliyi ilə həmin şəxslər saxlanılıb. Polis şöbəsinə gətirilən şəxslərin Yevlax şəhər sakinləri: 1988-ci il təvəllüdlü E. Kazımov və 1995-ci il təvəllüdlü F.Quliyev olması müəyyən edilib. Onların barəsində protokol tərtib edilərək Yevlax Rayon Məhkəməsinə göndərilib.
Məhkəmənin qərarı ilə F.Quliyevə 8, itin sahibi olan E.Kazımova isə 15 sutka inzibati həbs cəzası verilib.