Düz 1 il öncə - 27 Sentyabr 2020-ci il tarixində bütün azərbaycanlıların ürəyi bir döyünməyə başladı. Müharibənin başladığı xəbərini alan hər kəs döyüş meydanına can atır, səfərbərlik üçün qeydiyyatdan keçir, orduya müxtəlif ləvazimatların göndərilməsi üçün yollara axışırdı. Yol boyunca uşaqdan böyüyə hər kəs əllərində bayraqlarla döyüşə yollanan əsgərlərə ruh yüksəkliyi verirdi. O döyüşçülər uzun illərin həsrətinə son qoyacaq qələbə müjdəçiləri, o yollar isə Şuşaya qədər uzanacaq zəfər yolları idi.  Uzun illər ərzində bu konfliktin sülh yolu ilə həll olunmasına çalışan Azərbaycan və münaqişənin nəinki həll olunmasına imkan verən hətta yeni torpaq iddialarına düşən xəyalpərəst Ermənistan. Bu yeni iddialar, hücumlar, atəşkəsin pozulması halları Ermənistanın sonunu gətirdi. Zəif, kasıb, hərc-mərclik hökm sürən bir dövlət yeni ərazi iddiaları ilə çıxış etməməli idi.  44 gün ərzində 30 ilə yaxın həsrətə son qoymaq təkcə rəşadət nümunəsi deyil, həm də doğru hesablanmış, düşünülmüş, planlanmış uzaqgörən siyasətin göstəricisi idi. Bəlkə, illər öncə də müharibə yolu ilə torpaqları geri almaq olardı, amma o zaman daha çox insan itkisinə, texnika sərfiyyatına və zamana ehtiyac olardı. Doğru zamanı gözləmək, sərrast planlar qurmaq və dünya miqyasında uğurlu siyasət aparmaq bu müharibənin cəmi 44 gün ərzində başa çatmasına səbəb oldu.  Bu gün müzəffər Ali Baş Komandanın həyata keçirdiyi siyasət hələ illər öncə ulu öndər Heydər Əliyevin əsasını qoyduğu siyasətin uğurla davam etdirilməsidir. Hələ 20 illər öncə yeni nəslin vətənpərvər ruhda tərbiyə olunması üçün planlar işlənib hazırlanmışdı. Ömrünün bahar çağında canını vətənə qurban verməyə hazır olmaq yalnız uğurlu planlanmış tərbiyənin, vətənpərvərlik ruhunun göstəricisidir. Müharibəyə yollanan hər bir əsgərin ali məqsədi torpaqları işğaldan azad etmək, lazım gələrsə bu yolda şəhidlik zirvəsinə ucalmaq idi. Vətən bizim namusumuzdur, namusunu hifz etməyə, bayrağını yüksəltməyə, cümlə gənclər müştaqdır! Bu gün o bayraq Şuşada dalğalanır. Və əgər Ermənistan öz sərsəm xəyallarından əl çəkməzsə, bayrağımız tarixi Azərbaycan torpağı olan İrəvanda da ən qısa zamanda dalğalanacaq. Eşq olsun Azərbaycan ordusuna! Eşq olsun müzəffər Ali Baş Komandanımıza!

İmza: Əvəz Abılov