Bakı-Sumqayıt şossesinin Abşeron rayonu, Xırdalan şəhəri ərazisindən keçən hissəsində avtomobildə yanğın baş verib.
Bəlkə də əksəriyyətimiz bu xəbəri oxuyanda “Qarlı-şaxtalı gündə də maşın yanar” deyə öz-özümüzə sual vermişik. Bəs avtomobillər niyə yanır?
Mövzu ilə bağlı avtomobil ustası Əziz Abbasov Bakıvaxtı.az-la fikirlərini bölüşüb.
O bildirib ki, avtomobillərdə yanğın hadisələrinin əsas səbəblərindən biri elektrik sistemində yaranan nasazlıqlardır. Xüsusilə, istehsalçı tərəfindən nəzərdə tutulmayan, sonradan quraşdırılan avadanlıqlar - LED işıqlar, ambians işıqlandırma, maqnitofonlar, səs gücləndiricilər və digər cihazlar düzgün montaj olunmadıqda, naqillərdə həddindən artıq yüklənmə yarada bilər. Bu da zamanla qızmaya və qısaqapanmaya səbəb olur.
“Qarlı və yağışlı havada avtomobilin elektrik sistemində mövcud olan açıq naqillər nəmlənmə nəticəsində qısaqapanma yaradaraq yanğına səbəb ola bilər. Eyni zamanda, mühərrik hissəsində yığılan duzlu su qarışığı elektrik detallara zərər verə və izolyasiya qatını aşındıra bilər. Buna görə də avtomobil sahibləri mütəmadi olaraq elektrik sistemini yoxlatmalı və əlavə avadanlıqları yalnız peşəkar ustalara quraşdırmalıdırlar”,- deyə usta vurğulayıb.

Əziz Abbasov, avtomobil ustası
Onun sözlərinə görə, avtomobillərdə baş verən yanğınların qarşısını almaq üçün standartlara uyğun qoruyucular və keyfiyyətli naqillərdən istifadə edilməlidir. Həmçinin, elektrik sistemində hər hansı müdaxilə edildikdə, işin peşəkarlar tərəfindən görülməsi vacibdir.
"Avtomobilinizin təhlükəsizliyi üçün elektrik sisteminə daim nəzarət edin və nasazlıqları vaxtında aradan qaldırın",- deyə Əziz Abbasov qeyd edib.