Ali Məhkəmədə xuliqanlıq niyyəti ilə qəsdən sağlamlığa ağır zərər vurmada təqsirləndirilən Rövşən İsmayılzadənin barəsindəki qərardan verilən kassasiya şikayəti üzrə məhkəmə iclası başa çatıb.
Sumqayit.tv xəbər verir ki, Pravda.az-ın əldə etdiyi məlumata görə, hakim Teyyub Muxtarovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilib, Sumqayıt Ağır Cinayətlər Məhkəməsinin 6 il 6 ay müddətinə azadlıqdan məhrumetmə hökmü dəyişdirilib. Məhkumun əməli Cinayət Məcəlləsinin 126.2.4-cü (xuliqanlıq niyyəti ilə qəsdən sağlamlığa ağır zərər vurma) maddəsindən həmin Məcəllənin 126.1-ci (qəsdən sağlamlığa ağır zərər vurma) maddəsinə tövsif olunub və cəzası 4 ilə endirilib.

İttihama görə, hadisə 4 fevral 2023-cü il tarixdə, saat 18 radələrində Sumqayıt şəhəri, 2-ci mikrorayonda yerləşən binaların birinin qarşısında qeydə alınıb.

Belə ki, Rövşən İsmayılzadənin tanışı, zərərçəkmiş Vüqar Yaqubova pul borcu olub. Zərərçəkmiş də ondan borcunu nə vaxt verəcəyini soruşub və borc barədə söhbət etmək üçün onu çayxanaya dəvət edib. Təqsirləndirilən şəxs isə bunları özü üçün qəbul edilməz hal kimi qiymətləndirib. Sonra o, turist bıçağı ilə qəsdən Vüqarın qarnına vuraraq, ona ağır bədən xəsarəti yetirib.

Sumqayıt Ağır Cinayətlər Məhkəməsinin hökmü ilə Rövşən İsmayılzadə 6 il 6 ay müddətinə azadlıqdan məhrum edilib. Sumqayıt Apellyasiya Məhkəməsi apellyasiya şikayətini təmin etməyib.