Azərbaycanda qanunsuz tikililərin rəsmiləşdirilməsi ilə bağlı işlər çərçivəsində Sumqayıt Şəhər İcra Hakimiyyətinin də daxil olduğu işçi qrupu fəaliyyətə başlayıb.

Sumqayit.tv xəbər verir ki, Əmlak Məsələləri Dövlət Xidmətinin rəis müavini Rüstəm Şahbazovun sözlərinə görə, artıq mühafizə zonalarında yerləşən sənədsiz tikililərlə bağlı qanun layihəsi hazırlanır. Bu məqsədlə Bakı, Abşeron, Sumqayıt icra hakimiyyətləri, Ədliyyə Nazirliyi, Şəhərsalma və Arxitektura Komitəsi ilə birgə işçi qrupu yaradılıb.

Layihənin məqsədi, sənədsiz və mühafizə zonalarında inşa olunan tikililərin hüquqi statusunun müəyyənləşdirilməsi, mülkiyyət hüquqlarının rəsmiləşdirilməsi və sahibkarların bank, sığorta, kredit imkanlarından yararlana bilməsinə şərait yaratmaqdır.

Ekspertlərin fikrincə, mühafizə zonalarının sərhədlərinə yenidən baxılması yüzlərlə Sumqayıtda yerləşən ev və obyektin sənədləşdirilməsinə imkan verə bilər. Bu isə şəhərdə həm vətəndaşların hüquqlarını, həm də sahibkarlıq mühitini gücləndirəcək.