Sumqayıt Apellyasiya Məhkəməsində dələduzluqda təqsirləndirilən Kərim Nəbizadənin (adı, soyadı şərtidir) işi üzrə iclasa baxılıb.

Sumqayit.tv Pravda.az-a istinadən xəbər verir ki, hakim Rəşadət Ağayevin sədrliyi ilə keçirilən prosesdə zərərçəkmiş M.M. (adı, soyadı şərtidir) apellyasiya şikayətindən imtina edib. O, təqsirləndirilən şəxslə barışdığını və hər hansı şikayətinin olmadığını bildirib. Məhkəmə şikayətin geri götürülməsini qəbul edərək, işə baxılmasına xitam verib.

İttihama görə, Kərim Nəbizadə 2015-ci ildə Sumqayıt şəhərində tanışı M.M.-ə Birləşmiş Ərəb Əmirliklərindən 6 ədəd “Hyundai” markalı avtobus alınacağı barədə yalan məlumat verib. O, avtobusların satılaraq və icarəyə verilərək gəlir gətirəcəyi vədi ilə ümumilikdə 90 min manat pulu dələduzluq yolu ilə ələ keçirib.

Sumqayıt Ağır Cinayətlər Məhkəməsinin hökmü ilə Kərim Nəbizadəyə şərti cəza təyin olunmuşdu.