Bakı–Sumqayıt yolunda sürücülərin və sərnişinlərin rahatlığını təmin etmək məqsədilə yeni tədbirlər görülüb.

Sumqayıt və Xırdalan şəhərləri, eləcə də Masazır qəsəbəsindən Bakı istiqamətinə hərəkət edən avtobusların Masazır dairəsindən keçməklə rahat və maneəsiz şəkildə paytaxta çatması üçün Azərbaycan Yerüstü Nəqliyyat Agentliyi (AYNA) tərəfindən dairədən başlayaraq xüsusi hərəkət zolağı təşkil edilib.

Yeni zolaq artıq effektivliyini sübut etmiş Bakı–Sumqayıt şossesindəki mövcud avtobus zolağı ilə birləşdirilib. Bunun nəticəsində paytaxt istiqamətində hərəkət edən avtobuslar sərnişinləri əlavə vaxt itkisinə məruz qalmadan və sıxlıq olmadan daşıya biləcək.

Məlumata görə, təşkil edilən xüsusi hərəkət zolağı ilə 10 marşrut xətti üzrə 130 avtobus ümumilikdə gündə 650 dəfə reys həyata keçirir. Bu avtobuslardan istifadə edən 40 minə yaxın sərnişinin rahat və fasiləsiz daşınması təmin olunur.

Yeni tədbir Bakı–Sumqayıt istiqamətində ictimai nəqliyyatın keyfiyyətini artırmaq, sıxlığı azaltmaq və sərnişinlərin hərəkətini daha komfortlu etmək məqsədi daşıyır.