Son günlər qiymət artımı ilə bağlı narahatlıqlar yenidən gündəmə gəlib. Yeni ilin yaxınlaşması ilə vətəndaşları ən çox düşündürən suallardan biri də 2026-ci ildə hansı məhsulların bahalaşacağı ilə bağlıdır. Maraqlıdır, Yeni ildən hansı məhsullarda bahalaşma ola bilər?

Sumqayit.tv xəbər veie ki, bu barədə konkret.az-a danışan iqtisadçı Xalid Kərimli bildirib ki, ölkədə gələn il üzrə inflyasiya təqribən 5,3 faiz səviyyəsində proqnozlaşdırılır.

Onun sözlərinə görə, bu il orta illik inflyasiya göstəricisi 6 faiz civarında olub. Xüsusilə, ərzaq məhsullarında qiymət artımı daha çox müşahidə edilib:

“Bu ilin statistikasına baxanda görürük ki, ərzaq məhsullarında inflyasiya qeyri-ərzaq məhsullarına nisbətən daha yüksək olub. Gələn il üçün inflyasiya proqnozu məhsul növləri üzrə ayrı-ayrılıqda verilmir.

Çünki qiymət dəyişiklikləri bir çox amillərdən asılıdır – idxal bazarlarının vəziyyəti, dünya qiymətlərində dəyişikliklər, Tarif Şurasının qərarları və digər faktorlar bu prosesə təsir edir”.

İqtisadçı qeyd edib ki, hökumətin ümumi inflyasiya proqnozu bəzi sahələrdə qiymət artımının davam edəcəyinə işarədir:

“Tarif Şurasının hansı qiymətləri artıracağı hökumətin qərarından asılı olacaq. Ümumi şəkildə həm ərzaq, həm də qeyri-ərzaq məhsullarında artım gözlənilir. Xüsusilə ət məhsullarında ucuzlaşma ehtimalı yoxdur. Əksinə, qiymətlərin sabit qalması və ya artması mümkündür. Ümumi qiymət artımı bu il olduğu kimi gələn il də davam edəcək”.

Beləliklə, yeni ildən xüsusilə ərzaq məhsullarında, o cümlədən ət və digər istehlak məhsullarında bahalaşma ehtimalı yüksək olaraq qalır.