Azərbaycanda valideynlik bacarıqlarının gücləndirilməsinə yönəlmiş “Atalar məktəbi” proqramının icrasına start verilib.
Sumqayit.tv xəbər verir ki, Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin sosial sifarişi əsasında “Forest School Azerbaijan” tərəfindən “Atalar məktəbi” proqramının icrasına başlanılıb. Layihə ailələrin çətin həyat şəraitinə düşməsinin qarşısının alınması və valideynlərin məsuliyyətli valideynlik bacarıqlarının artırılmasına dəstək göstərməyi hədəfləyir.
Proqramın əsas məqsədi ataların valideynlik prosesində aktiv iştirakını gücləndirmək, ailədaxili münasibətlərin sağlam əsaslarla qurulmasına töhfə vermək, həm oğlan, həm də qız uşaqlarının ailədə bərabər dəyərə malik fərdlər kimi qəbul olunmasını təşviq etməkdir. Bununla yanaşı, uşaqların fiziki və psixoloji inkişafının daha effektiv şəkildə dəstəklənməsi də layihənin prioritetləri arasındadır.
Layihə çərçivəsində müvafiq bilik və təcrübəyə malik 10 təlimçi seçilərək xüsusi hazırlıq təlimlərindən keçib. Təlimləri tamamlayan fasilitatorlar dekabr ayı ərzində bölgələrdə atalar üçün maarifləndirici sessiyalara başlayacaqlar.
Proqram Sabunçu və Binəqədi rayonları ilə yanaşı, Sumqayıt, Gəncə, Lənkəran, Xırdalan, eləcə də Masallı, Cəlilabad, Tovuz və Şəmkir rayonlarını əhatə edəcək. Ümumilikdə 250 ata layihəyə birbaşa cəlb olunacaq.
5 dekabr 2025-ci il tarixində layihənin təqdimat mərasimi və məlumatlandırma sessiyası keçirilib. Tədbirin məqsədi proqramın məqsəd və əhatə dairəsini ictimaiyyətə təqdim etmək, təlim keçmiş fasilitatorlarla görüşmək və bölgələrdə fəaliyyətə başlamadan öncə koordinasiya yaratmaqdan ibarət olub.
Beynəlxalq araşdırmalar göstərir ki, ataların ailə həyatında aktiv iştirakı çətin şəraitdə yaşayan ailələrin rifahını artırır, eyni zamanda sağlam ata–övlad münasibətləri uşaqların sosial bacarıqlarını və psixoloji dayanıqlığını gücləndirən əsas amillərdəndir.
8-12-2025, 12:01
54
