Azərbaycanda telekommunikasiya üzrə şikayətlərin yarısı internetlə bağlıdır

Sumqayit.tv xəbər verir ki, bu ilin noyabr ayında "E-Şikayət" sisteminə daxil olan telekommunikasiya şikayətlərinin yarısı internet xidmətləri ilə bağlı olub.

Rəqəmsal İnkişaf və Nəqliyyat Nazirliyi yanında İnformasiya Kommunikasiya Texnologiyaları Agentliyindən (İKTA) bildirilib ki, noyabr ayında sistemə telekommunikasiya və poçt xidmətləri üzrə ümumilikdə 484 müraciət daxil olub. Bu müraciətlərin 48,2 %-i sabit internet və telefon rabitəsi, 34,9 %-i mobil internet və rabitə, 16,9 %-i isə poçt xidmətlərinə aid olub. Hər gün orta hesabla sistemə 16 şikayət daxil olub.

Telekommunikasiya xidmətləri üzrə daxil olan 402 müraciətin 50 %-i sabit internet (GPON, ADSL və s.) xidmətləri ilə bağlıdır. Mobil internet və rabitə üzrə şikayətlər 42,1 %, telefon rabitəsi üzrə isə 7,9 % təşkil edib. İnternet xidmətləri üzrə ən çox müraciətlər (24,9 %) xidmətin işləməməsi və keyfiyyət problemləri ilə bağlı olub.

Sumqayıt üzrə müraciətlər də diqqət çəkir: vətəndaşların 7,64 %-i müraciət edərkən Sumqayıtı ünvan olaraq göstərib. Əksər hallarda şikayətlər internet xidmətlərinin keyfiyyəti, mobil tariflər və poçt xidmətlərinin gecikməsi ilə bağlı olub.

Poçt rabitəsi üzrə daxil olan 82 müraciətin 73,2 %-i göndərişlərin gecikdirilməsi, çatdırılmaması və ya itirilməsi ilə bağlı olub.

Qeyd edək ki, "E-Şikayət" sistemindən noyabr ayında daxil olan müraciətlərin 91,1 %-ni kişi, 8,9 %-ni isə qadın vətəndaşlar təşkil edib.

19-12-2025, 16:23 74