Xalq şairi Sabir Rüstəmxanlı Azərbaycanın tarixşünaslığında, maarifçiliyində, elm, ədəbiyyat tarixində müstəsna yeri və xidmətləri olan Abbasqulu ağa Bakıxanov Qüdsinin Qubanın Amsar kəndində yerləşən ev muzeyinin bərbad vəziyyətdə olmasından şikayətlənib.

Bu barədə Sabir Rüstəmxanlı bildirib ki, ev muzeyi köhnə binada yerləşir və yararsız vəziyyətdədir:

“Bina çox köhnədir, divarlar çatlayıb və isitmə sistemi yoxdur. Muzeyin iki nəfər işçisi var, onlar əyinlərində palto titrəyə-titrəyə durmuşdular”.

Xalq şairi deyib ki, muzeyin ciddi ekspozisiyası yoxdur:

“Mən anlayıram ki, Bakıxanovun yaşadığı vaxtdan çox zaman keçib. Lakin muzey yaratmaq fəlsəfəsi dünyada geniş yayılıb. Ora Bakıxanovun özünə məxsus əşyaları yığmaqla, onun sözlərini divara yazmaqla muzey yaratmaq olmaz.

Mikayıl Müşfiqin Xızı yolundakı muzeyi də eyni vəziyyətdədir. O muzeydə nümayiş etdirmək üçün nə var ki?! Köhnə yazı stoluna qələm və vərəq qoymaqla muzey olur? Müşfiqin muzeyi əslində 30-cu illərin ab-havasını özündə əks etdirməlidir.

Repressiya qurbanları, Müşfiqin əlaqəsi olduğu adamlar, dostları və o vaxtın ədəbi mühiti muzeydə əks olunmalıdır. Mən bunun nümunələrini görmüşəm. Almaniyada Yohann Volfqanq Götenin muzeyində olmuşam. Orada təkcə Götenin öz yaradıcılığı, ona məxsus olan əşyalar nümayiş etdirilmir, o dövrdə yazıçının bağlı olduğu rəssamlar, sənətkarlar, ona təsir edib duyğulandıran mühit göstərilir. Bakıxanov çox geniş əhatəsi olan bir adam olub. Çar ordusunda xidmət edib, Peterburqda, Varşavada yaşayıb. Aleksandr Puşkinin ailəsi ilə yaxın olub. Onun haqqında oxuyanda nə qədər geniş çevrəsinin olduğunu görmək olur. Muzey əslində Bakıxanovların çevrəsini, Bakı və Quba mühitindəki həyatlarını yığcam formada əks etdirməlidir.

Bakıxanov xan oğlu olub. Onun muzeyini niyə köhnə binada saxlayırlar? Ona yaraşan bir bina tapılmadı? Mən Tatarıstanda Abdulla Tuqayın ev muzeyində olmuşam. O, 24 yaşında ölüb. Bu yaşda adamın nə irsi qala bilər ki? Amma ona 3 mərtəbəli bina ayrılıb və orada yaşadığı mühit göstərilib.

Səməd Vurğunun və Rəsul Rzanın ev muzeyi normaldır. Ancaq Bakıxanov və Müşfiqin muzeyinin vəziyyəti məni çox kədərləndirdi. Mədəniyyət Nazirliyi bu işlərə diqqət ayırmalıdır”.

Məsələ ilə bağlı Mədəniyyət Nazirliyindən Musavat.com-un sorğusuna cavab olaraq bildirilib ki, muzeyin mövcud vəziyyəti barədə Nazirlik məlumatlıdır. Bakıxanovlar nəslinin nümayəndələri tərəfindən də qeyd olunan problemə dair Nazirliyə müraciətlər olunub:

“Mədəniyyət Nazirliyi tərəfindən mütəmadi olaraq muzeylərin cari və əsaslı təmiri, ekspozisiyasının bədii tərtibatı, maddi texniki bazasının yaxşılaşdırılması istiqamətində işlər aparılır.

Bakıxanovun ev-muzeyində təmir-bərpa işlərinin aparılması, o cümlədən muzey ekspozisiyasının müasir standartlara uyğun yenidən qurulması məsələsinə regionlarda muzey müəssisələrinin fəaliyyətinin optimallaşdırılması və daha təkmil muzey işinin təşkili istiqamətində aparılan islahatlar çərçivəsində baxılacaq”. /Musavat.com

23-01-2026, 15:43 48