Sumqayıt şəhərində keçirilən toy mərasimi zamanı 49 yaşlı şəxs rəqs edərkən qəfil vəziyyəti pisləşib və həyatını itirib. Son dövrlərdə toy məclislərində ölüm hallarının artması və infarkt riskinin gəncləşməsi cəmiyyətdə ciddi narahatlıq doğurur. Belə hadisələr sağlam həyat tərzi və ürək-damar problemlərinə diqqətin artırılmasının vacibliyini bir daha göstərir.

Sumqayit.tv xəbər verir ki, məsələ ilə bağlı Demokrat.az-a açıqlama verən tibb eksperti, professor Adil Qeybulla bildirib ki, bu hadisələr qəflət ölüm hallarının ümumi artımına işarə edir: Ekspertin sözlərinə görə, ürək-damar xəstəliklərinin sürətlə gəncləşməsi və toy kimi emosional mühitlərdə yaranan gərginlik bu cür faciələri qaçınılmaz edir.

“Toy məclisləri və digər kütləvi toplanma tədbirlərində bu halların baş verməsi daha çox müşahidə olunur. Həm erkən yaşda ürək-damar xəstəliklərinin meydana çıxması, həm də onlardan qaynaqlanan ölüm hallarının artması artıq günümüzün reallığıdır”.

Ekspert əlavə edib ki, toyda müxtəlif yaş və sağlamlıq göstəricilərinə malik insanlar iştirak edir və bu halların baş verməsi dünyanın hər yerində mümkündür:

“Lakin bu hadisələrin tezləşməsi statistik göstəricilərə də öz təsirini göstərir. Ürək-damar xəstəlikləri artıq insanlar arasında artmaqdadır və daha gənc yaşlarda müşahidə edilir. Məsələn, 50 yaşında 10 kişini götürsək, onların 3–4-də stent və digər ürək problemləri olur, hətta bəzi hallarda ürək əməliyyatı da keçirilib”.

Adil Qeybulla vurğulayıb ki, 30–40 il əvvəl belə hallar demək olar ki, müşahidə olunmurdu:

“Bu gün isə qəflət ölüm hallarının artması diqqət çəkir. Qəflət ölümünün əsas səbəblərindən biri dərin ven trombozudur, həmçinin üzən tromblar ürək və beyin damarlarında problemlər yarada bilər. Bundan əlavə, ürəyin elektrik fəaliyyətindəki pozulmalar də qəflət ölümlərə səbəb ola bilər. Təəssüf ki, bu cür halların sayı günbəgün artır”.

Artıq yaş faktoru ürək tutmaları üçün bir sığorta deyil. Xüsusilə yüksək səs, emosional gərginlik və fiziki aktivliyin (rəqs kimi) birləşdiyi toy məclisləri gizli ürək problemləri olan şəxslər üçün "mina sahəsi"nə çevrilə bilər. Vətəndaşlara mütəmadi olaraq kardioloji müayinədən keçmək və bədənin verdiyi kiçik siqnallara qarşı biganə qalmamaq tövsiyə olunur.