Ombudsmanın bərabərlik hüququnun təmini və ayrı-seçkiliyin qarşısının alınması üzrə müstəqil monitorinq mexanizmi çərçivəsində Sumqayıt şəhərində də baxış keçirilib.

Sumqayit.tv xəbər verir ki, Ombudsman Aparatının yaydığı məlumata görə, monitorinq zamanı əməkdaşlar Bakı, Sumqayıt, Gəncə, Mingəçevir, Göygöl, Quba, İsmayıllı və Lənkəran da daxil olmaqla bir sıra bölgələrdə digər millətlərə və dinlərə mənsub şəxslərə aid qəbiristanlıqlara və memorial obyektlərə baxış keçiriblər.

Bildirilir ki, “Şəhərsalma və Memarlıq İli” çərçivəsində həyata keçirilən monitorinqin məqsədi müxtəlif dövrlərdə salınmış qəbiristanlıqların mövcud vəziyyətinin qanunvericiliyin və beynəlxalq öhdəliklərin tələblərinə uyğunluğunu qiymətləndirmək, həmçinin onların mühafizəsi və istifadəsində bərabərlik prinsipinə riayət olunub-olunmamasını araşdırmaq olub.

Hesabatda qeyd olunub ki, Sumqayıt şəhərində II Dünya müharibəsindən sonra ölkəmizdə yaşamış alman əsirlərinin dəfn edildiyi qəbiristanlıq da monitorinq edilən ərazilər sırasında yer alıb.

Aparılan baxışlar zamanı qəbiristanlıqların ərazisində qanunsuz tikinti və ya təyinatdan kənar istifadə halları aşkar edilməyib. Bu isə tarix və mədəniyyət abidələrinin qorunması ilə bağlı tələblərə ümumilikdə əməl olunduğunu göstərir.

Eyni zamanda, bəzi ərazilərdə texniki xarakterli çatışmazlıqların olduğu bildirilib və müvafiq qurumlara tövsiyələr verilib. Tövsiyələr arasında tarixi qəbiristanlıqlara nəzarətin gücləndirilməsi, məlumatlandırıcı lövhələrin quraşdırılması, abadlıq işlərinin ardıcıl aparılması və gənclər arasında multikultural dəyərlərin təbliğinin davam etdirilməsi də yer alıb.

19-03-2026, 20:11 74