Son günlər müşahidə olunan güclü və fasiləsiz yağıntılar nəticəsində Sumqayıt şəhərinin bəzi ərazilərində çətinliklər yaranıb. Mövcud vəziyyətin operativ şəkildə aradan qaldırılması məqsədilə aidiyyəti qurumlar tərəfindən gücləndirilmiş iş rejimi tətbiq olunub.

Hazırda şəhərin müxtəlif ərazilərində su basmış sahələrin təmizlənməsi, yağış sularının kənarlaşdırılması, kanalizasiya xətlərinin açılması və digər zəruri tədbirlər həyata keçirilir.

Sumqayıt Şəhər İcra Hakimiyyəti, Fövqəladə Hallar Nazirliyi və ADSEA-nın yerli qurumları, eləcə də bələdiyyələr və inzibati ərazi dairəsi üzrə nümayəndəliklər koordinasiyalı şəkildə fəaliyyət göstərir.

Bununla yanaşı, şəhər rəhbərliyinin nəzarəti altında yaradılmış xüsusi qərargah 24 saat fasiləsiz işləyir. Qərargaha daxil olan məlumatlara dərhal reaksiya verilir və operativ qurumlarla birgə problemlərin qısa müddətdə aradan qaldırılması istiqamətində zəruri addımlar atılır.

Eyni zamanda, vətəndaş müraciətlərinin operativ qəbulu üçün qaynar xətt fəaliyyət göstərir. Daxil olan müraciətlər dərhal araşdırılır və müvafiq qurumlarla birlikdə təxirəsalınmaz tədbirlər görülür.

29-03-2026, 17:14 48