Qazaxıstan Respublikasının Xalel Dosmuxamedov adına Atırau Universitetinin nümayəndə heyəti akademik mübadilə proqramı çərçivəsində Sumqayıt Dövlət Universitetində (SDU) səfərdədir.

Sumqayit.tv xəbər verir ki, mayın 12-də SDU-nun rektoru, texnika elmləri doktoru, professor Nurəli Yusifbəyli proqram iştirakçılarını qəbul edib.

Görüş zamanı SDU ilə Atırau Universiteti arasında imzalanmış Anlaşma Memorandumu çərçivəsində həyata keçirilən əməkdaşlığın əhəmiyyətindən danışılıb. Rektor Nurəli Yusifbəyli tədris və elmi fəaliyyət sahəsində təcrübə mübadiləsinin hər iki ali təhsil müəssisəsi üçün faydalı olacağını bildirib.

O qeyd edib ki, SDU müəllimlərinin də daha əvvəl Atırau Universitetində oxşar proqramda iştirakı əməkdaşlığın inkişafına töhfə verib. Bildirilib ki, tərəflər arasında “Azərbaycan-Qazaxıstan iqtisadi əlaqələrinin strateji aspektləri” adlı kollektiv monoqrafiyanın hazırlanması nəzərdə tutulur.

Atırau Universitetinin nümayəndə heyətinin rəhbəri, İqtisadiyyat və hüquq fakültəsinin dekanı, dosent Rayxan Utaliyeva göstərilən qonaqpərvərliyə görə təşəkkürünü bildirib və universitetlərarası əməkdaşlığın genişlənməsinin vacibliyini vurğulayıb.

Qeyd edək ki, iki həftəlik proqram çərçivəsində seminarlar, dəyirmi masalar, elmi müzakirələr və birgə akademik görüşlərin keçirilməsi planlaşdırılır.

13-05-2026, 10:58 388