Bakıda həyata keçirilən iri yol infrastrukturu layihələri çərçivəsində Bilgəh-Novxanı-Pirşağı-Sumqayıt avtomobil yolu üzrə işlər davam edir.
Sumqayit.tv xəbər verir ki, bunu Azərbaycan Avtomobil Yolları Dövlət Agentliyinin (AAYDA) rəsmisi Fariz Əzizov Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində bildirib.
Onun sözlərinə görə, layihə M1 Bakı–Quba avtomagistralını M4 Bakı–Şamaxı avtomagistralı ilə birləşdirəcək.
Qeyd olunub ki, yeni yol vasitəsilə regional nəqliyyatın Bakının mərkəzinə daxil olmadan hərəkəti mümkün olacaq. Layihənin xüsusilə Sumqayıt və Abşeron istiqamətində yaşayan sakinlərin nəqliyyat hərəkətinə müsbət təsir göstərəcəyi bildirilir.
Fariz Əzizov vurğulayıb ki, layihə tıxacların azalmasına, logistikanın sürətlənməsinə və paytaxt üzərində ekoloji təzyiqin aşağı düşməsinə xidmət edəcək.
Bundan başqa, Bakıda Həsən Əliyev küçəsindən “Koroğlu” metro stansiyasına qədər uzanacaq yeni avtomobil yolu layihəsinin də təxminən 50 faizinin icra olunduğu açıqlanıb.