Milli Məclis "Azərbaycan Respublikasının 2025-ci il dövlət büdcəsinin icrası haqqında" qanun layihəsini üçüncü oxunuşda qəbul edib.

Sumqayit.tv xəbər verir ki, məsələ parlamentin bugünkü növbədənkənar plenar iclasında müzakirəyə çıxarılıb.

Qəbul edilən sənədə əsasən, hesabat ilində dövlət büdcəsinin gəlirləri 38 milyard 356 milyon manat proqnoza qarşı 39 milyard 184,6 milyon manat təşkil edib. Bu, proqnozdan 828,6 milyon manat və ya 2,2 faiz, 2024-cü illə müqayisədə isə 2 milyard 22,8 milyon manat və ya 5,4 faiz çoxdur.

Hesabata görə, dövlət büdcəsinin gəlirlərinin ümumi daxili məhsulda (ÜDM) xüsusi çəkisi 30,4 faiz olub ki, bu da ötən illə müqayisədə 1 faiz yüksəkdir.

Bildirilib ki, büdcə gəlirlərinin 16,4 milyard manatı vergi orqanlarının, 6,4 milyard manatı gömrük orqanlarının daxilolmaları, 14,5 milyard manatı isə Azərbaycan Respublikası Dövlət Neft Fondundan dövlət büdcəsinə transfert hesabına formalaşıb. Qalan hissə digər gəlir mənbələri, o cümlədən ödənişli xidmətlər, dövlət əmlakının icarəsi və sair daxilolmalar hesabına təmin edilib.

Müzakirələrin sonunda qanun layihəsi səsə qoyularaq üçüncü oxunuşda qəbul edilib.

30-06-2026, 11:43 65