Azərbaycanda broyler toyuqlarının yetişdirilməsində hormonlardan istifadə olunmur.
Sumqayit.tv xəbər verir ki, bunu Azərbaycan Qida Təhlükəsizliyi Agentliyinin (AQTA) sədri Qoşqar Təhməzli "Trend" İnformasiya Agentliyinə və "Xəzər" TV-yə birgə müsahibəsində bildirib.
AQTA sədri qeyd edib ki, ölkədə quşçuluq təsərrüfatları üzərində mütəmadi dövlət nəzarəti həyata keçirilir və broyler toyuqlarının hormonlarla yetişdirilməsi barədə yayılan iddialar həqiqəti əks etdirmir.
Onun sözlərinə görə, qida təhlükəsizliyi ilə yanaşı, yem təhlükəsizliyi də ciddi şəkildə nəzarətdə saxlanılır. Bu isə həm quş ətinin, həm də yumurtanın təhlükəsizliyinin təmin olunmasına xidmət edir.
Qoşqar Təhməzli bildirib ki, bu günədək 100-ə yaxın quşçuluq müəssisəsində 163 dövlət nəzarəti tədbiri keçirilib, 85 halda normativ tələblərin pozulması aşkarlanıb. Bununla yanaşı, 300-dən çox laborator ekspertiza aparılıb.
AQTA sədri vurğulayıb ki, indiyədək aparılan laborator müayinələr zamanı nə quş ətində, nə də yumurtada antibiotik və hormon qalıqları aşkar edilməyib.
30-06-2026, 21:22
60
