Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyası itkin düşmüş şəxslərlə bağlı müraciətlərin elektron qaydada qəbulunu təmin edən Onlayn Sorğu Mərkəzini (OIC) istifadəyə verib.
Sumqayit.tv xəbər verir ki, bu barədə Dövlət Komissiyası məlumat yayıb.
Bildirilib ki, yeni platforma Dövlət Komissiyası ilə İtkin düşmüş şəxslər üzrə Beynəlxalq Komissiyanın (ICMP) əməkdaşlığı çərçivəsində yaradılıb. Sistem itkin düşmüş şəxslərlə bağlı məlumatların vahid elektron bazada toplanmasına, dövlət qurumları arasında operativ məlumat mübadiləsinə və vətəndaş müraciətlərinin daha çevik araşdırılmasına imkan yaradır.
Portal vasitəsilə vətəndaşlar itkin düşmüş şəxslər barədə məlumat təqdim edə, Dövlət Komissiyasına elektron sorğu göndərə, ehtimal olunan məzar və ya dəfn yerlərinin koordinatlarını paylaşa, fotoşəkil və digər sənədləri sistemə yükləyə bilərlər.
Qeyd olunub ki, portal tam Azərbaycan dilində fəaliyyət göstərir və bütün məlumatlar ölkə ərazisində yerləşən serverlərdə saxlanılır. Yeni sistem axtarış, qazıntı, ekshumasiya və eyniləşdirmə proseslərinin daha səmərəli təşkilinə dəstək verməyi hədəfləyir.
2-07-2026, 12:12
74
