Bakı-Tbilisi-Bakı beynəlxalq marşrutu üzrə hərəkət edən qatarlara əlavə vaqonlar qoşulacaq.
Sumqayit.tv xəbər verir ki, bu barədə "Azərbaycan Dəmir Yolları" (ADY) məlumat yayıb.
Bildirilib ki, 10 iyul 2026-cı il tarixindən etibarən marşrut üzrə hərəkət edən qatarların tərkibinə ölkədaxili marşrutlarda istifadə olunan 3 ədəd standart+ tipli yataq vaqonu əlavə ediləcək.
Bununla da hər reys üzrə 104 əlavə sərnişin yeri yaradılacaq və qatarın ümumi tutumu 178 yerdən 282 yerə çatdırılacaq.
ADY-nin məlumatına görə, əlavə vaqonlara biletlərin satışı artıq başlayıb. Standart+ vaqonlarında gediş haqqı hazırda istifadə olunan "Stadler" vaqonları ilə müqayisədə daha münasib olacaq. Bakı-Tbilisi marşrutu üzrə minimum bilet qiyməti 65,20 manat, Gəncədən 49,30 manat, Yevlaxdan 53,30 manat, Ağstafadan isə 45,30 manat təşkil edəcək.
Qeyd olunub ki, yeni vaqonlarda ödənişsiz baqaj norması 36 kiloqram müəyyən edilib. Sərnişinlərin rahatlığı üçün vaqonlarda səyyar keytrinq, yəni mobil satış xidməti də təşkil olunacaq.
ADY-nin açıqladığı statistikaya əsasən, 25 may – 6 iyul tarixlərində Bakı-Tbilisi-Bakı marşrutu üzrə 25 minə yaxın bilet satılıb, 14 minə yaxın sərnişin daşınıb. Səyahət edənlərin təxminən 40 faizi Gəncə, Yevlax, Ağstafa və digər bölgələrdən qatara minib.
Məlumata görə, 2026-cı ilin ilk altı ayında Azərbaycanda dəmir yolu nəqliyyatı ilə 5,4 milyondan çox sərnişin daşınıb ki, bu da ötən ilin eyni dövrü ilə müqayisədə təxminən 20 faiz artım deməkdir.
7-07-2026, 16:27
77
