Azərbaycanda qumar oyunlarının təşkili və keçirilməsinə görə nəzərdə tutulan cəzalar sərtləşdirilir.

Sumqayit.tv  xəbər verir ki, bununla bağlı Cinayət Məcəlləsinə dəyişiklik Milli Məclisin bugünkü iclasında üçüncü oxunuşda qəbul edilib.

Dəyişikliyə əsasən, qumar oyunları internet, mobil rabitə şəbəkəsi, sosial media platformaları və digər elektron vasitələrlə təşkil edildikdə, yetkinlik yaşına çatmayanların bu oyunlara cəlb olunmasına yol verildikdə, qabaqcadan əlbir olan bir qrup şəxs tərəfindən törədildikdə və ya xeyli miqdarda gəlir əldə edildikdə daha ağır cəzalar tətbiq olunacaq.

Bu hallarda təqsirli şəxslər cinayət nəticəsində əldə olunmuş gəlirin iki mislinədək məbləğdə cərimə, 2 ildən 4 ilədək azadlığın məhdudlaşdırılması və ya eyni müddətə azadlıqdan məhrumetmə ilə cəzalandırılacaqlar.

Bundan əlavə, əməllər mütəşəkkil dəstə və ya cinayətkar birlik tərəfindən törədildikdə, yaxud külli miqdarda gəlir əldə edildikdə 3 ildən 5 ilədək azadlığın məhdudlaşdırılması və ya eyni müddətə azadlıqdan məhrumetmə cəzası nəzərdə tutulur.

Qanuna edilən dəyişikliklə həmçinin qumar oyunlarının təkrar təşkili və keçirilməsi, yetkinlik yaşına çatmayanların bu fəaliyyətə cəlb olunması, eləcə də xeyli, külli və xüsusilə külli miqdarda gəlir əldə olunması hallarında da cəzalar sərtləşdirilib. Yeni qaydalara əsasən, bu əməllərə görə azadlıqdan məhrumetmə müddəti 5 ildən 8 ilədək artırılıb.

10-07-2026, 13:05 57