Sumqayıt şəhərində inşa olunan "Sumqayıt bağları" yaşayış kompleksi ətrafda yaşayan sakinlərin narazılığına səbəb olub.

Sumqayit.tv Patrul.az-a istinadən xəbər verir ki, söhbət şəhərin 15-ci məhəlləsində, 1 saylı ASAN xidmət mərkəzinin arxasında, Avtovağzalın qarşısında həyata keçirilən tikinti işlərindən gedir.

Məlumata görə, 46/9 saylı doqquzmərtəbəli binanın sakinləri tikinti sahəsində üç 16 mərtəbəli binanın inşası zamanı gecə saatlarında da səs-küylü işlərin aparıldığını, kran və ağırtonnajlı texnikaların yaratdığı gurultunun onların istirahətinə mane olduğunu bildiriblər.

Sakinlər həmçinin tikinti zamanı təhlükəsizlik qaydalarına əməl olunmadığını iddia edirlər. Onların sözlərinə görə, tikinti sahəsindən armatur və daş parçalarının ətrafa düşməsi insanların həyatı üçün təhlükə yaradır.

Bundan başqa, tikinti işləri səbəbindən binanın həyətinin bir hissəsinin zəbt edildiyi, bunun da parklanma problemi yaratdığı qeyd olunur.

Sakinlər məsələ ilə bağlı aidiyyəti dövlət qurumlarına müraciət etdiklərini bildirsələr də, iddialarına görə, tikinti işləri əvvəlki qaydada davam etdirilir. 

10-07-2026, 18:49 60