Milli Məclisin deputatları parlamentdə müxtəlif seçki dairələrini təmsil etsələr də, onların bir çoxu yaşadıqları və ya qeydiyyatda olduqları ərazilərdə başqa deputatların seçiciləridirlər.

Sumqayit.tv xəbər verir ki, Modern.az bu mövzuda deputatların fikirlərini öyrənib.

46 saylı Sumqayıt beşinci seçki dairəsinin deputatı Elnarə Akimova bildirib ki, hazırda yaşadığı ərazini 44 saylı Sumqayıt üçüncü seçki dairəsinin deputatı Mehriban Vəliyeva təmsil edir. O qeyd edib ki, son parlament seçkilərində məhz Mehriban Vəliyevaya səs verib.

Elnarə Akimovanın sözlərinə görə, Mehriban Vəliyevanın fəaliyyətini yüksək qiymətləndirir. O, deputatın seçicilərlə mütəmadi əlaqə saxladığını, müraciətlərə həssas yanaşdığını və insanların problemlərinin həlli istiqamətində fəallıq göstərdiyini bildirib.

43 saylı Sumqayıt ikinci seçki dairəsinin deputatı Tahir Mirkişili isə qeyd edib ki, qeydiyyatda Qubadlı rayonunda olduğu üçün səsvermədə 120 saylı Cəbrayıl–Qubadlı seçki dairəsində iştirak edib. O, həm 2020, həm də 2024-cü illərdə keçirilən parlament seçkilərində Yeni Azərbaycan Partiyasının namizədi Ceyhun Məmmədova səs verdiyini açıqlayıb.

12-07-2026, 21:16 53