YAP Sumqayıt şəhər təşkilatının inzibati binasında Sumqayıt Bələdiyyəsinin 2026-cı ilin birinci yarısı üzrə fəaliyyətinə həsr olunmuş hesabat yığıncağı keçirilib.
Sumqayit.tv xəbər verir ki, bələdiyyə sədri Adil Xudadatov hesabat dövründə 18 iclasın keçirildiyini, bu iclaslarda 761 məsələnin müzakirə olunduğunu bildirib. Onun sözlərinə görə, 1085 vətəndaş qəbul edilib, daxil olan müraciətlər qanunvericiliyə uyğun araşdırılıb, şəhid ailələri və qazilərlə mütəmadi görüşlər keçirilib.
Məlumata əsasən, ilin ilk altı ayında Yaşıldərə Yeni Yaşayış massivində "Bələdiyyə parkı" istifadəyə verilib, Sumqayıt Bulvarında yeni inzibati bina alınıb. Şəhərin müxtəlif ərazilərində yolların təmiri, asfaltlanması, küçələrin işıqlandırılması, yaşıllaşdırma işləri, məhəccərlərin quraşdırılması və digər abadlıq layihələri həyata keçirilib.
Bununla yanaşı, Yeni Yaşayış massivində dəmir yolu üzərində beton panelli keçid körpüsü və 250 metrlik kanalizasiya xətti inşa edilib. Hesabat dövründə məhəllə komitələri tərəfindən də müxtəlif infrastruktur layihələri icra olunub, küçə ticarətinə qarşı reydlər və ictimai nəqliyyatda maarifləndirici tədbirlər keçirilib.
Yığıncaqda bələdiyyə sədrinin müavinləri də fəaliyyət istiqamətləri üzrə hesabat təqdim edib. Sonda bir qrup bələdiyyə əməkdaşı Fəxri Fərmanla təltif olunub.
13-07-2026, 13:32
61
