2026-cı ilin yanvar–iyun aylarında Azərbaycanda narkomanlığa və narkotik vasitələrin qanunsuz dövriyyəsinə qarşı keçirilən əməliyyatlar nəticəsində 5 ton 497 kiloqramdan çox narkotik vasitə və psixotrop maddə aşkarlanaraq qanunsuz dövriyyədən çıxarılıb.

Sumqayit.tv xəbər verir ki, bu barədə Narkomanlığa və narkotik vasitələrin qanunsuz dövriyyəsinə qarşı mübarizə üzrə Dövlət Komissiyasının 2026-cı ilin ilk yarısının yekunlarına dair hesabatında bildirilib.

Məlumata əsasən, hesabat dövründə hüquq-mühafizə orqanları tərəfindən 4 434 cinayət faktı aşkarlanıb. Onlardan 1 091-i narkotik vasitələrin qanunsuz satışı, 3 266-sı qanunsuz əldə etmə və saxlama, 75-i narkotik tərkibli bitkilərin qanunsuz əkilməsi, 2-si isə digər narkotik cinayətləri ilə bağlı olub.

Əməliyyatlar zamanı 4 ton 698 kq marixuana, 236 kq heroin, 104 kq tiryək, 240 kq həşiş, 124 kq digər narkotik vasitə və 91 kq psixotrop maddə, həmçinin 24 437 ədəd metadon həbi, 9 444 ədəd çətənə bitkisi və 29 ədəd psixotrop həb götürülüb.

Qanunsuz dövriyyədən çıxarılan narkotik vasitələrin ümumi bazar dəyərinin 166 milyon manat olduğu qeyd edilib.

Hesabat dövründə narkotiklərlə bağlı cinayət məsuliyyətinə 2 848 nəfər cəlb olunub. Onlardan 2 766-sı kişi, 82-si qadın, 30-u isə xarici ölkə vətəndaşıdır.

Bundan başqa, narkotiklərin qaçaqmalçılıq yolu ilə ölkəyə gətirilməsi ilə bağlı 90 fakt aşkarlanıb və həmin əməliyyatlar zamanı 1 ton 344 kiloqramdan çox narkotik vasitə və 20 930 ədəd metadon həbi müsadirə olunub.

Hazırda metadonla əvəzedici müalicə proqramı üzrə ölkədə fəaliyyət göstərən üç məntəqədə, o cümlədən Sumqayıt Narkoloji Mərkəzində 119 nəfər, ümumilikdə isə 677 pasiyent müalicə alır.

13-07-2026, 15:38 55