"Azərbaycan Dəmir Yolları" QSC-də (ADY) tətbiq olunan SİMA Pay üztanıma ilə ödəniş sistemindən istifadə edən sərnişinlərin sayı 9 mini ötüb.
Sumqayit.tv xəbər verir ki, bu barədə ADY-nin Mətbuat Xidməti məlumat yayıb.
Bildirilib ki, artıq iki aydır Bakı və Sumqayıt dəmiryol vağzalları, eləcə də Koroğlu dayanacağında quraşdırılmış SİMA Pay sistemi turniketlərdən keçidi daha sürətli və rahat edib. İctimai nəqliyyatda ilk dəfə ADY tərəfindən tətbiq olunan bu rəqəmsal həll sayəsində sərnişinlər cəmi iki saniyə ərzində təhlükəsiz şəkildə keçid edə bilirlər.
Qeyd edək ki, SİMA Pay üztanıma ilə ödəniş sistemi bu il mayın 15-dən etibarən Azərbaycanın dəmir yolu nəqliyyatında istifadəyə verilib. Xidmətdən yararlanmaq istəyən sərnişinlər "ADY Mobile" tətbiqində "Üztanıma ilə keçin" bölməsi vasitəsilə qeydiyyatdan keçə bilərlər.
ADY-nin məlumatına görə, dünyanın aparıcı ölkələrində istifadə olunan Face Pay texnologiyasının Azərbaycanda SİMA Pay rəqəmsal ekosistemi ilə tətbiqi sərnişindaşımanın təhlükəsizliyini artırmaqla yanaşı, biometrik ödənişlərin genişlənməsinə, kartın itirilməsi və ya balansın tükənməsi kimi problemlərin aradan qaldırılmasına da imkan yaradır.
13-07-2026, 16:07
54
