Azərbaycan Prezidenti İlham Əliyev iyulun 17-də İrlandiyanın Azərbaycana yeni təyin olunmuş fövqəladə və səlahiyyətli səfiri Kler Brosnanı qəbul edib.
Sumqayit.tv xəbər verir ki, səfir etimadnaməsini dövlət başçısına təqdim etdikdən sonra tərəflər arasında görüş keçirilib.
Prezident İlham Əliyev Azərbaycan ilə İrlandiya arasında siyasi, iqtisadi, investisiya və digər sahələrdə əməkdaşlığın genişləndirilməsinin vacibliyini vurğulayıb.
Kler Brosnan Bakıda olmaqdan məmnunluğunu ifadə edərək paytaxtın gözəlliyini, tarixi və müasirliyin vəhdətini yüksək qiymətləndirib. O, həmçinin Azərbaycanla Ermənistan arasında sülh prosesində əldə olunan nailiyyətlər münasibətilə dövlət başçısını təbrik edib.
Görüşdə İrlandiyanın Avropa İttifaqı ilə bağlı fəaliyyəti, COP29-un uğurla təşkili, eləcə də Azərbaycan və İrlandiya arasında təhsil, yüksək texnologiyalar və digər sahələrdə əməkdaşlıq imkanları ətrafında fikir mübadiləsi aparılıb.
17-07-2026, 12:13
62
