Sumqayıt şəhərinin 19-cu məhəlləsində yerləşən obyekt sahibləri kanalizasiya sularının iş yerlərini basdığını bildirirlər.

Sakinlərin və sahibkarların Sumqayit.tv-yə verdiyi məlumata görə, hadisə iyulun 18-də saat 20:00 radələrində baş verib. İddialara əsasən, Heydər Əliyev prospekti ərazisində ADSEA əməkdaşları tərəfindən kanalizasiya xəttində aparılan işlər zamanı yaranan problem nəticəsində kanalizasiya suları ətrafdakı obyektlərə dolmağa başlayıb.

Müraciətdə bildirilir ki, hadisədən dərhal sonra aidiyyəti qurumla əlaqə saxlanılıb. Bir neçə saat sonra sahibkarlara problemin aradan qaldırılması istiqamətində iş aparıldığı bildirilsə də, gecə saatlarına qədər kanalizasiya sularının axınının dayanmadığı qeyd olunur.

Sahibkarların sözlərinə görə, yaranmış vəziyyət nəticəsində obyektlər su altında qalıb, fəaliyyətləri iflic olub və maddi zərər meydana gəlib.

Şikayətçilər hesab edirlər ki, problemin yaranmasına səbəb aparılan işlər zamanı yol verilən texniki nasazlıq və ya səhlənkarlıq ola bilər. Onlar vəziyyətin qısa zamanda aradan qaldırılmasını və dəymiş ziyanın qiymətləndirilməsini tələb edirlər.

Hadisə ilə bağlı qarşı tərəfin mövqeyini öyrənmək üçün aidiyyəti quruma sorğu ünvanlanacaq.

Qeyd: Yazıda səsləndirilən fikirlər və hadisənin başvermə səbəbi ilə bağlı iddialar müraciət edən vətəndaşlara məxsusdur. Rəsmi qurumların mövqeyi təqdim olunduğu təqdirdə materiala əlavə ediləcək.

18-07-2026, 00:39 97