Sumqayıtda qızıl alveri ilə bağlı qalmaqallı cinayət işi yenidən məhkəmə müstəvisinə daşınıb.

Sumqayit.tv Pravda.az-a istinadən  xəbər verir ki, Balaxanım Atakişiyeva barəsində çıxarılmış bəraət hökmündən kassasiya şikayəti verilib. Şikayətə iyulun 24-də Ali Məhkəmədə hakim Ələsgər Novruzovun sədrliyi ilə baxılacaq.

İttihama görə, Balaxanım Atakişiyeva Bakı və Sumqayıtda qızıl alveri ilə məşğul olub. Bildirilir ki, o, əvvəlcə topdansatış qiymətinə aldığı qızıl-zinət əşyalarının pulunu vaxtında ödəyərək satıcının etibarını qazanıb. Daha sonra isə zərərçəkmiş tərəfin iddiasına əsasən, ümumilikdə 62 min manat dəyərində qızıl-zinət əşyaları götürsə də, ödənişi həyata keçirməyib.

İddialara görə, o, borcun əvəzində "Toyota Prado" markalı avtomobil verəcəyini vəd etsə də, bu vədini yerinə yetirməyib.

Balaxanım Atakişiyeva polis tərəfindən saxlanılsa da, Sumqayıt Ağır Cinayətlər Məhkəməsi onun təqsirinin sübuta yetirilmədiyi qənaətinə gələrək bəraət hökmü çıxarıb.

Həmin qərardan narazı qalan zərərçəkmiş tərəf kassasiya şikayəti verib. İşə Ali Məhkəmədə yenidən baxılacaq.

21-07-2026, 16:47 95