Sumqayıtda 400 min manatlıq tikinti qalmaqalı yenidən Ali Məhkəmədə

Sumqayıtda çoxmərtəbəli bina tikintisi ilə bağlı dələduzluq ittihamı üzrə məhkum olunmuş şəxslə bağlı iş yenidən Ali Məhkəmədə araşdırılacaq.

Sumqayit.tv xəbər verir ki, "Akaray Grup İnşaat Ticarət İthalat və İhracat Limited" şirkətinin Azərbaycandakı filialının direktoru Arif Mansurovun barəsindəki qərardan yenidən kassasiya şikayəti verilib. Şikayətə Ali Məhkəmənin hakimi Teyyub Muxtarovun sədrliyi ilə baxılacaq.

İttihama əsasən, Arif Mansurov iki nəfərin etibarından sui-istifadə edərək ümumilikdə 570 min manat vəsaiti ələ keçirib. Bildirilir ki, o, zərərçəkmişlərdən birini məhkəmə qərarının ləğvi üçün guya səlahiyyətli şəxslərə bahalı hədiyyələr veriləcəyinə inandıraraq 170 min manat alıb.

Bundan əlavə, Mansurovun Sumqayıtda çoxmərtəbəli yaşayış binasının tikintisinə icazə alınacağını vəd edərək digər zərərçəkmişdən 400 min manat aldığı iddia olunur.

Məlumata görə, təqsirləndirilən şəxs istintaq zamanı dəymiş maddi ziyanı ödəyib, lakin məhkəmə prosesində ifadə verməkdən imtina edib.

Sumqayıt Ağır Cinayətlər Məhkəməsinin hökmü ilə Arif Mansurov 5 il müddətinə azadlıqdan məhrum edilib. Daha sonra Sumqayıt Apellyasiya Məhkəməsi həmin hökmü qüvvədə saxlayıb.

Qeyd edək ki, iş üzrə əvvəllər verilmiş kassasiya şikayəti geri götürülsə də, qərardan yenidən kassasiya şikayəti təqdim olunub.

Mənbə: Pravda.az

22-07-2026, 11:09 81