Sumqayıtda 67 yaşlı qadının qətlə yetirilməsi ilə bağlı məhkum olunmuş Mikayıl Şərifovun kassasiya şikayətinə baxılacaq.

Sumqayit.tv xəbər verir ki, Ali Məhkəmədə iş üzrə məhkəmə iclası iyulun 31-də keçiriləcək. Prosesə hakim İlkin Rəcəbov sədrlik edəcək.

İttihama əsasən, hadisə 5 yanvar 2025-ci il tarixində Sumqayıtın Xəzər bağları yaşayış massivində baş verib. Mikayıl Şərifov əvvəllər tanıdığı 1958-ci il təvəllüdlü Mehparə Ələkbərova ilə toyuqların zəhərlənməsi üstündə yaranan mübahisə zamanı kərki tipli məişət aləti ilə qadına çoxsaylı zərbələr endirib. Ağır xəsarətlər alan qadın 8 yanvar 2025-ci ildə xəstəxanada vəfat edib.

Təqsirləndirilən şəxs məhkəmədə ifadəsində hadisənin əvvəlcədən planlaşdırılmadığını, özünü müdafiə etdiyini və qadını öldürmək niyyətinin olmadığını bildirib. O, hadisədən sonra polisə özü məlumat verdiyini və həmin gün spirtli içki qəbul etdiyini də etiraf edib.

Sumqayıt Ağır Cinayətlər Məhkəməsinin hökmü ilə Mikayıl Şərifov 18 il müddətinə azadlıqdan məhrum edilib.

Mənbə: Pravda.az

28-07-2026, 09:54 61