Xəzər dənizinin dibi ilə çəkiləcək Transxəzər Fiber-Optik Kabel (FOCL) xəttinin tikintisinə başlanılıb.

Sumqayit.tv xəbər verir ki, bu barədə Qazaxıstanın Süni İntellekt və Rəqəmsal İnkişaf Nazirliyi məlumat yayıb.

Məlumata görə, Çindən Kurık limanına çatdırılan optik kabel və ümumi çəkisi 600 ton olan üç kabel səbəti xüsusi logistika gəmisi ilə Bakıya gətirilib. Daha sonra kabel xüsusi çənə yerləşdirilərək gəmi Sumqayıt limanından Aktau istiqamətində yola düşüb və xəttin çəkilişinə start verilib.

Layihənin icrası üçün su tutumu 20 min tondan çox olan, müasir dinamik mövqeləndirmə sistemi ilə təchiz edilmiş kabeldöşəyən gəmi cəlb olunub. Gəmidə texniki mütəxəssislərlə yanaşı, "Kazakhtelecom" ASC-nin nümayəndəsi də daxil olmaqla 70 nəfərlik heyət çalışır.

Transxəzər Fiber-Optik Kabel layihəsi "Kazakhtelecom" ASC və "AzerTelecom Int." MMC tərəfindən yaradılmış "CaspiLink B.V." birgə müəssisəsi tərəfindən həyata keçirilir.

Nazirlik bildirir ki, hava şəraiti əlverişli olarsa, kabelin dənizin dibi ilə çəkilişi 15–20 gün ərzində tamamlanacaq. Layihə üzrə bütün texnoloji və sazlama işlərinin isə 2026-cı ilin sonunadək başa çatdırılması nəzərdə tutulur.

31-07-2026, 14:15 82