Türkiyənin İzmir vilayətinin Şirincə qəsəbəsində "Sözlərin ötəsində" adlı poetik-musiqili gecə keçirilib.

Sumqayit.tv xəbər verir ki, "Səssizlik danışarkən" mövzusu ilə təşkil olunan tədbirdə 30 ildir Türkiyədə yaşayan azərbaycanlı sənətşünaslıq üzrə fəlsəfə doktoru, musiqi terapevti Züleyxa Abdullayeva və şair, bədii-elmi kitabların müəllifi Sərgun Ağar iştirak ediblər.

Proqram çərçivəsində Sərgun Ağarın şeirləri Züleyxa Abdullayevanın royalda ifa etdiyi improvizasiyalarla təqdim olunub. Gecədə musiqi terapiyasının insan ruhuna təsiri, duyğuların ifadəsi və ünsiyyətin gücləndirilməsindəki rolu diqqət mərkəzində olub.

Tədbirdə Azərbaycan bəstəkarlarının əsərləri və milli musiqi nümunələri də səsləndirilib. İştirakçılar ölkəmizin zəngin mədəni irsini böyük maraqla qarşılayıblar.

Gecə ərzində Züleyxa Abdullayevanın müəllifi olduğu "Qəbul et" əsəri də ifa olunub. Tədbirin sonunda poeziya, musiqi və insan ruhu arasındakı əlaqələr barədə fikir mübadiləsi aparılıb.

Qeyd olunub ki, Şirincədə keçirilən bu poetik-musiqili gecə Azərbaycan mədəniyyətinin Türkiyədə tanıdılması və iki qardaş ölkə arasında mədəni əlaqələrin daha da möhkəmlənməsinə töhfə verən nümunəvi tədbirlərdən biri olub. 

5-08-2026, 14:01 66