Sumqayıt Apellyasiya Məhkəməsində dələduzluqda təqsirləndirilən Əjdər Tağıyevin (adı və soyadı şərtidir) barəsindəki hökmdən verilmiş apellyasiya şikayətinə baxılıb.

Sumqayit.tv  Pravda.az  xəbər verir ki, məhkəmə apellyasiya şikayətini təmin etməyib və birinci instansiya məhkəməsinin hökmünü qüvvədə saxlayıb.

İttihama görə, təqsirləndirilən şəxs zərərçəkmişi Yasamal rayonu ərazisində yerləşən MİDA sosial yaşayış komplekslərində 3 və 4 otaqlı mənzil alınmasına köməklik göstərə biləcəyinə inandıraraq müxtəlif vaxtlarda ondan pul alıb.

Araşdırma zamanı müəyyən olunub ki, ödənişlərin bir hissəsi Sumqayıt şəhərində, o cümlədən 45-ci məhəllədə yerləşən "Unibank" filialının qarşısında nağd şəkildə həyata keçirilib. Sonrakı mərhələlərdə isə "Emanat", "Mpay", "MilliÖn" terminalları və bank köçürmələri vasitəsilə müxtəlif məbləğlər ödənilib.

İstintaqla müəyyən edilib ki, Əjdər Tağıyev zərərçəkmişdən ümumilikdə 27 690 manat alaraq vəd etdiyi mənzillərin alınmasını təmin etməyib və pulu şəxsi məqsədləri üçün istifadə edib.

Sumqayıt Şəhər Məhkəməsinin hökmü ilə o, Cinayət Məcəlləsinin 178.2.4-cü (dələduzluq) maddəsi ilə təqsirli bilinərək 3 il 4 ay müddətinə azadlıqdan məhrumetmə cəzasına məhkum edilib.

Həmçinin əvvəlki hökm üzrə icra edilməmiş 4 500 manat cərimə də hazırkı cəzaya əlavə olunub. Təqsirləndirilən şəxs cəzasını ümumi rejimli cəzaçəkmə müəssisəsində çəkəcək. Sumqayıt Apellyasiya Məhkəməsi isə bu hökmdə dəyişiklik etməyib.

5-08-2026, 14:48 63