Sumqayıt şəhəri, İnşaatçılar qəsəbəsi, Qara Qarayev küçəsində yerləşən 5 saylı yataqxananın sakinləri yaşadıqları binanın gələcək taleyi ilə bağlı narahatlıqlarını dilə gətiriblər.

Sumqayit.tv. Median.az-a istinadən xəbər verir ki, sakinlər binanın uzun illərdir istismarda olduğunu, hazırkı vəziyyətinin isə yararsız hesab edildiyini bildirərək, onun söküləcək yaşayış binaları siyahısına daxil edilib-edilmədiyi ilə maraqlanıblar.

Onların sözlərinə görə, binanın ətrafında uşaqlar üçün oyun meydançası, park və ya sakinlərin istirahəti üçün skamyalar yoxdur. Sakinlər hesab edirlər ki, ərazidə abadlıq işlərinin aparılmaması gələcəkdə söküntü planlaşdırılması ilə bağlı ola bilər.

Məsələ ilə bağlı açıqlama verən Sumqayıt Şəhər İcra Hakimiyyəti bildirib ki, şəhərdə istismar müddətini başa vurmuş və yaşayış üçün təhlükə yaradan binaların mərhələli şəkildə sökülməsi və onların yerində müasir yaşayış komplekslərinin inşası istiqamətində işlər davam etdirilir.

Qeyd olunub ki, əvvəlki illərdə bir neçə yataqxana sökülərək yerində yeni yaşayış binaları tikilib. Hazırda bu proses 4-cü, 15-ci, 16-cı, 17-ci və 21-ci məhəllələrdə davam etdirilir.

İcra Hakimiyyətindən bildirilib ki, növbəti mərhələlərdə də istismar müddətini başa vurmuş qəzalı binaların mərhələli şəkildə sökülməsi və ərazilərdə yeni yaşayış komplekslərinin inşası nəzərdə tutulur. Bununla belə, İnşaatçılar qəsəbəsində yerləşən 5 saylı yataqxananın sökülməsi ilə bağlı konkret tarix və ya qərar açıqlanmayıb.

5-08-2026, 17:50 72