Qazaxıstanda həyata keçirilən Trans-Xəzər sualtı fiber-optik rabitə xəttinin dəniz hissəsinin tikintisi uğurla başa çatıb.

Sumqayit.tv xəbər verir ki, Qazaxıstan Baş nazirinin rəsmi informasiya resursunun yaydığı məlumata görə, sualtı kabel Qazaxıstan sahilinə uğurla çatdırılıb. Bununla da "Qazaxtelekom" SC və "AzerTelecom International" şirkətinin birgə reallaşdırdığı layihənin ən mürəkkəb mərhələsi tamamlanıb.

Layihə çərçivəsində çəkilən Aktau–Sumqayıt marşrutu Qazaxıstan və Azərbaycanın rəqəmsal infrastrukturunu birləşdirəcək, Asiya ilə Avropa arasında məlumatların yüksək sürətlə birbaşa ötürülməsini təmin edən mühüm rəqəmsal dəhliz rolunu oynayacaq.

Qeyd edilib ki, yeni fiber-optik xətt beynəlxalq telekommunikasiya əlaqələrinin etibarlılığını artırmaqla yanaşı, Azərbaycan və Qazaxıstanın tranzit potensialının daha da güclənməsinə töhfə verəcək.

5-08-2026, 19:38 58