Gəncə Şəhər Məhkəməsində təhsil eksperti Kamran Əsədovun cinayət işi üzrə növbəti məhkəmə prosesi keçirilib.

Sumqayit.tv xəbər verir ki, proses hakim Elçin Məmmədovun sədrliyi ilə baş tutub.

Məhkəmə iclasında zərərçəkən şəxslər vəsatət qaldıraraq hazırlıq kursunda dərs deyən müəllimlərlə bağlı intizam tədbirlərinin görülməsini istəyiblər.

Məhkəmə həmçinin təqsirləndirilən Gündüz Abbasovun vəzifəli şəxs olub-olmaması ilə bağlı Vergilər Nazirliyinə sorğu göndərilməsi barədə qərar qəbul edib.

Daha sonra Kamran Əsədov məhkəmədən barəsində olan cinayət işinə xitam verilməsini xahiş edib.

Onun vəkili Bəxtiyar Muradov isə bəzi xəbər saytlarında məhkəmə prosesi ilə bağlı həqiqətə uyğun olmayan məlumatların yayıldığını bildirərək bununla bağlı tədbir görülməsini istəyib.

Məhkəmə vəsatətlərə növbəti iclasda münasibət bildirəcək. Növbəti məhkəmə prosesi 20 avqust tarixinə təyin olunub.

Qeyd edək ki, istintaq materiallarına əsasən, qəbul və buraxılış imtahanlarında iştirak edən şəxslərə qanunsuz texniki vasitələrdən istifadə etməklə köməklik göstərilməsi ilə bağlı Kamran Əsədov və digər şəxslər barəsində cinayət işi başlanıb.

İş üzrə ibtidai istintaq başa çatdırılaraq materiallar məhkəməyə göndərilib.//AzEdu.az

14-08-2026, 13:29 84